Baş Prokurorluğun Azərbaycanda “2023 – Heydər Əliyev İli” çərçivəsində Sabirabad şəhərində keçirdiyi növbəti tədbir “Korrupsiya ilə mübarizədə Heydər Əliyev siyasi irsi” adlı konfransı idi. 

Baş Prokurorluğun qarşısına topla­şıb rayona yola düşdük. Regional konfransda media və QHT nümayəndələri ilə yanaşı, Baş Prokurorluq və Baş prokuror yanında Korrupsiyaya qarşı Mübarizə Baş İdarəsinin, ətraf region prokurorluq­larının məsul əməkdaşları, hüquq-mü­hafizə orqanları və digər dövlət qurum­larının, habelə təhsil müəssisələrinin nümayəndələri də iştirak edirdilər.

Sabirabad Rayon Prokurorluğunun binasında bizi Baş Prokurorluğun Mət­buat xidmətinin böyük prokuroru Kənan Zeynalov qarşıladı. Sabirabad rayon prokurorunun müavini Rövşən Əmrahov inzibati binanın infrastrukturu barədə mə­lumat verdi. Girişdə polislərin dayandığı növbətçi hissə, prokurorun köməkçiləri­nin, müstəntiqin kabinetləri, maddi sübut otağı, kriminalistik avtomobil və avadan­lıqlarla tanış olduq. İstintaq hərəkətlərinin keçirilməsi zamanı müasir texnikadan istifadənin əhəmiyyəti izah olundu. 

Sabirabad rayon Heydər Əliyev Mərkəzində keçirilən konfransdan əvvəl rayonda aparılmış abadlıq-quruculuq işləri, Heydər Əliyev Muzeyində ulu ön­dərin zəngin dövlətçilik irsini, həyat və fəaliyyətini özündə əks etdirən fotostend­lərlə tanış oluruq. Mərkəzin fondunun baş mühafizi Səlmi Mühtiyeva bildirdi ki, Heydər Əliyev Sabirabada 15 dəfə səfər edib, rayonun problemlərininin həllində birbaşa kömək edib. 

Konfransda Baş prokuror yanında Korrupsiyaya qarşı Mübarizə Baş İdarə­sinin rəis müavini Asəf Sarıkişiyev ulu öndər Heydər Əliyevin rəhbərliyi ilə ölkə­mizdə korrupsiyaya qarşı aparılan sis­temli mübarizə, həyata keçirilən əsaslı islahatlar, görülən təşkilati və preventiv tədbirlər, prokurorluq orqanlarının üzə­rinə düşən vəzifələr barədə çıxış etdi. O bildirdi ki, korrupsiya sovetlər dönəmində olduğu kimi, indi də bəlalı problemdir. Rüşvətxorluq kölgə iqtisadiyyatına yol açır, rəqabəti sarsıdır. Korrupsiyaya qarşı mübarizə dövlətin prioritet istiqamətidir. 

Baş Prokurorluğun Mətbuat xidmə­tinin böyük prokuroru Kənan Zeynalov prokurorluğun bölgələrdə konfranslar təşkil etməsindən, təkliflərin dinlənilmə­sindən, Heydər Əliyevin korrupsiyaya qarşı mübarizə sahəsində apardığı isla­hatlardan, tədbirlərdən söz açdı. 

Sabirabad rayon icra hakimiyyətinin başçısı Siraqəddin Cabbarov mötəbər tədbirin Sabirabad şəhərində təşkilindən məmnunluğunu ifadə edərək bildirdi ki, il­lər keçdikcə ulu öndərin dahiliyi, xalqımı­za xidmətlərinin qiyməti artacaq. Xoşbəxt millətik ki, Heydər Əliyev və onun ideya­ları var.

Milli Məclisin deputatı, Baş Prokuror­luğun Anti-Korrupsiya Təlim Mərkəzinin rəhbəri Kamal Cəfərov bildirdi ki, kor­rupsiyaya qarşı mübarizə istiqamətində Heydər Əliyevin qəti siyasi iradəsi Pre­zident İlham Əliyev tərəfindən uğurla davam etdirilir. Ümummilli lider üçün kor­rupsiyaya qarşı mübarizə önəmli məsələ idi. O, korrupsiyanın qarşısının alınması­nı dövlətin, xalqın mənafeyinin qorunma­sı kimi qiymətləndirirdi. 

Sabirabad rayon prokuroru Fəxrəd­din Pənahov qeyd etdi ki, ulu öndər hələ sovetlər dönəmində korrupsiyaya qarşı qətiyyətli mövqeyini ortaya qoymuşdu. Müstəqil Azərbaycana prezidentliyi döv­ründə isə bu mübarizə daha barışmaz oldu. Hazırda bu siyasət Prezident İlham Əliyev tərəfindən müasir metodlarla hə­yat keçirilir.

Rayon məhkəməsinin sədri Füzuli Pənahov, Əmək və Əhalinin Sosial Mü­dafiəsi Nazirliyinin əməkdaşı Elnur Hü­seynov, Ailə, Qadın və Uşaq Problemləri üzrə Dövlət Komitəsinin əməkdaşı Sevil Rəsulzadə, Qeyri-Hökumət Təşkilatları­na Dövlət Dəstəyi Agentliyinin Müşahidə Şurasının üzvü Zaur İbrahimli ulu öndə­rin korrupsiyaya qarşı mübarizə təliminin müxtəlif yönlərindən söz açdılar.

Konfransda rayon sakinləri və qonaq­ların mülahizə və təklifləri də səsləndi.

Xatırladaq ki, Baş Prokurorluq ümum­milli lider Heydər Əliyevin anadan olma­sının 100 illiyi ilə bağlı bundan əvvəl, Gəncə, Lənkəran, Şəki, Gədəbəy, Quba, Bərdə və Zaqatala şəhərlərində də regio­nal konfranslar təşkil edib.

Rizvan FİKRƏTOĞLU,
“Xalq qəzeti”