Dəfələrlə bildirmişik ki, dünyanın müxtəlif qüvvələri ermənipərəst mövqe tutanda, Ermənistan hakimiyyəti reallıqlardan uzaqlaşır və illüziyalara qapılır. Nəticədə destruktiv mövqe tutur ki, bu da elə sülh təşəbbüslərinə ziyan vurur. 

Nəzərə alsaq ki, Fransa Azərbay­can-Ermənistan münasibətlərinin tənzim­lənməsi prosesindən kənardır, Parisin erməni avantürizminə impuls verməsini, müəyyən mənada başa düşmək müm­kündür. Bəs, Rusiya? Axı ölkə mövcud nizamlamada yer alır və çalışır ki, aktivlik göstərsin. Buna nə dərəcədə nail olur, onu deyə bilmərik. Fakt budur ki, Kremlin cəhdləri var. 

Ancaq onu da görürük ki, hazırda Moskva, necə deyərlər, öz oturduğu bu­dağı kəsməklə məşğuldur. Yəni, o da Fransa kimi, Ermənistan hakimiyyətinin ocağına odun qoymaq yolunu tutur. O Ermənistanın ki, Rusiyanın tənzimləmə missiyasını heçə endirmək üçün dəri­dən-qabıqdan çıxdığı aşkardır. Konkret olaraq desək, erməni ocağına odun qo­yan isə Rusiyanın Xarici İşlər Nazirliyidir, XİN-in rəsmi nümayəndəsi Mariya Zaxa­rovadır. Xanım sözçü bir neçə gün əvvəl bildirib ki, bəs, Azərbaycan tərəfinin Laçın dəhlizinə girişi bağlaması, guya Rusiya, Azərbaycan və Ermənistan liderlərinin 10 noyabr 2020-ci il tarixli üçtərəfli Bəyanatı­nın müddəalarının pozulmasıdır. 

Əlbəttə, Zaxarovanın qeyri-obyektiv fikirlərlə gündəmə və qınağa tuş gəlmə­si ilk dəfə deyil ki, baş verir. Belə ermə­nipərəst düşüncələrdən sonra təşəkkür əvəzi Ermənistanın Rusiyanı qınamaq üçün təzə nələrisə tapması da çox olub. Yəni, son dövrlər İrəvanda heç kəs Mosk-vanın rəsmi təmsilçilərinə ermənipərəst­liyə görə medal verməyib. Deməli, xanım Zaxarovanın, belə demək mümkünsə, si­yasi şirinliyinə ehtiyac yoxdur. 

Ancaq onun vəziyyəti düzgün qiy­mətləndirməsi şərtdir. Yuxarıda vurğu­ladığımız məqama görə. Həm də o sə­bəbdən ki, erməni dəyirmanına su tökən açıqlamalar, sonradan Rusiyanın da ma­raqlı olduğu Cənubi Qafqaz regionunda yeni reallıqlar formalaşdırmaq cəhdlərini doğurur ki, bir qayda olaraq, bu siyasi düzən düşüncəsində Rusiya üçün yerin nəzərdə tutulmadığı faktdır. Ermənistan hakimiyyəti Rusiya rəsmilərinin onlara ötürdükləri pası dəyərləndirmək yerinə, bunun yaratdığı üstünlüyü Qərb platfor­masına daşımaqla məşğuldur. 

Daha bir məqam isə Zaxarovanın Laçın yolundakı şərti sərhəddə nəzarət- buraxılış məntəqəsinin bağlanmasını zə­ruriləşdirən cəhətləri saya salmamasıdır. Axı məntəqə Azərbaycan əsgəri ilə yana­şı, həm də rus sülhməramlı kontingenti­nin hərbçilərinin atəşə tutulmasına görə qapadılıb. Bakının mövqeyi qətidir: “Baş vermiş insident üzrə təqsirkar müəyyən­ləşdirilməyənədək, sərhəd bağlı qalacaq­dır.” Burada haqsız heç nə yoxdur. Ancaq biz gördük ki, İrəvan insident səbəbindən Moskvanı haqsız çıxartmaq istədi. Rusi­yanın Ermənistandakı səfiri XİN-ə çağırıl­dı və ona rəsmi etiraz bildirildi.

Bəli, indiki durumda Zaxarova tam haqsızdır. Birincisi, Rusiyanın məlum sərhəd hadisəsini araşdırmaq niyyətin­dən bəhs etmir, birtəfəli mövqe tutur. İkin­cisi isə həmin üçtərəfli bəyanata məhəl qoymayanın, böyük hesabla Ermənistan olduğuna diqqət yetirmir. Hər halda atəş qarşı tərəfdən açılmışdı... 

Digər tərəfdən, Rusiya XİN-in rəsmisi deyə bilərdi ki, Qarabağdakı qanunsuz erməni hərbi birləşmələrinin mövcudluğu Kremlin üstündə əsdiyi üçtərəfli bəyanata ziddir. Necə də desin? Axı Rusiya sülh­məramlıları həmin dəstələrə silah-sursat daşınması prosesini müşayiət ediblər. Yəqin, indi bunun qarşısı kəsildiyindən, Zaxarova Bakını pozuculuqda ittiham edir. Başqa nə düşünək? 

Hərçənd, onu da düşünə bilərik ki, Rusiya əlindən çıxardığı Ermənistana yenə də yarınmaq istəyir və buna görə də Zaxarovanın timsalında İrəvanın illüziya­sına qol-qanad vermək yolunu tutur. Axı Moskvanın erməni sevdası bitib-tükən­məzdir. Kreml dairələri onlardan uzaq­laşan “Ermənistan qatarı”nın yenidən geri dönəcəyini səbirsizliklə gözləyəcək qədər miskin və aciz duruma düşməkdən zövq alırlar. Çox güman ki, xatirələrdə yaşamağı xoşlayırlar...

Sonda onu da bildirək ki, Laçın yolu boyunca hərəkəti tamamilə açmağa ça­ğıran M.Zaxarova, həmçinin tərəfləri üç­tərəfli sazişlərə ən yüksək səviyyədə ciddi əməl etməyə, Laçın yolunda təhlükəsiz­liyin təminatında təmkini qorumağa və məsuliyyətli olmağa çağırıb. Göründüyü kimi, xanım XİN sözçüsü açıqlamasında Rusiyanın hər iki ölkə arasında, guya, paritet saxlamaq taktikasına sadiq qaldı­ğını da göstərmək istəyir. Onun sözucu da olsa, Azərbaycana və Ermənistana birlikdə səslənməsi bunun göstəricisidir. Əlbəttə, bu, heç bir halda erməni təəssü­bkeşliyini pərdələyə bilməz. 

Ə.RÜSTƏMOV, “Xalq qəzeti”