Yaxud balaca Robertin böyüməyəcək arzularına rekviyem əvəzi
ABŞ-da seçkiqabağı mühit dinamik olur. Bu dinamikliyə rəng qatan namizədlərdir. Onların içərisində isə mütləq bir bambılı tapılır. Ancaq əvvəlki dövrlərlə müqayisədə hazırda bambılıların sayı bir deyil, ikidir. Birincini tanıyırsınız. Söhbət hind əsilli Vivek Ramasvamidən gedir. 38 yaşlı Vivekin erməni təəssübkeşi olduğu məlumdur. Ancaq bu yazıda biz ikinci bambılıdan söz açacağıq.
Yəqin, Kennedi soyadı hər kəsə yaxşı məlumdur. O da məlumdur ki, ABŞ prezidenti olmuş Con Kennedi 1968-ci ildə sui-qəsd nəticəsində qətlə yetirilmişdi. İndi həmin Kennedinin qardaşı oğli kiçik Robert Kennedi ABŞ-ın dövlət başçısı olmağa iddialıdır. Roma papasından daha çox katolik olmağa da, həmçinin. Yəni, o, ermənilərin özündən də betər erməniyə çevrilməyi hədəf seçib. Bambılılıq da elə bundadır.
Beləliklə, kiçik R.Kennedi özünün “X” sosial şəbəkəsindəki hesabında bildirib ki, “ABŞ hökuməti beynəlxalq ictimaiyyəti Qarabağ ermənilərinin öz ata-baba yurdlarına təhlükəsiz qayıtmalarını təmin etmək və ərazinin öz müqəddəratını təyin-etmə hüquqlarını qorumaq üçün addımlar atmağa səfərbər etməlidir”.
Əlbəttə, Azərbaycan cəmiyyəti üçün ABŞ prezidentliyinə namizədlərin erməni təəssübkeşliyi tanış mənzərədir. Hazırkı Prezident Cozef Baydenin də bir vaxtlar bu sayaq davrandığının şahidinə çevrilmişdik. Ancaq, bir qayda olaraq, erməni qövmündə illüziya yaradan belə fikirlər sonradan gerçəkliklə uzlaşmır və haylarda dərin xəyal qırıqlığı yaradır. Heç şübhəsiz, R.Kennedi də prezident seçiləcəyi təqdirdə, vəziyyət göstərdiyimiz kimi olacaq. Əsas məsələ isə bu cür məsuliyyətsizlərin Birləşmiş Ştatlarda ali vəzifə tuta bilməsidir. Görünür, ABŞ liberalizmi özünün deqredasiya mərhələsini yaşamaqdadır...
R.Kennedinin, görünür, tarix bir yana, beynəlxalq hüquqdan belə anlayışı yoxdur. Xəbəri yoxdur ki, qədim Azərbaycan torpağı olan Qarabağ, həm də beynəlxalq hüquqla ölkəmizin ərazisidir və təmsil etməyə çalışdığı ölkə Azərbaycanın ərazi bütövlüyünü və suverenliyini tanıyıb. Görünür, Birləşmiş Ştatlardakı erməni lobbi və diaspor təşkilatlarının təmsilçiləri onun beynini necə doldurublarsa, bu prinsipləri saymazdan gəlir. Saymazdan gəlir və onların tirtajladıqları tezisləri təkrarlayır. Məsələn, bildirir ki, guya, Azərbaycan 2020-ci ildən başlayaraq, Qarabağ ermənilərinə qarşı amansız etnik təmizləmə siyasəti aparmaqdadır. Daha sonra isə çərənləyir ki, bu ilin sentyabrında Azərbaycan hücuma başlayıb və 120 minlik erməni əhalisini bütünlüklə qovub. Çox güman, antiterror tədbirlərinin bitdiyindən xəbərsizdir. Gələn çıxışlarında “qəhrəman artsaxlıların” Azərbaycana qarşı hələ də mübarizə apardıqlarını, döyüşdüklərini yazsa, qətiyyən təəccüblənmərik. Ağzına gələni deyə, təfəkkürününün ən mücərrəd guşəsində bəslədiyi primitivliyi yazıya çevirə, hər cür məsuliyyətsiz bəyanat səsləndirə bilər. Axı, ABŞ prezidentliyinə namizəddir...
Göründüyü kimi, kiçik Kennedi məsələyə daha “sistemli” yanaşmaqdadır. Hiss olunur ki, erməni lobbisi onu yaxşı təlimatlandırıb. Hər halda, Qarabağı “ən qədim erməni ərazisi” adlandırması sıradan bir deyim sayıla bilməz. Onun “sistemli” yanaşması baxımından növbəti detal erməni məsələsini İsrail–HƏMAS müharibəsindən üstün tutmasıdır. Üstün tutur və ittiham yağdırır. Sən demə, dünya “ermənilərin Qarabağdan qovulmalarına” biganə münasibət bəsləyirmiş. Bu, tipik erməni avantürizminin zay məhsulu olan ifadədir.
