Milli Mətbuat və Jurnalistika Günü tədbirləri sırasında dünyasını dəyişmiş ustad qələm sahiblərinin yad edilməsi də mediamızın qədirbilənlik ənənələrindəndir. Builki peşə bayramında Azərbaycan Mətbuat Şurasında milli jurnalistikamızda özünəməxsus dəst-xətti ilə seçilmiş, mətbu sözə məsuliyyəti ilə tanımış təcrübəli redaktor, kəsərli söz sahibi, Əməkdar mədəniyyət işçisi Şakir Yaqubovun “Yaddaşa son səyahət” kitabının təqdimat mərasimi keçirildi. 

Əslində, bu toplantı 9 ay əvvəl dün­yasını dəyişmiş tanınmış media xa­diminin xatirəsini anma günü kimi də əlamətdar oldu. Bu günlərdə işıq üzü görmüş kitabda istedadlı jurnalistin 2017–2020-ci illərdə dərc edilmiş pub­lisistik qeydləri toplanıb. 

Mərasimi giriş sözü ilə açan AMŞ İdarə Heyətinin sədri Rəşad Mə­cid Azərbaycan jurnalistikasında özünəməxsus yeri və izi olan Şakir Yaqubovu belə səciyyələndirdi: “Şa­kir Yaqubov təpədən dırnağa jurnalist, mətbu sözün böyük cəfakeşi idi. O, is­tedadlı qələm sahibi, müxtəlif janrlarda yazılmış bir neçə kitabın, saysız-he­sabsız qəzet məqaləsinin müəllifi ol­maqla yanaşı, həm də mahir redaktor idi. Ustad redaktorun qələmi ilə ən zəif yazılar da ətə-qana doldurularaq qəzet səhifələrinə çıxmaq hüququ qazanırdı. İstedadlı jurnalistin həmkar və dostları­nın təşəbbüsü ilə 2017–2020-ci illərdə dərc edilmiş publisistik qeydlərindən ibarət “Yaddaşa son səyahət” kitabı bu sənəti özünə həyat yolu seçənlər, xüsu­silə, gənc jurnalistlər üçün dəyərli mən­bədir. Heç də təsadüfi deyildir ki, onun yaradıcılıq çeşməsindən su içən, zən­gin təcrübəsindən bəhrələnən jurnalist­lər Şakir Yaqubov yetirməsi olduqları ilə fəxr edirlər”.

Şakir Yaqubovu təmsil etdiyi nəsilin sənət müəllimi və qyğıkeş dostu xatır­layan “Yaddaşa son səyahət” kitabının tərtibçi-redaktoru Elşən Əliyev mərhum müəllifin gənc yazarlara örnək sayıla biləcək publisistikasının tədqiq olu­nacağına ümid etdiyini bildirdi. Daha sonra tədbirə moderatorluq edən MŞ Ahıl Jurnalistlər Məclisinin sədri Tahir Aydınoğlu mərhum sənətkarın yüksək insani keyfiyyətlərindən, onun azərbay­cançılıq ideyasına sadiqliyindən, eləcə də sözə böyük məsuliyyətlə yanaşma­sından ətraflı söhbət açdı, keçmiş iş yoldaşı barədə xatirələrini söylədi.

Şakir Yaqubovun yetirmələrindən Azər Qaraçənli, Müsəllim Həsənov, Sü­leyman Qaradağlı, Şərif Ağayar, İmran Bədirxanlı onun peşəkar qəzetçi, tələ­bkar redaktor, qayğıkeş pedaqoq ol­duğunu söylədilər. Mərhum sənətkarla “Səhər” qəzetində çiyin-çiyinə çalışmış Zemfira Ələkbərova, Svetlana Şıxəliye­va da Ş.Yaqubov haqqında ürək sözlə­rini söylədilər. 

“Yaddaşa son səyahət” kitabının təq­dimat mərasimində Şakir Yaqubovun ailə üzvləri də iştirak edirdi. Qızları Aynur və Aysel ataları ilə bağlı xatirələrini dilə gətirdilər, həmçinin tədbirin təşkilatçıla­rına, kitabın ərsəyə gəlməsində əməyi olanlara minnətdarlıqlarını bildirdilər. 

Xatırladaq ki, Şakir Yaqubov döv­ri mətbuatda işıq üzü görmüş çoxsaylı publisistika nümunəsinin müəllifi, bir sıra elmi əsərlərin tərcüməçisi, sənədli ki­tabların və elmi-kütləvi nəşrin redaktoru olub. Tanınmış jurnalistin müxtəlif janr­larda, o cümlədən idman mövzusunda yazıları ayrı-ayrı toplulara daxil edilib. 

Fədakar qələm sahibi Azərbaycan Mətbuat Şurasının “Ali Media” müka­fatına, “Qızıl qələm” və “Həsən bəy Zərdabi” yaradıcılıq mükafatlarına layiq görülmüş, 10-dək yaradıcılıq müsa­biqəsinin qalibi olmuşdu.

İ.HƏSƏNQALA, “Xalq qəzeti”