Xəbər verildiyi kimi, mayın 12-də axşam saatlarında Ermənistan silahlı qüvvələrinin növbəti sərhəd təxribatı nəticəsində Azərbaycan Ordusunun hərbi qulluqçusu Qarayev Məhəmməd Mahir oğlu şəhid olub.
Şəhidin Azərbaycan bayrağı ilə örtülmüş cənazəsi Qəbələ şəhərinə ailəsinin yaşadığı evə gətirildi. Burada keçirilən ümumrayon vida mərasimində Məhəmməd Qarayevin ailə üzvləri, yaxınları ilə yanaşı, yüksək rütbəli hərbçilər, xidmət yoldaşları, rayon rəhbərliyi, ictimaiyyət nümyəndələri iştirak edirdilər. Çıxış edənlər şəhidin torpaqlarımızın düşmən hücumundan qorunması zamanı döyüşdə həlak olmasını vətənpərvərlik və igidlik nümunəsi kimi dəyərləndirdilər, xalqımıza, doğulduğu Qəbələyə və onu böyüdən ailəyə şərəf, başucalığı gətirdiyiyini vurğuladılar.
Mərasimin sonunda müqədəs Quran surəsi səsləndi, şəhidin ruhuna dualar oxundu. Məhəmməd Qarayevin cənazəsinin büküldüyü Azərbaycan Bayrağı onun atasına təqdim olundu.
Sonra Vətənin sonuncu şəhidinin cənazəsi Qəbələ şəhər qəbiristanlığında torpağa tapşırıldı.
2001-ci ildə anadan olmuş Məhəmməd Qarayev ailənin tək oğlu idi, ali təhsil almışdı. O, hərbi xidmətinin bitməsinə 49 gün qalmış düşmən hücumunun dəf edilməsi zamanı şəhidlik zirvəsinə yüksəldi.
İlqar HƏSƏNOV,
“Xalq qəzeti”nin bölgə müxbiri
Qəbələ
