Vasitəçilikdə israr və Ermənistana xəbərdarlıq
Deyəsən, Avropa İttifaqı Şurasının prezidenti Şarl Mişel Azərbaycan və Ermənistan arasındakı danışıqlarda vasitəçi olduğunu yada salıb. Hər halda onun susqunluğu pozmasını, ilk baxışdan, məhz belə qiymətləndirmək mümkündür. Ancaq cənab Mişel susqunluğunu bir qədər fərqli formada pozub. “Azadlıq” radiosunun Brüsseldəki mənbəyinə inansaq, o, “Dağlıq Qarabağ hakimiyyəti” nümayəndələrini Azərbaycanla mümkün qədər tez dialoqa başlamağa çağırıb.
Əlbəttə, Mişelin “Dağlıq Qarabağ hakimiyyəti” kimi ifadələrdən istifadə edib-etmədiyini, bu ifadənin “Azadlıq” radiosunun öz məhsulunun olub-olmadığını söyləmək çətindir. Onun “Bakı–Xankəndi dialoqu” formulunu dilinə gətirib-gətirmədiyini demək də, həmçinin. Ş.Mişel məsələyə bu tərzdə yanaşıbsa, deməli, səhv edib...
Ancaq düşünək ki, Aİ Şurası Prezidenti səhvə yol verməz. Ən azından ona görə ki, özünün vasitəçiliyi ilə keçirilmiş görüşlərin, bütövlükdə təşəbbüskarı olduğu platformanın, hələlik Azərbaycan–Ermənistan nizamlaması baxımından ən uğurlu sayıldığını yaddan çıxarmaz. Bu şəxsin qısa müddətdə erməni lobbi və diaspor təşkilatlarının təsirinə düşüb mövqeyini dəyişəcəyinə dair ehtimal da azdır. Çünki Avropanın, eləcə də Aİ-nin, belə demək mümkünsə, klassik ermənipərətləri var. Sahə kifayət qədər ciddi monopoliyadadır.
Digər tərəfdən, ermənipərəstlik baxımından Ş.Mişelə ehtiyacın duyulmadığı fikrindəyik. Ən əsası isə cənab Mişelin sadəcə ağıllı adam olduğunu qənaətimiz var. Axı, ağıllı adam Azərbaycan Prezidenti İlham Əliyev kimi liderin ona inam və etimadını, vasitəçilik missiyasına verdiyi dəyərini hansısa avantüraya dəyişməz. O zaman düşünək, görək, Aİ Şurasının Prezidenti səssizliyi nə üçün pozub?
***
Əlbəttə, Ş.Mişel barədə eyhamlı söz açmağımız heç də təsadüfi deyil. Əvvəla, yuxarıda qeyd etdiyimiz fikirlər var və həmin fikirlərin deyiliş tərzini şübhələndirdik. İkincisi, “Azadlıq” radiosundakı mənbə iddia edir ki, Aİ Şurasının prezidenti Azərbaycanı Beynəlxalq Cinayət Məhkəməsinin qərarına sayğı göstərməyə, Laçın yolunu açmağa çağırıb.
Hər halda, Azərbaycan – Ermənistan şərti sərhəddinin, yəni Həkəri çayı üzərindəki nəzarət-buraxılış məntəqəsinin açıqlığı, oradan hər gün dinc ermənilərin keçdiyi cənab Mişelə agah olmamış deyil. Çox güman ki, o, hər gün sərhəddən keçənlərin mövcudluğunu bildiyi halda, məntəqənin bağlı qaldığı barədə bar-bar bağıran sarsaq siyasi qövmün varlığından da xəbərdardır. O zaman nəyə görə erməniləri müdafiə edənlərin cərgəsinə qoşulsun ki? Nə üçün avantüristlərin axmaq ritorikasını təkrarlasın?
Bütün bunları əsas götürərək və Aİ Şurası prezidentinin ağıllı adam olduğunu düşünərək, onun həmçinin Azərbaycan tərəfinin digər marşrutlar, o cümlədən Ağdam vasitəsilə humanitar yardım göstərməyə hazır olduğunu vurğulamasının üzərində dayanaq. Üzərində dayanmaq istədiyimiz növbəti məqam Mişelin “Brüsselin Bakı ilə İrəvan arasında danışıqlardakı tərəfsiz və dürüst vasitəçi olmaqda davam etdiyini” bildirməsidir.
