Türkiyədə baş vermiş dağıdıcı, böyük fəlakətlərə səbəb olan dəhşətli zəlzələ öz ağrısı-acısı ilə insanların ürəyini göynətməkdə davam edir. Zəlzələnin tükürpədən nəticələrinin aradan qaldırılması üçün aylar, illər, bəlkə də on illər lazım olacaq. Lakin itirdiyimiz can itkilərini heç nə qaytara bilməz. Ona görə də hər kəs, ilk növbədə, insan itkisini azaltmaq üçün əlindən gələni edirdi və bu missiya davam edir.
İlk günlərdən 15 nəfərlik tibbi heyətlə zəlzələ bölgələrindən birinə – Kahramanmaraşa yola düşən Azərbaycan Könüllü Həkimlər Assosiasiyası (AKHA) insanların həyatını xilas etmək üçün üzərinə götürdüyü missiyanı şərəflə başa vuraraq Vətənə qayıdıb.
AKHA-nın sədr müavini Hüseyn Hüseynzadə ilə görüşüb öncə təəssüratlarını öyrəndik:
– Bu, dəhşət idi. İnsanların ən ağır travmalarla, dəhşətli diaqnozlarla müraciət etmələri bizə ömrümüzün ən ağır acılarını yaşatdı. Soyuqqanlı olmasaq işimizi tam dəqiqliyi ilə görə bilmərik. Amma biz də insanıq və gördüyümüz acı mənzərədən ürəyimiz parçalanırdı. Türkiyə xalqının yaşadığı dəhşətli mənzərə bizi sarsıtsa da, özümüzü ələ almağa çalışırdıq. Valideynlərini itirmiş uşaqlarla işləmək bizi xüsusilə üzürdü. Əzizlərini itirmiş xəstələrin hər birinin mənəvi yanğısı böyük idi. Onlara həmin məqamda köməyimiz çox vacib idi. Kiminsə həyatını həmin anlarda xilas etməsəydik, o, bəlkə də indi yaşamırdı”.
Assosiasiya Fövqəladə Hallar Nazirliyinin tibb heyəti ilə birgə fevralın 11-dən zəlzələnin baş verdiyi Kahramanmaraşda təbii fəlakət zamanı sağlamlıqlarını itirənlərə, dərin böhran keçirərək çətin durumda olanlara hər cür yardım göstərib, onların normal həyata qayıtması üçün əllərindən gələn dəstəyi verib.
Hüseyn Hüseynzadə Kahramanmaraşda çoxsaylı yaralılara, psixoloji sarsıntılar keçirənlərə kömək etmək üçün səhra tipli hospital yaratdıqlarını söylədi:
– Şəhərin keçmiş Bələdiyyə stadionunun ərazisində hava ilə dolan hərbi çadırlar qurub, Bakıdan gətirilən ləvazimatları, tibbi cihazları quraşdıraraq səhra tipli cərrahi hospital yaratdıq: “Bu, bizim ilk beynəlxalq layihəmiz idi. Hospitalın tərkibində iki cərrahi masadan ibarət blok, 8 çarpayılıq reanimasiya, intensiv palata, 8 adi palata və ambulator şöbə var idi. Özümüzlə Kahramanmaraşa çoxlu tibbi ləvazimat aparmışdıq. Ən çox travmatoloji, psixoloji, terapevtik yardıma ehtiyac var idi. Şəhərin tibb müəssisələri fəaliyyətlərini dayandırmışdılar. Çünki əksəriyyətinin binaları zədələnmiş, ya da dağılmışdı. Hospitala gün ərzində 70-80, bəzən 120-150-yə yaxın insan müraciət edirdi. Həm FHN-in, həm də assosiasiyanın tibb heyəti 24 saat xidmət göstərirdi.
Assosiasiyanın rəhbəri Oqtay Mehdiyevin rəhbərliyi altında təkcə hospitalda 600-700-ə yaxın xəstə qəbul etdik. FHN-in həkimləri ilə birgə isə ümumilikdə 2 minə yaxın xəstəyə yardım göstərdik. Vətən müharibəsi dövründə formalaşıb yaranan assosiasiyamız artıq Qeyri Hökumət Təşkilatıdır. Assosiasiya regionlarda qazi və şəhid ailələrinin qayğıları ilə bağlı layihələr həyata keçirir.
H.Hüseynzadənin sözlərinə görə, şəhərin bir sıra kənd və qəsəbələrində də xeyriyyə aksiyaları təşkil edilib. Assosiasiya üzsvləri regionlara gedərək insanların sağlamlığı üçün vacib olan dərman preparatları paylayıb, onları müayinə ediblər:
– Tibb müəssisələri ilə yanaşı, əczaçılıq və bir sıra həyat əhəmiyyətli obyektlər işləmədiyinə görə, istər yardım, istər dərman preparatları, istərsə də qida ilə bağlı insanlar bizə müraciət edirdilər. Düşünürük ki, Azərbaycan həkimləri şərəfli bir missiyanı yerinə yetirdilər. Bu, bizim Türkiyə xalqına həm də qardaşlıq köməyimiz idi.
Leyla QURBANOVA