Türkiyədə keçirilən prezident seçkiləri çağdaş dünya siyasətinin ən xarizmatik siyasətçilərindən olan, görkəmli dövlət xadimi Rəcəb Tayyib Ərdoğanın parlaq qələbəsi ilə başa çatdı. Son seçkilər, eyni zamanda, Türkiyə demokratiyasının zəfəri kimi qəbul olunur. Qalib isə 85 milyonluq Türkiyə xalqıdır!
Bir çox siyasi təhlilçilər müasir dünya siyasətində R.T.Ərdoğan fenomeninin yarandığının fərqindədirlər. Fakt və reallıq ondan ibarətdir ki, bu görkəmli siyasətçinin qurucusu və lideri olduğu Ədalət və İnkişaf Partiyası son 21 ildə on altı dəfə müxtəlif təyinatlı seçkiləri udub. Sivil, demokratik dünyada çox az siyasətçiyə belə uğur nəsib olur!
Bilkənd (Ankara) Universitetinin professoru Əmrulla Məmmədli bizimlə telefon söhbəti zamanı fəxrlə bildirdi ki, R.T.Ərdoğanın son prezident seçkilərində qələbəsi gözlənilən olduğu qədər də arzuolunan idi. Son iyirmi ildə mövcud hakimiyyətin əldə etdiyi uğurlar göz önündədir. Bunlardan bir neçəsini xatırlatmaq yerinə düşər. Yaxın vaxtlarda tam gücü ilə işləyəcək “Akkuyu” Atom Elektrik Stansiyası, Cənub-Şərqi Anadoluda neft ehtiyatlarının aşkar edilərək istifadəyə hazır vəziyyətə gətirilməsi, hərbi hücum təyyarələrinin istehsalı, zəlzələ bölgəsində genişmiqyaslı tikinti işlərinin aparılması, hazırda müəyyən problemləri olan milli iqtisadiyyatın dirçəldilməsi və regionda liderliyini təsdiqləməsi, Şərqi Aralıq dənizində söz sahibi olması, yüksək sürətli dəmir yollarının istifadəyə verilməsi, “Yeni İstanbul Kanalı” layihəsinin reallaşdırılması və bu qəbildən olan bir çox nəhəng layihələr...
Amma Qərb siyasətçilərini qardaş ölkənin əldə etdiyi nailiyyətlərdən daha çox onun 2023–2028-ci illərdə R.T.Ərdoğanın liderliyi ilə daha böyük zəfərlərə imza atacağı narahat edir. Onlar bilirlər ki, Ərdoğan Türkiyəsini dayandırmaq qeyri-mümkündür!
Türkiyənin Mərkəzi Seçki Komissiyası tərəfindən prezident seçkilərinin yekun nəticələri açıqlanıb. Qeyd olunub ki, “Cümhur İttifaqı"ndan prezidentliyə namizəd, hakim Ədalət və İnkişaf Partiyasının sədri Rəcəb Tayyib Ərdoğan 52,18 faiz səslə qalib gəlib. “Millət İttifaqı"ndan prezidentliyə namizəd, Cümhuriyyət Xalq Partiyasının (CHP) sədri Kamal Kılıçdaroğlu isə 47,82 faiz səs toplayıb.
Bu arada Türkiyədə müxalifətin seçki blokunun dağılması barədə məlumatlar yayılıb. İYİ Partiyanın baş katibi Uğur Poyrazın sözlərinə görə, “Millət İttifaqı” seçki birliyi idi və mayın 28-dən blokun səlahiyyəti başa çatıb. Xatırladaq ki, “Millət İttifaqı”nda Cümhuriyyət Xalq Partiyası, İYİ Partiya, Səadət Partiyası, Gələcək Partiyası, Demokrat Partiyası və Demokratiya və İnkişaf Partiyası (DEVA) təmsil olunub. Seçkilərdə qələbə qazanan “Cümhur İttifaqı”nda isə Ədalət və İnkişaf Partiyası, Milliyyətçi Hərəkat Partiyası, Böyük Birlik Partiyası, Yenidən Rifah Partiyası, Hür Dava Partiyası və Demokratik Sol Partiyası birləşib.