***
Birinci məqam. Aİ Şurasının prezidenti Ağdam vasitəsilə Qarabağ ermənilərinə humanitar yardım məsələsini Azərbaycan və Ermənistan liderlərinin danışıqlar gündəliyinə gətirən şəxsdir. Yada salaq ki, o, Prezident İlham Əliyevlə baş nazir Nikol Paşinyan arasında iyulun 15-də Brüsseldə keçirilmiş görüşdən sonra mətbuata bəyanatında bu barədə söz açmışdı. Həmin vaxt erməni ictimai rəyi Mişelin bildirdiklərini, bir növ, süngü ilə qarşılamışdı. Elə indi də Ermənistan rəhbərliyi, habelə Qarabağdakı separatçı rejim Ağdam–Xankəndi yolunun açılmasına maneçilik törədir. Onların isterikasına rəng qatan xaricdəki ermənipərəstlər isə bildirirlər ki, bu yol Laçın yoluna alternativ kimi qiymətləndirilə bilməz. Ancaq Mişelin hazırkı açıqlaması onu göstərir ki, Azərbaycan tərəfinin irəli sürdüyü məsələ Aİ-nin gündəmindədir.
İkinci məqam. Əlbəttə, Ş.Mişel, həmçinin digər vasitəçilər Ermənistanın avqustun 16-da BMT-nin Təhlükəsizlik Şurasının iclasına daşıdığı Qarabağda humanitar böhran şousuna reaksiya verməmişdilər. Bildirməmişdilər ki, bu şou onların gündəliyinə ziddir. Deməmişdilər ki, İrəvan belə hərəkətlərlə danışıqlar prosesinə əks mövqe ortaya qoyur, yeni reallıqlar formalaşdırmağa cəhd göstərir.
Ancaq bunları vurğulayacaq ən birinci şəxs məhz Ş.Mişeldir. Çünki onun missiyası sülhə aparan ən uğurlu təşəbbüsdür. Axı, Ermənistanın konstruktivliyə meyilliliyi Aİ platformasında nəzərə çarpıb. Baş nazir N.Paşinyanın Qarabağ da daxil olmaqla, Azərbaycanın ərazi bütövlüyünü tanıdığını dilə gətirməsi, həmin platforma çərçivəsindəki səylərin nəticəsi kimi qiymətləndirilib. Birdən-birə BMT tribunasına çıxarılan məsələ isə Ş.Mişelin əməyinə aşkar hörmətsizlikdən başqa bir şey deyildi. Cənab Mişel susmaqla o hörmətsizliyi cavabsız qoydu. Eləcə də digər vasitəçilərin susqunluğunu mövcud kontekstdən dəyərləndirmək üçün əsaslar var. Çünki susmaq həm də razılıq əlamətidir...
Onu da vurğulayaq ki, həm Ş.Mişel, həm də ABŞ və Rusiya sakit qalaraq erməni avantürizminin növbəti “seansının” baş tutmasına razılıq vermiş oldular. Əslində, buna tam mənada razılıq demək doğru sayılmaz. Onlar, sadəcə, Ermənistana şans yaratdılar ki, sonuncu gülləsini atsın. Əgər bu güllə hədəfə dəysəydi, yəni, BMT Təhlükəsizlik Şurası qətnamə çıxarsaydı, o zaman, şübhəsiz ki, ona istinad edəcəkdilər. Necə ki, indi Ş.Mişel Beynəlxalq Cinayət Məhkəməsinin qərarına istinaddan, daha doğrusu, qərara əməl olunmasından danışır.
***
Haşiyə çıxaq ki, BCM-in qərarı mübahisəyə açıqdır. Çünki konkret deyil və Azərbaycanla Ermənistan arasında konkret sərhəd xətti olacaqsa (olmalıdır – red.), o zaman həmin qərarın əhəmiyyəti tamamilə itir. Digər yandan isə BCM, faktiki olaraq, sözügedən qərarına zidd addım atıb. Qurum Ermənistanın Azərbaycanın Laçın–Xankəndi yolunda qurduğu postun ləğvi məqsədilə qaldırdığı iddianı rədd edib. Hazırda sərhəd məntəqəsinin fəaliyyəti Azərbaycan qanunvericiliyinə uyğun tənzimlənir və erməni sakinlər müvafiq qaydada ondan istifadə imkanındadırlar. Yəni, tərəfsiz vasitəçi olduğunu bildirən Ş.Mişelin buna diqqət yetirməsi, durumu nəzərə alması mütləqdir. Ən azı ona görə ki, erməni avantüristlər bunu əllərində bayrağa çevirirlər və sonra Aİ Şurasının prezidenti özünün də bildirdiyi kimi, dürüst olmaq istəsə, həmin başıpozuqlar məsələyə riyakarlıq adı qoyacaqlar. Fikrimizcə, cənab Mişel heç nədən, yumşaq desək, tənqid hədəfinə çevrilmək istəməz...
