Aparıcı media qurumlarının birgə bəyanatı 

Ermənistanda insan hüquqlarının pozulması adi hal alıb. Bu baxımdan söz və ifadə azadlığına etinasızlıq faktları da çoxalıb. Aşkar görünür ki, rəsmi İrəvan medianın sərbəst fəaliyyətinə mane olmaqdan çəkinmir. 

Əlbəttə, durumun siyasi tərəfləri də var. Azərbaycanla sərhəd məsələlərinin həlli fonunda yaşanan gərginliyi nəzərdə tuturuq. Söhbət, konkret olaraq, Ermə­nistanın Tavuş bölgəsində başlanmış etirazlar müstəvisində hakimiyyətin jur­nalistlərin informasiya almaq hüquqlarını məhdudlaşdırmaq cəhdlərindən gedir.

Ermənistanın jurnalist təşkilatlarının bir qrupu bəyanat yayaraq, Tavuşda hüquq-mühafizə orqanları əməkdaş­larının media nümayəndələrinə qarşı zorakılığından hiddətlərini bildiriblər. Bəyanata qoşulan qurumların sayı doqquzdur – Söz Azadlığını Müdafiə Komitəsi, İrəvan Mətbuat Klubu, Me­dia Təşəbbüsləri Mərkəzi, İnformasiya Azadlığı Mərkəzi, Çoxtərəfli İnformasi­ya İnstitutu – Ermənistan, İctimai Jur­nalistika Klubu, “Gələcək Jurnalistlər” QHT, “Jurnalistlər İnsan Haqları Uğrun­da” QHT, Goris Mətbuat Klubu.

Göründüyü kimi, adlarını çəkdiyimiz media qurumları Ermənistanın ictimai həyatında kifayət qədər aktiv mövqe tu­turlar. İlk növbədə sual verək: Görəsən, onların yaydıqları bəyanat Qərb insti­tutlarının Ermənistandakı söz və ifadə azadlığı ilə bağlı hesabatlarında əksini tapacaqmı? 

Bəri başdan deyək ki, buna şübhə ilə yanaşırıq. Çünki, bir qayda olaraq, həmin institutlar ölkədə mövcud sahə­dəki vəziyyətə, ümumən insan hüquq və azadlıqlarına etinasızlıqla bağlı duru­ma diqqət yetirmirlər. Axı hakimiyyətdə olan Qərbin öz adamı – baş nazir Nikol Paşinyandır. Yəni, ona siyasi məqsəd­lər naminə bəşəri dəyərləri tapdalamaq icazəsi verilib!

Əlqərəz, anonsunu verdiyimiz bə­yanatda vurğulanır ki, aprelin 27-də Er­mənistanın Tavuş vilayətinin İcevan-Ki­rants avtomobil yolunda maskalı polis media işçilərini aparan maşını saxlayıb, onları ərazidən çıxarıb. Hadisə nəticə­sində “NewDay.am” xəbər saytının ope­ratoru Canibek Xaçatryan əlləri qandallı halda yerə uzadılıb və nəzarətə götürü­lüb. Zərərçəkənin media nümayəndəsi olmasına və həmkarları ilə birlikdə bu­günlərdə baş verən etiraz aksiyalarını işıqlandırdığına dair çoxsaylı xəbərdar­lıqları cavabsız qalıb. Bəyanatda opera­torun bir müddət saxlanıldıqdan sonra sərbəst buraxıldığı da bildirilib.

Sənəddə, həmçinin vurğulanıb ki, həmin gün, yəni aprelin 27-də İrə­van-Tbilisi magistralının Lori rayonu­nun Dseq kəndi hissəsində vətəndaş­ların etiraz aksiyasını dağıdan polis hadisələri işıqlandıran “Oragir.News” saytının əməkdaşlarının peşə fəaliyyə­tinə müdaxilə edib. Nəticədə jurnalist Ani Nerkararyan xəsarət alıb, operator Zaven Ohanyan isə çəkilişləri dayandır­maq məcburiyyətində qalıb.

“Biz, aşağıda imzası olan jurnalist təşkilatları, sərhədin demarkasiyası prosesinə qarşı etirazları işıqlandıran media nümayəndələrinə hüquq-mü­hafizə orqanlarının əməkdaşları tərə­findən zorakılığın tətbiq edilməsin­dən hiddətimizi bildiririk. Biz dərhal xidməti araşdırmanın aparılması və səlahiyyətlərindən sui-istifadə edən polis əməkdaşlarının məsuliyyətə cəlb olunması, o cümlədən təhlükəsizlik qüvvələri tərəfindən jurnalistlərə qarşı çirkin təzyiqlərin aradan qaldırılması ilə bağlı əvvəllər səsləndirdiyimiz tələb­lərimizi təsdiqləyirik. Bundan əlavə, Ermənistan hökumətindən yuxarıda qeyd olunan problemlərin həlli üçün hüquq-mühafizə orqanlarının, jurnalist təşkilatlarının və media nümayəndələ­rinin yüksək vəzifəli şəxslərin iştirakı ilə müzakirələrin təşkilini tələb edirik”, – deyə bəyanatda vurğulanıb. 

Qeyd edək ki, Ermənistanın aparıcı jurnalist təşkilatlarının diqqətə çatdırdı­ğımız birgə bəyanatı hazırda bir hadisə barədə olsa da, məlumdur ki, sözüge­dən qurumlar oxşar sənədləri əvvəllər də yayıblar. Heç şübhəsiz, ölkədə siya­si proseslərin gərginlik fazası güclən­dikcə, media ilə bağlı təzyiqlər də daha aşkar müstəviyə daşınacaq. 

Şübhə etmirik ki, əməkdaşlarının təzyiqə məruz qaldığı bildirilən informa­siya saytları da bu baxımdan fərqlənir­lər. Yəni, mümkündür ki, onların sərhəd zonalarındakı gərginliyi işıqlandırmaq istəkləri manipulyativ xarakter daşıyır. Ancaq, haqqında söz açdığımız amil Ermənistan hakimiyyətinin jurnalist fəaliyyətini məhdudlaşdırmasına bə­raət qazandırmır. İndi görək Qərbdə məsələyə necə qiymət veriləcək. Prinsi­pial yanaşılıb söz və ifadə azadlığı əsas götürüləcək, yoxsa siyasi amillər? Ob­yektiv qiymətin veriləcəyinə, Paşinyan hakimiyyətinin qınanılacağına şübhə edirik. 

R.ƏVƏZ
XQ