DOST Rəqəmsal İnnovasiyalar Mərkəzi əhalinin sosial sahə üzrə elektron xidmətlərə dair savadlılığının artırılması üçün bölgələrdə təlimləri davam etdirir. Bu barədə Əmək və Əhalinin Sosial Müdafiəsi Nazirliyindən bildiriblər. Xəbərdə deyilir ki, növbəti təlimlər Göygöl rayonundakı Heydər Əliyev Mərkəzində və Daşkəsən Rayon Mədəniyyət Mərkəzində keçirilib.
Təlimlər Prezident İlham Əliyevin sərəncamı ilə təsdiq edilmiş “Korrupsiyaya qarşı mübarizənin gücləndirilməsinə dair 2022–2026-cı illər üçün Milli Fəaliyyət Planı” üzrə Tədbirlər Planının müvafiq bəndinə əsasən regionlarda əhalinin rəqəmsallaşma istiqamətində bilik və bacarıqlarının artırılmasına xidmət edir.
Qeyd edək ki, ötən aydan başlayan, artıq Bərdə və Füzuli rayonlarında keçirilmiş təlimlərdə yerli sakinlərə sosial sahə üzrə e-xidmətlər və onlardan istifadəyə dair praktik məlumatlar verilir, sualları cavablandırılır. Təlimlər ölkəmizin digər bölgələrində də təşkili ediləcək.
Nazirlikdən, həmçinin bildirilir ki, 2023-cü ilin yanvar-aprel ayları ərzində 58 min 800 pensiya, müavinət, təqaüd təyinatı elektron sistem üzərindən proaktiv qaydada aparılır. Onlardan 12 min 800-ü pensiya, 46 mini müavinət və təqaüd təyinatı olub.
Qeyd edək ki, nazirlik 2019-cu ilin əvvəlindən başlayaraq pensiyaların, sonralar müavinət və təqaüdlərin təyinatını elektronlaşdırılıb. Həmin e-təyinat sistemləri vətəndaşların sosial təminat növlərinə hüquqları yarandığı halda müraciət olunmadan və sənəd təqdim edilmədən müvafiq təyinatların e-sistem üzərindən avtomatik aparılmasına imkan verir.
H.ZƏRİFƏ, “Xalq qəzeti”