***
Bəli, rəsmi İrəvanın BMT müstəvisində çıxardığı oyun nəticə vermədi və hazırda Ş.Mişelin açıqlaması Azərbaycan–Ermənistan danışıqlar prosesinin qaldığı yerdən davamına çağırışdır. Bakı, şübhəsiz, çağırışa müsbət yanaşır. BMT-dəki erməni şousunu susqunluqla qarşılamaq Aİ-nin vasitəçilik missiyasının səmimiliyinə inamı azaltsa da, ölkəmiz həm belə prinsipsiz yanaşmaları çox görüb öyrəncəli olduğundan, həm də ümumən Cənubi Qafqazda ədalətli sülhün formalaşmasına can atdığından, dövlətimizin Mişelin təşəbbüsünü nəzərə alacağını söyləyə bilərik. Bəs Ermənistan?
Rəsmi İrəvanın təmsilçiləri, demək olar, hər gün anti-Azərbaycan çağırışlar səsləndirməklə, ölkəmizin nüfuzuna xələl gətirməyə hesablanmış “gedişlərə” baş vurmaqla, Aİ-nin, yenidən start götürməsinə ümidlərin yarandığı, sülh missiyasına tam etinasız münasibət bəslədiklərini göstərirlər. Yəni, Ermənistandakı hazırkı ovqat Azərbaycanla danışıqlar perspektivini doğurmur. Əksinə, belə təəssürat yaranır ki, İrəvanın BMT-də atdığı sonuncu güllənin boşa çıxması, erməni ictimai rəyini qəzəbləndirib və vəziyyətdən yeganə çıxış yolu üçüncü müharibədir...
***
Nəhayət, Ş.Mişelin əvvəldə diqqətə çatdırdığımız fikrindən söz açaq. Söhbət Bakı–Xankəndi dialoqu kimi sırınan və Aİ Şurası prezidentinin dilindən səsləndiyi iddia edilən məsələdən gedir. Bununla bağlı fikirlərimizi yuxarıda diqqətə çatdırdıq. Əlavə olaraq, eyni zamanda, cənab Mişelin dialoq dedikdə Qarabağın erməni icmasının nümayəndələri ilə Azərbaycanın təmsilşilərinin görüşünü nəzərdə tutduğuna inanaraq bildirək ki, Ermənistan və Qarabağdakı separatçı rejim ölkəmizin xoşməramlı təkliflərini geri çevirmək üzrə “püxtələşib”. Bu iki kəsim BMT TŞ-dəki müzakirədən əvvəl toplantının xeyirlərinə yekunlaşacağı fikrinə qapılıb, Yevlaxda planlaşdırılmış təması pozdular. İndi isə bəyan edirlər ki, Bərdə görüşünə razı deyillər.
Belə olan təqdirdə cənab Mişel də, deyəsən. “güllələrini” havaya atana birinə çevrilir. Halbuki, Ermənistanın Aİ Şurasının Prezidentinin çağırışına həssas yanaşması lazımdır. Çünki Mişel dialoqdan söz açarkən, prosesin mümkün qədər tez reallaşmasının zəruriliyini bildirib. Hesab edirik ki, sırf “mümkün qədər tez” ifadəsi yalnız çağırış deyil, eyni zamanda, İrəvan, ümumilikdə, erməni avantürizmi üçün xəbərdarlıqdır. Axı, Azərbaycanın səbrinin tükənməyə doğru getdiyi beynəlxalq ictimaiyyətə çox yaxşı məlumdur.
***
Sonda bildirək ki, hər bir halda Aİ Şurasının prezidenti Ş.Mişelin susqunluğu pozması müsbət haldır. Bu, onu göstərir ki, qurum özünün vasitəçilik missiyasında israrlıdır. Digər tərəfdən, Ş.Mişelin açıqlaması təşkilatın mümkün vasitəçilik rəqabətini əlindən buraxmadığının da təsdiqidir.
Onu da nəzərə alaq ki, Aİ-nin vasitəçilik baxımından bəlli gündəliyi var. Həmin gündəliyə əsasən, Azərbaycan və Ermənistan liderləri sentyabrda görüşməlidirlər. Onu da nəzərə alaq ki, sentyabr görüşünün baş tutması Aİ-nin iki Cənubi Qafqaz ölkəsi arasındakı münasibətlərin normallaşmasına yönələn səylərinin məntiqi və ədalətli yekununa doğru irəliləməsi baxımından son dərəcə önəmlidir.
Ə.CAHANGİROĞLU, “Xalq qəzeti”