Ölkəmizdə səfərdə olan Ukrayna Ali Radasının sədr müavini Olena Kondratyukun rəhbərlik etdiyi nümayəndə heyəti ilə DOST Agentliyində görüş keçirilib. Bu barədə Əmək və Əhalinin Sosial Müdafiəsi Nazirliyindən aldığımız məlumatda bildirilir. Qeyd olunur ki, görüşdən əvvəl nümayəndə heyəti DOST Mərkəzində əhaliyə göstərilən xidmətlərlə tanış olub. Qonaqlar üçün DOST konsepsiyasına, nazirliyin innovativ iş təcrübələrinə, elektron sistemlərinə dair təqdimatlar edilib. 

Görüşdə Əmək və əhalinin sosial müdafiəsi naziri Sahil Babayev Azər­baycan və Ukrayna arasında dostluq münasibətlərinə əsaslanan ikitərəfli əlaqələrin, qarşılıqlı faydalı əmək­daşlığın sosial sahəni də əhatə etdi­yini bildirib. Üç il əvvəl iki ölkənin hö­kumətləri arasında pensiya təminatı və hərbi qulluqçuların icbari dövlət fər­di sığortası haqqında, habelə Əmək və Əhalinin Sosial Müdafiəsi Nazirliyi ilə Ukrayna Sosial Siyasət Nazirli­yi arasında imzalanan əməkdaşlıq sənədlərinin sosial sahədə əlaqələrin inkişafında əhəmiyyəti qeyd olunub. 

Ötən dövrdə əlilliyi olan şəxslərin tibbi-sosial reabilitasiyası sahəsində əməkdaşlıq təcrübəsinin formalaşdığı diqqətə çatdırılıb. Həmçinin keçən il Ukraynada müharibədən əziyyət çək­miş bir qrup ukraynalı uşağın ölkə­mizə gətirilərək reabilitasiya xidmətlə­ri ilə təmin edildikləri bildirilib. 

Azərbaycanda əmək, məşğulluq və sosial müdafiə sahələrində aparı­lan islahatlar, bu sahələrdə innovativ həllərin geniş tətbiqi işləri, DOST kon­sepsiyası, ölkəmizdə əlilliyi olan şəxs­lərə göstərilən reabilitasiya xidmətləri barədə məlumat verilib.

Olena Kondratyuk Azərbayca­na səfərindən və ikitərəfli əlaqələrin inkişafından məmnunluğunu ifadə edib, sosial sahədə islahatlar prose­sində əməkdaşlığın genişlənməsinin önəmini vurğulayıb. Görüşdə sosial müdafiə, pensiya, habelə əlilliyi olan şəxslərin reabilitasiyası sahəsində gələcək əməkdaşlığa dair fikir müba­diləsi aparılıb.

Z.HÜSEYNOVA, “Xalq qəzeti”