Ardınca R.Kennedi obrazlı desək, barıtı bir qədər də artırır və təxminən belə bir fikir işlədir: Qarabağdakı etnik təmizləməni boş-boş pisləmək kifayət deyil, durumu köklü şəkildə dəyişmək üçün sözdən əmələ keçmək şərtdir. “Bu, dinc sanksiyaların işə yaraya biləcəyi bir vəziyyətdir. Birləşmiş Ştatlar bu regionda hələ də təsir rıçaqlarına malikdir və o, bu gücdən humanitar faciəni aradan qaldırmaq, regiondakı bütün xalqları səfərbər etmək üçün istifadə edə bilər”.
Hər şey bir yana, görəsən, ABŞ regiondakı hansı xalqları Azərbaycana qarşı səfərbər edəcəkmiş? Bu adamın Cənubi Qafqazdan, deyəsən, heç xəbəri yoxdur və bu təfəkkür sahibi Birləşmiş Ştatların prezidenti olmağa iddialıdır. Həqiqətən, çox gülünc mənzərədir. Daha gülməlisi isə kiçik R.Kennedinin Ermənistanın dənizə çıxışının təmin edilməli olduğuna dair yazdıqlarıdır. Belə getsə, adam “dənizdən dənizə böyük Ermənistan” qurmaqdan da söz salacaq.
Amma hələlik bildirir ki, Amerika Türkiyə və Azərbaycan tərəfindən Ermənistanın blokadasını aradan qaldırmağın yollarını axtarmalıdır. Sən demə, dənizə çıxışı olmayan Ermənistanın qonşu ölkələrin limanlarına çıxışı olmalıdır. Elementar sual yaranır: qonşu ölkələr Ermənistana öz limanlarından istifadə imkanı yaratmırlarsa, buna ABŞ nə edə bilər? Ümumiyyətlə, nə isə edə bilərmi? Hələ biz soruşmuruq ki, Ermənistan öz problemini niyə özü həll etmir? Görünür, ona görə həll etmir ki, kiçik R.Kennedinin ABŞ prezidenti seçilməsini gözləyir. Gözləyir ki, bu şəxs Ermənistanın başının üstündəki “qara buludları dağıtsın”. Axı, adam əminlik yaradır: ABŞ prezidenti postuna seçilsəm, Ermənistan Respublikasının və Qarabağın bərpasına töhfə verəcəm.
Əlbəttə, cənab Kennedi Qarabağın bərpasına töhfə verməyi çox arzulayırsa, ona şərait yaratmaq mümkündür. Yəni, bunun üçün zəhmət çəkib ABŞ prezidenti olmağına heç bir ehtiyac yoxdur. Məsələn, gəlib Qarabağdakı tikinti briqadalarının birində palçıq qarışdıran işləyə bilər. Onsuz da bu ağılla başqa işə yaramaz. Əbəs yerə dünyanı, xüsusən də Cənubi Qafqazı qarışdırmağa çalışmasın. Qarışdırmaqdan söz düşmüşkən, R.Kennedi Ermənistana və “Qarabağın müstəqilliyinin tanınmasına” necə kömək göstərəcəyindən də yazıb. Sən demə, bunun üçün diplomatiyadan, iqtisadi rıçaqlardan, sanksiyalardan və ABŞ-ın mənəvi nüfuzundan istifadə edəcəkmiş. Mənəvi nüfuz – bu da təzə çıxdı, deyəsən.
Amma güman edirik ki, namizədin bir sözü ermənilərin xoşuna gəlməyəcək. O, ən sonda deyir ki, Qarabağa və Ermənistana kömək üçün dinc vasitələrdən yararlanacaq. Bu boyda odlu-alovlu danış-danış, axırda da de ki, dinc vasitələrdən yararlanacam. Heç şübhəsiz, bu mətni oxuyan sıravi erməni avantüristi, heç nə bildirməsə də, əlini əlinə vurub bu sözü mütləq deyəcək: “Ayə, sən Allah bəsdi, boş-boş danışma!”.
Sonda xatırladaq ki, ABŞ-da prezident seçkiləri 2024-cü il noyabrın 5-nə təyin edilib. Güman edirik ki, kiçik R.Kennedi o zamanadək özünün erməni sevdasının təsviri baxımından daha “fundamental yeniliklərə” imza atacaq. Yəni, hələ vaxta var. Təkrar düşünmək, düz yola qayıtmaq üçün də həmçinin.
Əvəz RÜSTƏMOV
XQ