Cənubi Qafqazda, o cümlədən, bölgədə istər təbii yolla baş verən proseslər, istərsə də qəsdən törədilən təxribatlar birbaşa Rusiyanın nəzarəti altındadır. Həm bölgədəki separatçılar, həm də İrəvandakı daşnak-revanşist qüvvələr Kreml ilə birbaşa bağlıdırlar. Məhz Kremldən verilən təlimatların nəticəsində Bakı ilə reinteqrasiyaya meyilli ermənilərdə qorxu yaratmaq mexanizmi işə salınıb. İki ay bundan əvvəl guya, Azərbaycana casusluq etmək ittihamı ilə həbs olunan bir neçə erməninin, əslində, barışığa meyilli kəsimin nümayəndələri olduqları artıq şübhə doğurmur. İndi Qarabağın erməni icmasının sülhə hamıdan çox ehtiyacı var və bunu Xankəndidəki separatçı rejimin qondarma başçılarının üzlərinə söyləməyə başlayıblar.
“Həssas məsələ”yə eyhamlı münasibət
Görünən dağa bələdçi nə gərək, – deyib atalarımız. Moskvanın həm Qarabağ münaqişəsinin davam etdiyi otuz ilə yaxın müddətdə, həm də hazırki post-müharibə dövründə problemin köklü həllində maraqlı olmamasının səbəbləri hər iki tərəfə məlumdur. Qərbli rəqibləri ilə Cənubi Qafqazda nüfuz davası aparan Rusiyadan verilən təlimatların nəticəsində Azərbaycanla reinteqrasiya prosesində iştirak etmək istəyən Qarabağın erməni sakinləri qorxu və qeyri-məyyənlik içindədirlər. Amma ortada sülh danışıqlarında əsas vasitəçi sayılan aktorun zorən nəzərə almalı olduğu Türkiyə amili var. Rusiya XİN-in sözçüsü Mariya Zaxarovanın həftəlik ənənəvi brifinqində verdiyi məlum açıqlaması da məhz bu amilin mövcudluğunun dolayısı ilə etirafıdır. M.Zaxarova deyib ki, Şuşada Türkiyə konsulluğunun açılması məsələsi Bakı ilə Ankaranın ikitərəfli əlaqələrinin mövzusudur. O, eyni zamanda, Moskvanın bu məsələnin Ermənistan üçün həssaslıq dərəcəsini başa düşdüyünü də vurğulayıb: “Harada baş verməsindən asılı olmayaraq, konsulluğun açılması kimi məsələ, xüsusən də Şuşada, bu, Bakı ilə Ankaranın ikitərəfli əlaqələrinin mövzusu olaraq qalır. Bəli, bu, iki suveren dövlətin səlahiyyətində olan məsələdir. Biz qarşılıqlı təmaslarda tərəflərin maraqlarının nəzərə alınması zərurətini, həm Ermənistan–Azərbaycan, həm də Ermənistan–Azərbaycan–Türkiyə münasibətlərinin normallaşması prosesinin vacibliyini daim önə çəkirik”.
Xanım Zaxarovanın Şuşada Türkiyənin konsulluğunun açılacağı ilə bağlı məsələyə yüngül eyhamlı diplomatik açıqlaması onun mövqeyini ifadə etdiyi Kremlin bu məsələyə dözümlü yanaşmasının əlamətidir.
Əngəlyaratma missiyası bitməlidir
Ermənistan və Azərbaycan yetkililərini sülh masasının arxasına əyləşdirməyə çalışan ABŞ bu yöndə təşəbbüslərini durmadan artırır. Gələn həftə ikitərəfli dialoqun Vaşinton platformasında Azərbaycan və Ermənistan XİN başçılarının ikitərəfli görüşünün ardınca Ağ Evin sülhyaratma missiyasındakı avropalı şəriki Avropa İttifaqı 12 iyul sammitinə ciddi hazırlıq görür. Moskvanın isə qarşıdakı sülh uğrunda savaşdan da, elə sülhün özündən də çəkindiyi hiss olunmaqdadır. Bu səbəbdən onun ünvanına artıq Ermənistandan da ittihamlar səslənməkdədir. Son vaxtlar Hayastanın rəsmi mediasında “Cənubi Qafqazda sülhü və sabitliyi istəməyən tək dövlət Rusiyadır” məzmunlu çıxışların sayının artması da təsadüfi deyil. Rusiyanın vasitəçilik missiyasına şərik olanlar ona qarşı hər cür təzyiq üsullarlından istifadə edirlər. Şübhəsiz, bunu Bakıda da yaxşı anlayırlar. Sülh müqaviləsinin imzalanması məsələsində təşəbbüskarlardan hansının səmimi, hansının isə qeyri-səmimi, riyakar olduğunun fərqindəyik. Gizlədilməsi mümkün olmayan həqiqət ondan ibarətdir ki, Moskvanın sülhə aparan danışıqları süni şəkildə uzatması, bunun üzərində imitasiya etməsi 2020-ci il 10 noyabr Bəyanatının 4-cü bəndinə ziddir. Onun üç ilə yaxındır ki, Qarabağdan Ermənistanın qanunsuz silahlı birləşmələrini çıxarmaq istəməməsini, əksinə, onların bölgədə qalmalarına hər cür kömək göstərməsini də detallarına kimi bilirik. Əslində, iki qonşu ölkə və xalq arasında sülhün yaranması üçün Kremlin əlində həmişə imkan və vasitələr olub. Amma təəssüflər olsun ki, Kreml həmin imkanlardan yalnız bölgədə mövcudluğunu saxlamaqdan ötrü sui-istifadə edib. Vəziyyət keçən əsrdə də bələ olub, XXI əsrdə də belədir. Sonda bunu Moskvaya çox güvənən ermənilər də anlamağa başladılar.
