2020-ci il sentyabrın 27-də Ermənistan silahlı qüvvələrinin cəbhəboyu genişmiq­yaslı təxribat törətməsinə cavab olaraq Azərbaycan Ordusu sonradan “Dəmir yumruq” adlandırılan əks-hücum əməliy­yatına başladı. 44 gün davam edən Vətən müharibəsi 30 illik işğala son qoyulma­sı və ərazi bütövlüyümüzün bərpası ilə nəticələndi. Müzəffər Ali Baş Komandan İlham Əliyevin rəhbərliyi ilə qazanılmış möhtəşəm Zəfər tariximizə qızıl hərflərlə yazıldı.

Vətən savaşının ilk günündə–sent­yabrın 27-də Azərbaycan Respublikası­nın Müdafiə Nazirliyi Ermənistan silahlı qüvvələrinin saat 6 radələrindən etibarən genişmiqyaslı təxribatlar törədərək or­dumuzun cəbhəboyu zonada yerləşən mövqelərini və yaşayış məntəqələrimizi iriçaplı silahlar, minaatanlar və ağır ar­tilleriya qurğularından intensiv atəşə tut­ması barədə məlumat yaydı. 

Saat 12 radələrində Azərbaycan Prezidenti İlham Əliyev xalqa müraciət etdi. Dövlətimizin başçısı müraciətində sentyabrın 27-si səhər Ermənistan si­lahlı qüvvələrinin bir neçə istiqamətdən müxtəlif növ silahlardan, o cümlədən ağır artilleriyadan istifadə edərək yaşa­yış məntəqələrimizi, eyni zamanda, hərbi mövqelərimizi atəşə tutması, mülki əhali və hərbçilərimiz arasında itkilər, yarala­nanların olması barədə məlumat verdi. Dövlətimizin başçısı Silahlı Qüvvələrimi­zin düşmənin hərbi mövqelərinə atəşlər, zərbələr endirdiyini və bunun nəticəsində düşmənin bir çox hərbi texnikalarının sı­radan çıxarıldığını bildirdi.

Günorta saatlarında isə Türkiyə Res­publikasının Prezidenti Rəcəb Tayyib Ər­doğan Prezident İlham Əliyevə telefonla zəng etdi. Qardaş ölkənin dövlət başçısı Türkiyənin həmişə olduğu kimi, bu ağır gündə də Azərbaycanın yanında olduğu­nu vurğuladı.

Vətən müharibəsinin ilk günündə Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin sədrliyi ilə Təhlükəsizlik Şurasının iclası keçirildi. Dövlətimizin başçısı Ermənistan silahlı qüvvələrinin təxribatlarının qarşısının alınması ilə bağlı verdiyi göstərişlər əsasında ordu­muzun genişmiqyaslı əks-hücum əmə­liyyatına başladığını elan etdi. İclasda Azərbaycan Ordusunun uğurlu əks-hü­cum əməliyyatı nəticəsində düşmənin ön xəttinin yarıldığı, altı kəndin– Qaraxan­bəyli, Nüzgar, Yuxarı Əbdürrəhmanlı, Böyük Mərcanlı, Kənd Horadiz, Qərvənd yaşayış məntəqələrinin işğaldan azad edilməsi barədə xalqımıza ilk müjdə ve­rildi.

Sentyabrın 27-si saat 19 radələrində Prezident İlham Əliyev ölkəmizdə hərbi vəziyyətin elan edilməsi haqqında fər­man imzaladı. Fransa Respublikasının Prezidenti Emmanuel Makron dövlətimi­zin başçısına telefonla zəng etdi. Saat 18:30-da isə Müdafiə Nazirliyi cəbhənin Goranboy istiqamətində qoşunlarımı­zın keçirdiyi hərbi əməliyyat nəticəsində Murov dağı silsiləsindəki Murov zirvəsi­nin azad olunması barədə məlumat yay­dı.

Müharibənin ikinci günündə isə Prezident İlham Əliyevin sərəncamına əsasən, Azərbaycan Respublikasında qismən səfərbərlik elan edildi, komen­dant rejimi qüvvəyə mindi. Silahlı Qüv­vələrimizin uğurlu əməliyyatı nəticəsində Murovdağ zirvəsi işğaldan azad olundu, mühüm əhəmiyyətə malik Basarkeçər–Ağdərə avtomobil yolu Azərbaycanın nə­zarətinə keçdi. 

Vətən savaşının ilk günlərindən Er­mənistanın bu müharibəyə çoxdan ha­zırlaşdığı, işğalçı ordusunun tərkibində bir sıra xarici ölkələrdən cəlb etdiyi dö­yüşçülərin olduğu da üzə çıxdı. Müdafiə Nazirliyi mətbuat xidmətinin sentyabrın 28-də yaydığı məlumatda Ermənistan tərəfinin itkiləri arasında Suriya və Yaxın Şərqdən gətirilən erməni əsilli muzdlula­rın da olması bu faktın təsdiqi idi. 

Müharibənin ikinci günündə, eyni zamanda, Tərtər rayonunun Talış kəndi ətrafındakı əlverişli yüksəkliklər düşmən­dən təmizləndi, işğalçı ordunun xeyli sayda canlı qüvvəsi məhv edildi. Ağdərə istiqamətində düşmənin artilleriya böl­mələrinə zərbələr endirildi, düşmən geri çəkildi. İşğalçının iki tankı, xeyli qüvvəsi , çoxlu sayda digər hərbi texnikası məhv edildi. Bütün bunlarla bərabər, ordumuz tərəfindən işğalçının 3 silah–sursat an­barı, onlarla texnikası və 550-dən çox canlı qüvvəsi sıradan çıxarıldı. 

Sentyabrın 28-də, həm də BMT-nin Baş katibi Antonio Quterreşin təşəbbü­sü ilə Prezident İlham Əliyev arasında videokonfrans formatında görüş keçirildi. Dövlətimizin başçısı Baş katibə Ermənis­tanın Azərbaycana qarşı törətdiyi hərbi təxribatla bağlı hadisələrin gedişinə dair məlumat verdi. 

Ölkə rəhbəri söhbət zamanı Antonio Quterreşə sentyabrın 27-də Ermənistan təmas xətti boyunca Azərbaycan Silah­lı Qüvvələrinin mövqelərini və yaşayış məntəqələrimizi ağır artilleriyadan atəşə tutduğunu və bunun nəticəsində mülki şəxslərimizin və hərbi qulluqçularımızın həlak olduqlarını diqqətə çatdırdı. Pre­zident İlham Əliyev yalnız bundan son­ra Azərbaycan tərəfinin özünümüdafiə məqsədilə uğurlu əks-hücum əməliyyat­larına başladığını vurğuladı. 

Dövlətimizin başçısı BMT-nin Baş katibi ilə söhbətində Ermənistan tərəfi­nin belə hərbi təxribatları davamlı olaraq törətdiyini də xatırladıb. Bildirib ki, işğalçı ölkə 2020-ci ilin iyul ayında Azərbaycan–Ermənistan dövlət sərhədində buna ox­şar təxribat həyata keçirib, avqust ayında isə erməni diversiya dəstəsi təmas xət­tini keçməyə cəhd edib. Eyni zamanda, Ermənistan Azərbaycanın işğal olunmuş ərazilərinə başqa ölkələrdən xarici vətən­daşların qanunsuz məskunlaşmasını hə­yata keçirib ki, bu da Cenevrə Konven­siyasına görə beynəlxalq hüququn ciddi pozulmasıdır.

XQ