1990-cı il yanvarın 20-si Azərbaycan tarixində dönüş nöqtəsi oldu. Həmin soyuq yanvar gecəsində iğtişaşların qarşısını almaq, Konstitusiya quruluşunu qorumaq adı ilə sovet qoşunları Bakıya daxil oldu. Əslində, bu hərbi işğalın məqsədi azərbaycanlıların azadlıq, suverenlik və milli kimliyinin qorumaq istəyindən irəli gələn vətəndaş etirazlarını yatırtmaq idi.
Bu barədə AZƏRTAC-ın müxbirinə müsahibəsində Moldova-Azərbaycan parlamentlərarası dostluq qrupunun sədri Vitali Jakot bildirib.
O, həmin vəhşi əməliyyatda desant və tank bölmələri də daxil olmaqla 26 mindən çox hərbçinin iştirak etdiyini vurğulayıb: “Fövqəladə vəziyyət elan edilmədən şəhərə texnika gətirildi və çoxlu sayda mülki vətəndaşın ölümü ilə nəticələnən toqquşmalar başladı”.
“Rəsmi məlumatlara görə, həmin faciəvi gecədə 147 nəfər ölüb, 700-dən çox insan yaralanıb, onlarla insan itkin düşüb. Ölənlər arasında təkcə fəallar deyil, sadə vətəndaşlar, qadınlar, uşaqlar, tibb işçiləri və jurnalistlər də var. Sadəcə olaraq dinc yaşamaq, səsinin eşidilməsi və öz müqəddəratını təyin etmək hüququna malik olmaq istəyən insanlar haqsız və qəddar zorakılığın qurbanına çevrildilər. Həmin hadisələr xalqın yaddaşında silinməz iz buraxmaqla yanaşı, onun azadlıq və suverenlik əzmini də gücləndirdi. Bu qurbanlar azadlıq və müstəqillik arzusunun rəmzi oldu və hamımıza azad olmaq hüququ üçün bəzən ödənilməli olan yüksək qiyməti xatırlatdı. Azərbaycan xalqı üçün həmin gecə nəinki böyük faciənin, həm də sarsılmaz azadlıq iradəsinin rəmzinə çevrildi. Ağrı və itkilərə baxmayaraq, Qanlı Yanvar milli birliyi möhkəmləndirdi, müstəqillik əldə etmək prosesini sürətləndirdi”, - deyə moldovalı deputat qeyd edib.
Bununla belə, deputat hesab edir ki, belə faciələrin təkrarlanmaması çox vacibdir. Qanlı Yanvar qurbanlarının xatirəsi azadlığın qiymətini, insan hüquqlarını və sülhü müdafiə etməyin zəruriliyini xatırlatmalıdır.
“Bu gün otuz ildən çox vaxt keçsə də biz görürük ki, Azərbaycan xalqı həmin çətin günlərdən necə çıxa bilib, milli kimliyini qoruyub saxlayaraq güclü dövlət qurub. Bu, ruhlandırıcıdır və hamımıza xatırladır ki, xalqın birliyi, ədalət istəyi həmişə qalib gəlir”, - deyə Moldova-Azərbaycan parlamentlərarası dostluq qrupunun sədri sözlərini yekunlaşdırıb.
Emil Hüseynli
AZƏRTAC-ın xüsusi müxbiri
Kişineu