Arqumentlər və faktlar
Tevos Arşakyan adlı erməni politoloq “armenianreport.com”-da yazdığı məqaləsində deyir: “Ola bilsin ki, erməni və Azərbaycan xalqları öz aralarında ümumi dil tapa, bir-biri ilə razılığa gələ bilərdilər. Axı, necə olsa da, biz qonşuyuq, bu bölgədə yanaşı yaşamağa məcburuq. Təəssüf ki, Moskva buna imkan vermədi. Tərəflər öz aralarında konstruktiv danışıqlara meyillənəndə, nəyisə razılaşdırmaq perspektivinə ümidlər yaranan kimi dərhal hər şeyin üstündən yağlı qara xətt çəkilir, fors-major hadisələr yaşanır. Məsələn, şərti sərhəddə, təmas xəttində hər iki tərəfdən insan itkiləri ilə müşayiət olunan növbəti silahlı insident baş verir. Eynən o zaman Ter-Petrosyanın devrilməsi, və ya Ermənistan parlamentinin gülləbaran edilməsi hadisələri kimi...”
Bu məsələdə erməni politoloqu ilə razılaşmamaq olmur. Çünki ortaya arqumentlərini və faktları qoyur. Məntiqi də öz yerində. Həm də bizim dediyimizi deyir. Yəni, Hayastanın indiki hakimiyyətindən, eləcə də cəmiyyətindən güclü iradə tələb olunur ki, bundan sonra Moskvanın bitib-tükənməyən siyasi oyunlarına “maşa” olmasın. Üzünü sülhün təminatçısı rolunu oynamağa hazır Qərbə çevirsin, Azərbaycanla sülh müqaviləsini imzalasın. Gələcəyini də Türkiyə və Azərbaycanın yanında duraraq qursun. İrəvan iqtidarı gec də olsa anlamalıdır ki, onun nicatı yaxın iki qonşusu ilə münasibətləri normallaşdırmadadır. Rusiyanın vasitəçiliyi ilə uzunmüddətli sülhə bel bağlamaq yayda qartopu oynamaq qədər mənasız işdir.
Ötən əsrin doxsanıncı illərinin ikinci yarısında xarici siyasət məsələləri üzrə dövlət müşaviri postunda çalışmış mərhum Vəfa Quluzadə jurnalistlərlə görüşlərinin birində əlini şimala uzadaraq Qarabağ düyününün açarının saxlandığı dəqiq ünvanı – Kremli göstərmişdi. Bu reallığı Bakı da, İrəvan da qeyri-rəsmi olaraq elə o vaxtdan qəbul edib. Fəqət şimal qonşumuz o dövrdən sanki əsrin və minilliyin dəyişdiyinin və Cənubi Qafqazda yeni reallığın yarandığının fərqinə varmır, bunu qəbul etməkdə çətinlik çəkir. Görünən budur ki, hazırki durumda onun seçimi iki variant üzərindədir: ya bölgəyə barışı öz əli ilə gətirməlidir, ya da sülhün açarını digər vasitəçilərə verməlidir. Azərbaycan üçün hər iki variant məqbuldur.
Rasim MUSABƏYOV,
Milli Məclisin deputatı, politoloq
Siyasətdə, diplomatiyada səmimiyyət axtarmaq mənasız işdir. Mariya Zaxarovadan isə ayrı cavab gözləmək qeyri-mümkün idi. Şuşada qardaş ölkənin konsulluğunun açılması Azərbaycanla Türkiyənin öz aralarında həll olunası məsələdir. Sadəcə olaraq, diplomatik nümayəndəliyi yalnız bayraq asmaqdan ötrü açmırlar. Bu qurum konkret bir ərazidə Türkiyə vətəndaşlarının müəyyən sənəd-viza məsələləri ilə bağlı fəaliyyət göstərir. Düzdür, hazırda Türkiyəyə gediş-gəliş üçün Azərbaycan vətəndaşlarından viza tələb olunmur. Bu baxımdan, bizim vətəndaşlarımızın da gələcəkdə hansısa məsələ ilə bağlı Türkiyənin baş konsulluğuna müraciətləri ola bilər. Bu müraciətləri həmin diplomatik nümayəndəlik nəzərdən keçirib həll edəcək. Hazırda işğaldan azad olunmuş ərazilərimizdə, o cümlədən, Şuşada az sayda vətəndasımız yaşayır. Qarabağ iqtisadi rayonumuzda bərpa-tikinti işləri ilə məşğul olan Türkiyə şirkətlərinin əməkdaşları da o qədər çox deyil ki, onların problemlərinin həlli üçün dərhal konsulluğa ehtiyac duyulsun. Amma, bu, qaçılmazdır. Nəzərə almalıyıq ki, həmin rayonlara mərhələ-mərhələ məcburi köçkünlərimizin qayıdışı planlaşdırılır. O cümlədən, ilin sonlarında Şuşaya da xeyli aliənin qayıtması gözlənilir. Yəni, konsulluq xidməti bir müddət sonra Şuşada fəaliyyətə başlaya bilər. Sonra konsulluq, ümumiyyətlə, bölgənın rayonlarında yaşayan həm Azərbaycan, həm də orada çalışan Türkiyə vətəndaşlarının məsələləri ilə məşğul olacaq. Bu məsələdə kiminsə Azərbaycana nəinki mane olmağa, heç irad bildirməyə belə haqqı yoxdur.
İmran BƏDİRXANLI, “Xalq qəzeti”