Ermənistan məhkəməsi 2003-cü il təvəllüdlü əsir hərbçimiz Axundov Hüseyn Əhliman oğlunu 20 il həbs cəzasına məhkum edib. Rəsmi İrəvan əsir hərbçimiz üzərində qurduğu qondarma məhkəmə zamanı Hüseyn Axundovu Zəngəzur mis-molibden kombinatının gözətçisini qətlə yetirməkdə təqsirləndirib.
Xatırladaq ki, bir müddət öncə Hüseyn Axundov 2004-cü il təvəllüdlü Bəbirov Aqşin Qabil oğlu ilə birlikdə dumanlı hava şəraitində Naxçıvan Muxtar Respublikasının Şahbuz rayonunun Ermənistanla sərhədboyu ərazisində yolu azmış və məhdud görmə səbəbindən qarşı tərəfə keçmişdi. Həmin vaxt həbs edilən hərbçilərimiz “Ermənistanın dövlət sərhədini qanunsuz keçməkdə, odlu silah və döyüş sursatı daşımaqda" ittiham olunsa da, bir müddət sonra Hüseyn Axundova qarşı yeni – tamamilə absurd bir ittiham irəli sürüldü. O, erməni gözətçisini qətlə yetirməkdə ittiham edildi ki, məqsəd hərbçimizin uzunmüddətli həbsi üçün hüquqi zəmin yaratmaq, habelə Azərbaycan əsgərinin beynəlxalq arenada qatil obrazını formalaşdırmaq idi.
Ermənistan beynəlxalq konvensiyaları saymır
Ermənistan məhkəməsinin əsir hərbçimiz Hüseyn Axundovu heç bir əsas olmadan 20 illik həbsə məhkum etməsi, rəsmi İrəvanın əsgərimizə qarşı sərgilədiyi növbəti vəhşilik nümunəsi oldu. Qeyd edək ki, hər iki hərbçimiz əsir alınan zaman amansız işgəncələrə, ağır fiziki zorakılığa məruz qalmışdır. Əsgər Hüseyn Axundovun qanunsuz saxlanılmasına hüquqi bəraət qazandırmağa çalışan ermənilər onu heç bir əsas olmadan qətldə ittiham edir ki, bu da beynəlxalq konvensiyaların pozulması deməkdir. “İnsan hüquqlarının və əsas azadlıqlarının müdafiəsi haqqında” Avropa Konvensiyasının 3-cü maddəsində aydın şəkildə göstərilir ki, kimsəni işgəncəyə, qeyri-insani rəftara məruz qoymaq olmaz. Hansı ki, Ermənistanın hər iki əsir hərbçimizə münasibətdə beynəlxalq hüququn bu tələbini kobud şəkildə pozdugunu əks etdirən foto-video faktlar mövcuddur.
Konvensiyanın 6-cı maddəsində bildirilir ki, ədalətli məhkəmə araşdırması hüququna malikdir və kimisə bu hüquqdan məhrum etmək yolverilməzdir. Halbuki, əsgər Hüseyn Axundovun üzərində qurulan qurama məhkəmə prosesi ilə “ədalətli məhkəmə” ifadəsi arasında hansısa uyğunluq tapmaq mümkün deyil.
Konvensiyanın 14-cü maddəsində vurğulanır ki, “Bu Konvensiyada təsbit olunmuş hüquq və azadlıqlardan istifadə cins, irq, dərinin rəngi, dil, din, siyasi və digər baxışlar, milli və ya sosial mənşə, milli azlıqlara mənsubiyyət, əmlak vəziyyəti, doğum və ya hər hansı digər əlamətlərə görə ayrı-seçkilik olmadan təmin olunmalıdır”. Halbuki, Ermənistanın “İnsan hüquqlarının və əsas azadlıqlarının müdafiəsi haqqında” Avropa Konvensiyasının da bu maddəsini kobud şəkildə pozması, sırf etnik-milli amillər səbəbi ilə azərbaycanlı əsirlərin hüquqlarına qəsd etməsi göz önündədir.
Əsir əsgərimiz üzərində oyuncaq məhkəmə prosesinin qurulması və heç bir fakta söykənmədən onun 20 il müddətinə azadlıqdan məhrum edilməsi Cenevrə Konvensiyası ilə də ziddiyyət təşkil edir.
Dünya ictimaiyyətini aldatmaq cəhdi...
Ermənistanın əsir Hüseyn Axundovu uzun müddətə azadlıqdan məhrum etməsi, insan hüquqlarının pozulması ilə yanaşı, həm də beynəlxalq ictimaiyyəti aldatmaq cəhdidir. Rəsmi İrəvan qondarma məhkəmə prosesi ilə göstərməyə çalışır ki, guya, əsir hərbçimiz Ermənistan ərazisinə məqsədli şəkildə– diversiya törətmək niyyəti ilə daxil olub və bu əsnada da erməni gözətçisini qətlə yetirib.
Dumanlı havada yolu azan hərbçimizi qatil kimi qələmə vermək Azərbaycan əsgərinin vəhşi, mülki şəxslərə belə aman verməyən qorxunc obrazını formalaşdırmağa hesablanıb. Məqsəd həm də Ermənistanın həyata keçirdiyi sərhəd təxribatlarına görə bütün məsuliyyəti Azərbaycanın üzərinə qoymaqdan, təmas xəttindəki gərginliklərin ölkəmizdən qaynaqlandığı fikrini beynəlxalq ictimaiyyətə sırımaqdır.
Unutmaq olmaz ki, Ermənistan beynəlxalq ictimaiyyətin aldadılması, yalanın həqiqət kimi təqdim olunmasında zəngin təcrübəyə malikdir və bu təcrübədən günümüzdə də gen-bol istifadə etməkdədir.
Seymur ƏLİYEV