Şəfəqli Yardımlı rayonunun kəndlərindən biridir. Kəndin iki minə qədər əhalisi var. Yeddi şəhid övladı ilə qürur duyan kənddəki məktəb onlardan birinin – Səyyar Şəbiyevin adını daşıyır. Burada tez-tez vətənpərvərlik tədbirləri keçirilir və şagirdlərə elin, obanın igid oğullarının hünər dastanı öyrədilir.
Səyyar Şəbiyev 1974-cü ildə anadan olub. Evdə qardaşların ən kiçiyi, ailənin ən sevimlisi idi. Məktəbdə də nümunəvi davranışı, yaxşı oxumağı ilə müəllimlərinin sevimlisi, sinif yoldaşlarının yaxın dostu olub. Arzusu həkim olmaq idi, kənddə feldşer işləyən atası Aslan kişinin ağ xalatını geyinməkdən zövq alardı. Boş vaxtlarında isə gitara çalmağı sevərdi Səyyar. Əsgəri xidmətinə Qusarda başlayan igid tezliklə cəbhə xəttinə göndərilib. Döyüş yolu Tərtər, Ağdərə, Cəbrayıl, Füzuli, Xocavənd (bunlar onun öz bloknotunda qeyd olunub) kecib. Sonra o, Qubadlı və Laçın uğrunda gedən döyüşlərdə iştirak edib. 1992-ci il oktyabrın 2-də o yerlərin, elə Yardımlını çox xatırladan ərazisində – Qızartı dağında şəhid olub. Təsadüfə baxın: Şəfəqli kəndinin igid oğlu və onun Qızartı dağında şəhadəti...
... Şəhid məzarlarına baxırıq. Səyyarın bibisi oğlu – müəllim, yazar, tərcüməçi və rəssam-heykəltəraş Zahir Məlikli Sarı Aşığın bir cinaslı bayatısını dilə gətirir:
Mən aşıq oda para,
Ay doğdu, o da para...
Varmı bir odu sönmüş,
Odumdan od apara?
Səyyar doğma kəndlərinin ilk, rayonun isə 6-cı şəhididir. Onun sinif yoldaşı Sarvan Məmmədov, Murovdağda itkin düşən Kamal Musayev, Arzu Muradov, Şəfəqli doğumlu, sonradan Qaradağ rayonunda, Lökbatanda yaşamış şəhid Milli Qəhrəman Cəmil Niftəliyev, həmçinin itkin qəbri sonradan Füzuli rayonunda tapılmış Sahib Əsgərov da Birinci Qarabağ müharibəsinin şəhidləridir. Onların hünər yolunu Qızıldaşda yaşamış Zəka Abışov İkinci Qarabağ müharibəsində eyni ləyaqətlə davam etdirib. Bir kəndin yeddi şəhidi dağların baş tacına dönüb.
... Cəmilin 7 yaşı olanda ailələri Lökbatan qəsəbəsinə köçüb və o da orada məktəbə gedib. Tez-tez dağlar diyarına gələr, zirvələrə boylanar, sonra da birnəfəsə dağların başına qalxardı. Elə 1986-cı ildə Sovet Ordusu sıralarına çağrılıb Əfqanıstandakı məhdud kontingentin tərkibində snayperçi kimi qulluq etdiyi dövrdə, o yerlərin dağlıq ərazilərində heç bir çətinlik çəkmədən hərəkət edə bilib, quştək səkə-səkə yerini dəyişib, döyüş tapşırıqlarını bacarıqla yerinə yetirib. Birinci Qarabağ müharibəsi başlananda peşəkar hərbçi kimi yenidən silaha sarılan Cəmil bütün əməliyyatlarda rəşadət göstərib.1992-ci il mart ayının 29-da Ağdamın Şelli kəndi uğrunda gedən döyüşlərdə qəhrəmancasına həlak olub. Beləcə, dağlar oğlu öz ölümü ilə Vətən dağlarını bir boy ucaldıb. Azərbaycan Respublikası Prezidentinin 8 oktyabr 1992-ci il tarixli 264 saylı fərmanı ilə Cəmil Səmədxan oğlu Niftəliyevə ölümündən sonra “Azərbaycanın Milli Qəhrəmanı” adı verilib. Vaxtilə oxuduğu 233 saylı orta məktəb və çalışdığı Yanğından Mühafizə İdarəsinin yanğınsöndürən gəmisi onun adını daşıyır.
Müharibədən salamat qayıtmış Yalçın Məmmədovun döyüş yoldaşları haqqında dedikləri: "Mən Yardımlının Kürəkçi kəndindənəm. 1992-ci il iyunun 27-də səhər çağı rayon hərbi komissarlığından əsgəri xidmətə yola düşdük. Döyüşlərə 8 eloğlu birlikdə Ağdərədə başladıq – mən, Şəfəqlidən Səyyar, Rəfail və Əli, Telavar kəndindən Cavad, Peştəsərdən Elşad, Gavrandan Füzuli, bir də Dağüzü kəndindən Səyyad. Biz piyada qoşunlarının tərkibində idik. Səyyarın nəşini özüm maşına qoyub rayona yola salmışam. Allah bütün şəhidlərimizə rəhmət eləsin. Biz qayıtdıq, onlarsa əbədiyyət səfərinə çıxdılar.
Bir kəndin yeddi şəhidi... Hər birinin igidliyi medallara layiq görülüb. Kənddə kimi dindirsən, onların haqqında ürəklə danışar. Xatirə lövhəsinin lal daşları belə şəhidlərin qəhrəmanlıq hekayəsini səssiz nəql eləyir...
Ötən ayın 27-də Şəfəqli kəndindəki şəhid Səyyar Şabiyev adına tam orta məktəbdə Müstəqillik Günü ilə əlaqədar maraqlı bir tədbir kecirildi. Tədbirə rayon icra hakimiyyətinin nümayəndələri, Milli Məclisin deputatı Musa Qasımlı, “Cənub” döyüş növləri idman klubunun direktoru, Əməkdar məşqçi Samir Həsənov, şair İqbal Nəhmət, şəhid ailələrinin üzvləri, ziyalılar da qatılmışdılar. Öncə Vətən fədailərinin məzarları ziyarət edildi, ruhlarına dualar oxundu. Tədbir Dövlət Himninin səsləndirilməsi ilə başlandı. Şagirdlərin ifasında vətənpərvərlik ruhunda mahnı və şeirlər səsləndi. Hər kəs tədbirdə tükənməz qürur hissi ilə iştirak etdi.
O gün şəhid qardaşlarımız Səyyarın, Arzunun, Sarvanın, Kamalın, Cəmilin, Sahibin və Zəkanın ruhlarının şad olan günü idi deyə, sanki Şəfəqli kəndi daha nurlu, daha şəfəqli görünürdü.
Ə.NƏCƏFXANLI,
“Xalq qəzeti”