Bu günlər Qafqazın incisi, mədəniyyət beşiyi gözəl Şuşa qardaş türk xalqlarını bir araya gətirib möhtəşəm bayram ovqatına köklədi. Dünyanın diqqətinin cəmləşdiyi Azərbaycanın bu dilbər guşəsində keçirilən mötəbər “Xarıbülbül” Beynəlxalq Musiqi Festivalında zəngin irsə, dəyərlərə malik türkdilli xalqların öz mədəniyyət və incəsənətini təqdim etmələri olduqca qürurverici haldir. Qarabağın ürəyi olan doğma Şuşanın qoynunda bir-birindən möhtəşəm tədbirlərə şahidlik etdikcə, bu anı on illər boyu çox böyük ümidlə gözləyən hər bir azərbaycanlının qəlbi dağa dönür.
Onlardan biri Şuşada doğulub – böyümüş soydaşımız – “Şuşa” qəzetinin redaktou Vasif Quliyev doğma şəhərdən yenicə qayıdıb. Həmkarımız “Xarıbülbül” festivalı ilə bağlı təəssüratlarını “Xalq qəzeti” ilə bölüşərkən özünü kövrəlməkdən saxlaya bilmədi:
– Şuşada “Xarıbülbül” festivalında dünya azərbaycanlılarının, ümumən, türk xalqlarının nümayəndələrinin ürəyinin döyüntüsünü hiss edirdik. Bizi çuğlayan Vətən duyğularını sözlə ifadə etmək mümkün deyil. Onun üçün gərək əsl azərbaycanlı olasan... Uzun illər qəddar düşmənin tapdağı altında köksünə çalın-çarpaz dağ çəkilən Şuşanın həsrətini, nisgilini sümüyünə, iliyinə qədər hiss edəsən.
Qədim Qarabağ diyarı barədə çoxsaylı kitabların, çoxcildli ensiklopediyanın müəllifi Vasif Quliyev deyir ki, bu günlər Şuşada gedən misilsiz quruculuq işləri ilə tanış olarkən qəribə hisslər keçirib:
– Doğma şəhərimdə sürətlə gedən quruculuq işlərini görəndə çox qəribə hisslər keçirdim. Şuşanın başının müsibətlər çəkməsi qəlbimi ağrıtsa da, şəhərdə aparılan bərpa-quruculuq işləri yaralarıma məlhəm olur. Erməni barbarları ötən illər ərzində vəhşiliklə dağıtdıqları, yer üzündən silməyə çalışdıqları Şuşanın məğrurluğuna, vüqarına xələl gətirə bilməyiblər. Bu gözəl şəhərdə bir dənə də olsun salamat tikili qalmayıb. Sanki, dırnaqları, dişləri ilə şəhəri didib-parçalayıblar, təbiətin də köksünə dağ çəkiblər. Bunu ancaq vəhşi düşmən belə edə bilər. Heç kim öz yurduna, yuvasına, obasına belə divan tuta bilməz. Sanki, Şuşadan onun yurdsevər övladlarının acığını çıxıblar. Müzəffər Ali Baş Komandan İlham Əliyevin 8 noyabr 2020-ci il tarixdə xalqa müraciətində səsləndirdiyi bu fikirləri, az qala, hər gün xatırlayıram: “Əziz Şuşa, sən azadsan! Əziz Şuşa, biz qayıtmışıq! Əziz Şuşa, biz səni dirçəldəcəyik”.
Bu gün əziz sakinlərini doyunca bağrına basan Şuşa elə sürətlə dirçəlir ki, düşmən baxdıqca dərdə düşür. Əminik ki, bizi qarşıda çox böyük zəfərlər gözləyir. İnanırıq ki, gün gələcək belə nüfuzlu tədbirləri Zəngəzurda, Xankəndində keçirəcəyik.
Vasif müəllim Şuşada olarkən böyüyüb boya-başa çatdığı məhəllələri, küçələri, tarixi yerləri qarış-qarış gəzdiyini deyir. Təbiətindən heç zaman doymadığı Şuşanın hər ağacını, kolunu, hər daşını, kəsəyini, doğma torpağının hər qarışını əzizlədiyini, oxşadığını bildirir:
– “Heç bilmirəm Şuşanın ayrılığına uzun illər necə tab gətirmişik. Bu gün hər birimiz gücümüz çatdığı qədər gözəl Qarabağımızın dirçəlməsinə səy göstərməliyik. Ali Baş Komandan İlham Əliyevin rəhbərliyi altında Azərbaycan Ordusu tarixi qələbə qazanaraq torpaqlarımızı düşmən işğalından azad edib. Xalqımızın qəhrəman övladları Azərbaycanın bütövlüyü uğrunda canlarından keçiblər. Çalışmalıyıq ki, bu böyük Qələbəyə, Zəfərə hər birimiz layiq olaq. Əminik ki, Azərbaycan xalqını bundan da böyük qələbələr gözləyir!
Leyla QURBANOVA,
“Xalq qəzeti”
