Yaşı bir əsri adlamış “Xalq qəzeti”nin (70 il “Kommunist” adı ilə çıxmışdır) ötən əsrdəki fəaliyyətini, bu nəşri milli mətbuatımızın bayraqdarına çevirmiş fədakar qələm sahiblərini göz önünə gətirdikdə onların sırasında, istər-istəməz, Adil Cavadlı da yada düşür...
Adil Dadaş oğlu Cavadlı 1923-cü ildə Bakıda doğulmuşdur. Əslən Şamaxıdan olan ailə XX əsrin əvvəlindəki dağıdıcı zəlzələdən sonra Bakıya köçmüş və Şirşov-4 (indiki Həsən Abdullayev küçəsi) ünvanında məskunlaşmışdı. Adil Cavadlı da, təqribən, 20 il sonra burada dünyaya göz açmışdır. İndiki 132 nömrəli (o vaxt 14 nömrəli idi) orta məktəbdə oxumuşdur.
Ali məktəbin birinci kursundan könüllü olaraq cəbhəyə getmiş, 1947-ci ilədək hərbi xidmətdə olmuşdur. Ordudan tərxis olunduqdan sonra əmək fəaliyyətinə jurnalistika sahəsində başlamışdır. Bu da təsadüfi deyildi. Adil müəllimin atası – Dadaş Cavadlı Azərbaycanın tanınmış tərcüməçilərindən idi, Cəfər Cabbarlı, İbrahimxəlil İbrahimov, Əfrasiyab Bədəlbəyli, Süleyman Məlikov, Məmmədəli Sidqi və başqaları ilə birgə 1920–30-cu illərdə “Kommunist” qəzeti redaksiyasında işləmişdi.
Adil Cavadlı əvvəlcə “Azərbaycan müəllimi”, “Bakı” və “Baku” axşam qəzetlərində müxtəlif vəzifələrdə çalışmış, o cümlədən məsul katib olmuşdur. Onun qəzetçilik bacarığı “Bakı” qəzetində məsul katib işləyərkən özünü daha parlaq şəkildə büruzə vermişdir. Əslində, o, axşam qəzetinin təməlini qoyanlardan biri idi. “Bakı” ilk “Qızıl qələm” mükafatını məhz Adil Cavadlının verdiyi tərtibatın gözəlliyinə görə almışdı.
Peşəkar qəzetçinin peşəkarlığı diqqətdən yayınmadı. Respublikanın baş qəzeti – “Kommunist”in rəhbərliyi Adil Cavadlını işə dəvət etdi. Bir müddətdən sonra vaxtilə atasının tərcüməçi işlədiyi qəzetdə əvvəlcə məsul katib, sonra isə redaktorun (indiki anlamda baş redaktorun – Q.P.) birinci müavini oldu. Onu da deyək ki, o dövrdə “Kommunist” qəzetində sıravi vəzifədə belə işləmək jurnalistikanı peşə seçənlərin hər biri üçün əlçatmaz arzu idi və bu, çox az adama nəsib olurdu.
Adil müəllim istər dost-tanış yanında, istərsə də işlədiyi kollektivdə böyük hörmət-izzət sahibi idi. İlk baxışda ciddi görkəmi yad adamları ondan məsafə saxlamağa vadar etsə də, yaxından tanıdıqca, Adil müəllimin nə qədər xeyirxah, qayğıkeş, sadə, nəcib, nəzakətli və səmimi bir insan olduğunu görüb ona bağlanırdılar. Halal, obyektiv, təmənnasız, paxıllıqdan, bədxahlıqdan uzaq bir insan idi. Yorulmaq bilmədən, başını yuxarı qaldırmadan gecə-gündüz işləyirdi.
Redaksiya kollektivinin yığıncaqlarında, kollegiya iclaslarında, letuçkalarda çıxış edərkən, həmişə obyektivliyi gözləyirdi. Hər bir məsələyə onun özünəməxsus münasibəti olurdu. Və onları elə məharətlə təqdim edirdi ki, dediyi fikirlər, verdiyi təkliflər, hətta tutduğu iradlar belə qəbul olunur və məmnunluqla qarşılanırdı. Onun sərtliyi, dönməzliyi qədər, ondan da artıq mülayimliyi və xeyirxahlığı vardı.
Adil müəllimin xeyirxahlığı çoxçalarlı idi: kiməsə əl tutmaq, kömək etmək, yardım göstərməklə kifayətlənmirdi. Hamıya ehtiramla yanaşır, hər şeyə – heyvanlara, bitkiyə, gülə-çiçəyə münasibətdə həssaslıq göstərir, düşmənləri barışdırır, dostları mehribanlaşdırırdı...
Bu fikirlər, sözün həqiqi mənasında, mətbuat cəfakeşi olan, Əməkdar mədəniyyət işçisi Adil Cavadlının 100 illik yubileyi ilə əlaqədar İçərişəhərdəki Muğam klubunda keçirilən mərasimində səsləndi. Yubileylə bağlı yenicə çap edilmiş “Nasildən-nəsilə” kitabının da təqdimatı oldu. Mərasimi Adil müəllimin qızı, Qafqaz Müsəlmanları İdarəsi sədrinin müavini Hacı Qəmər xanım Cavadlı açaraq, tədbir iştirakçılarını salamladıqdan sonra atasının həyat və fəaliyyəti barədə danışdı, ailədə, qonum-qonşularla münasibətdə yaddaqalan məqamlardan söz açdı.
“Xalq qəzeti”nin bölgə müxbiri İlqar Həsənov, yubilyarın uşaqlıq dostu, akademik Kamal Talıbzadənin qızı Ülkər Talıbzadə, Azərbaycan Jurnalistlər Birliyi sədrinin müavini Şahin Babayev, Cavadlılar ailəsinin nümayəndələri Günel Cavadlı - İsayeva, Mahirə Kazım qızı, həmçinin bu sətirlərin müəllifi Adil Cavadlı ilə bağlı şahidi olduqları, eşidib-bildikləri xatirələri dilə gətirdilər. Ümumi fikir bu idi ki, Adil müəllim dünya malında əsla gözü olmayan, halal, mənəviyyatca təmiz, böyük əxlaq sahibi, nəcib bir insan, peşəkar jurnalist kimi yadda qalıb. Allah rəhmət eləsin!
Qüdrət Piriyev, “Xalq qəzeti”