Sumqayıtda yerli ziyalılar, paytaxtdan və xaricdən gəlmiş qonaqlar tanınmış şair İbrahim İlyaslının anadan olmasının 60 illiyini sevgi-sayğı ilə qeyd etdilər. 

Onun yubileyinə gedərkən xatırla­dım ki, İbrahim İlyaslı həmişə üstündə qələm gəzdirən şairlərdəndir. Bu, yəqin ki, qələmin onun üstündə böyük haqqı olmasından irəli gəlir. Axı şair duy­ğu-düşüncələrin bağlı qapısını məhz qələmi ilə açıb. Elə qələmindən çıxan şeirləri ilə də sevilə-sevilə gəlib ömrün 60-na çatıb. Qələmi fənər kimi yolunu işıqlandırıb. Şair dostum üçün qələm halallıq çeşməsidir:

Bu şeirdə şeytan barmağı varsa, 

Məni bu qələmdən qoru, İlahi! 

Bu poetik duadan təsirlənərək dü­şündüm ki, İbrahimin şeir dünyası da elə halallıq bulağından süzülüb, göllə­nib. Bu əhvalla sənət dostumu təbrik elədim. 

İbrahim İlyaslı on illərdir ki, Sumqa­yıt Poeziya evinə rəhbərlik edir. Prezi­dent təqaüdünə ilk layiq görülənlərdən­dir. “Tərəqqi” medalı ilə təltif olunub. Azərbaycan Yazıçılar Birliyi poeziya bölməsinin rəhbəridir. Türk Ədəbiyyatı Vəqfının fəxri üzvüdür. Nüfuzlu “Qızıl kəlmə” mükafatçısıdır. Türk ölkələrin­dən də dəyərli təltifləri var. “Bu bahar oldu” adlı ilk mətbu şeiri Texniki Univer­sitetin çoxtirajlı qəzetində dərc edilib. Bu uğurlu yolun davamında istedadlı, sözü urvatlandıran şair kimi tanınıb.

Sumqayıt Dövlət Dram Teatrında keçirilən mərasimdə şeir xiridarları bü­tün bunlar barədə geniş söz açdılar. Şəhər rəsmiləri, deputatlar, şair dost­ları, poeziyasevərlər yubiliyarı səmimi təbrik etdilər. Bir şairin ömür hesabatı bir şəhərin sənət bayramına çevrildi.

Əli NƏCƏFXANLI, “Xalq qəzeti”