“Şöhrət”li yazıçının “Şərəf”li ömür yolu
Azərbaycan Respublikası Prezidenti İlham Əliyevin dünən imzaladığı sərəncamla Xalq yazıçısı Mövlud Süleyman oğlu Balakişiyevin (Mövlud Süleymanlı) “Şərəf” ordeni ilə təltif edilməsi ədəbi-mədəni aləmdə böyük razılıqla qarşılanıb.
Sevimli yazıçımızın növbəti dəfə yüksək səviyyədə təltif olunduğunu bilən kimi zəng edərək təbriklərimizi çatdırdıq. Təşəkkür edərək bildirdi ki, dövlətin sənət adamlarına, yaradıcı ziyalılara diqqət və qayğısından olduqca razıdır. Prezident İlham Əliyevin yaradıcılığına verdiyi yüksək qiymətə görə dərin minnətdarlığını ifadə etdi.
Çağdaş ədəbiyyatımızın inkişafında böyük xidmətləri olan 80 yaşlı nasir, dramaturq və ssenarist Mövlud Süleymanlı bu gün də gənclik şövqü il yazıb-yaradan qələm sahiblərindəndir. O, özünəxas yazı üslubu ilə xalqın tarixini, etnoqrafiyasını, əxlaqi dəyərlərini əsərlərində parlaq şəkildə təcəssüm etdirir. Bütün bunlar Mövlud Süleymanlının yaradıcılığını səciyyələndirən başlıca amillərdir.
Yarım əsrdən çox yaradıcılıq yolu keçən sevimli yazıçımız ədəbiyyata bir çox qələmdaşları kimi, şeirlə gəlib. Elə onun nəsr dilinin son dərəcə axıcı və rəvan olması da, şübhəsiz, bununla bağlıdır. 1964-cü ildə "Аzərbаycаn gəncləri" qəzetində "Əllərim" adlı ilk şeiri çаp оlunan Mövlud Süleymanlının nəsr əsərlərindəki obrazlı təhkiyələri, qəhrəmanlarının mənəvi aləminə işıq salan poetik yanaşma tərzi hər zaman oxucuları bir ahənrüba kimi özünə çəkib. Yazıçının bir-birindən maraqlı hekayə və povestləri ilk dəfə "Ayın aydınlığında" adlı nəsr kitabında işıq üzü görüb. "Qar", "Yanğın", "Şanapipik", "Şeytan", "Duzsuzluq", "Ot" hekayələri M.Süleymanlını oxuculara cəmiyyət problemlərini zamanında görüb əks etdirən realist bir nasir kimi tanıdıb.
Ədib 1980-ci illərdən başlayaraq daha çox roman janrına müraciət edib. "Köç", "Ceviz qurdu", "Səs" romanları çağdaş Azərbaycan romançılığının inkşafında yeni pillənin parlaq nümunələridir. "Köç" romanında Azərbaycan nəsri üçün yeni olan mifik təfəkkür tərzi, türk ruhunun etnoqrafik təsviri və folklorun ən qədim çalarları əks olunub. "Səs" romanı isə sovet cəmiyyətinin son durumunu əks etdirən sosial roman kimi maraqla qarşılanıb.
Daim qaynar ədəbi mühitdə olan Mövlud Süleymanlı 17 il Аzərbаycаn Dövlət TeleRаdiо Şirkətinin sədr müаvini vəzifəsində çalışıb. O həmin müddətdə bəbii prosesin, folklorumuzun, etnoqrafiyamızın və digər xаlq yаrаdıcılığı örnəklərinin efirdə ardıcıl işıqlandırılmasını təmin edib.
Xalq yazıçısının ürək sözlərini təqdim edirik:
– Bir ədib kimi mənim yaradıcılığım daim yüksək qiymətləndirilib. Əməkdаr incəsənət хаdimi, Xаlq yаzıçısı adlarına layiq görülmüşəm, bundan əvvəl “Şöhrət” ordeni ilə təltif edilmişəm. İndi də hörmətli Prezidentimiz “Şərəf” ordeni ilə təltif olunmağım barədə sərəncam imzalayıb. Dövlətimizin başçısına hədsiz dərəcədə minnətdaram.
Əlbəttə, bütün bunlar mənə böyük yaradıcılıq stimulu verir. Onu da deyim ki, həyatımın ən böyük sevincini hər bir soydaşım kimi, mən də 2020-ci ilin payızında – rəşadətli ordumuz 44 günlük “Zəfər yürüşü” ilə əzəli torpaqlarımız olan Qarabağı və Şərqi Zəngəzuru erməni işğalından azad edəndə yaşadım. Bu Böyük Qələbə həm milli birliyin təntənəsi oldu, həm də bizi dünyaya qalib xalq kimi tanıtdı.
Bir daha müzəffər Ali Baş Komandanımıza dərin təşəkkürümü bildirir və əmin edirəm ki, ömrümün Allahın lütf edəcəyi qalan illərində də öz qələmimlə Azərbaycan milli məfkurəsinin geniş yayılmasına, mənəvi dəyərlərimizin yaşadılmasına xidmət edəcəyəm.
Uğurlar olsun, Mövlud müəllim! Redaksiyamızın kollektivi də öz sevimli yazıçısını layiq görüldüyü yüksək dövlət təltifi münasibətilə səmimi təbrik edir, parlaq qələm sahibinə cansağlığı və yeni sənət sevincləri arzulayır.
Əli NƏCƏFXANLI, “Xalq qəzeti”