Türkiyə Böyük Millət Məclisi (TBMM) dünən fəaliyyətə başlayıb. 28-ci çağırış ölkə parlamentinin deputatlarının andiçmə mərasimi MHP lideri Dövlət Baxçalının sədrliyi ilə keçiriləcək. Yeri gəlmişkən, Türkiyə Prezidenti Rəcəb Tayyib Ərdoğanın iyunun 3-də andiçmə mərasimi olacaq.
Andiçmə mərasimində dünyanın bir çox ölkələrinin liderlərinin, eləcə də Rusiya Prezidenti Vladimir Putinin və Ukraynanaın dövlət başçısı Volodimir Zelenskinin iştirakı gözlənilir. CNN-Türkün yaydığı bu xəbər ildırım sürətilə bütün dünyaya yayılıb.
Hazırda Türkiyə Prezidenti seçkilərdəki parlaq qələbəsi münasibətilə çox sayda təbrikləri qəbul edir. Dünən BMT-nin Baş katibi Antonio Quterreş ilə Türkiyə Prezidenti arasında telefon danışığı olub. Baş katib R.T.Ərdoğanı prezident seçkilərində qalib gəlməsi münasibətilə təbrik edib və onunla bir çox regional və qlobal problemlərin həlli istiqamətində birgə çalışmaq şansından məmnunluq bildirib.
Bu arada xəbər yayılıb ki, NATO-nun Baş katibi Yens Stoltenberq İsveçin alyansa üzvlüyü məsələsini Prezident Ərdoğanla müzakirə etmək üçün yaxın zamanlarda Türkiyəyə gələcək. Alyansın rəhbəri bu barədə NATO ölkələrinin xarici işlər nazirlərinin qeyri-rəsmi görüşü ərəfəsində bildirib. Onun sözlərinə görə, səfər zamanı İsveçin tezliklə alyansa üzvlüyü üçün mövcud yollar müzakirə olunacaq.
“Türkiyənin bəzi haqlı təhlükəsizlik narahatlıqlarının olduğunu unutmamalıyıq. Çünki heç bir müttəfiqə Türkiyə qədər terror hücumu olmayıb. Bu səbəbdən terrorun hər növünə qarşı Türkiyə ilə birlikdə çalışmağımız vacibdir. Mən NATO müttəfiqlərinin fəaliyyətini, eləcə də İsveçin ötən ay terrorla mübarizə sahəsində atdığı addımları və Türkiyə ilə əməkdaşlığı sürətləndirmək cəhdlərini alqışlayıram. Əminəm ki, İsveçin üzvlük protokolu tezliklə ratifikasiya olunacaq”, – deyə Yens Stoltenberq vurğulayıb.
Xatırladaq ki, 2022-ci ilin iyul ayında Finlandiya və İsveç NATO-ya üzvlüklə bağlı müraciət edib. Türkiyə alyansın üzvü kimi sənədi ratifikasiya etmək üçün bir neçə şərt irəli sürüb. Bu şərtlər arasında kürd separatçılarının terror təşkilatı kimi tanınması, terrorda ittiham olunan şəxslərin Türkiyəyə ekstradisiyası və Ankaraya silah tədarükünə qoyulan qadağanın aradan qaldırılması yer alıb. Finlandiya 2023-cü il aprelin 4-də NATO-ya üzv olub. İsveçin NATO-ya üzvlüyünə isə Türkiyə tərəfi hələlik razılıq vermir.
Maraqlıdır ki, Türkiyə Prezidentinə ayrı-ayrı regionlarda sülh yaradılması üçün vasitəçilik etməsini xahiş edənlərin sayı artır. Məsələn, ən son faktı diqqətinizə çatdıraq. Bu günlərdə Serbiya Prezidenti Aleksandar Vuçiç ilə Türkiyə Prezidenti arasında telefon danışığı olub. Söhbət zamanı A.Vuçiç Ərdoğanı yenidən prezident seçilməsi münasibətilə təbrik edib.
Telefon danışığında ikitərəfli münasibətlər və regional məsələlər, həmçinin Kosovonun şimalında baş verən son hadisələr barədə fikir mübadiləsi aparılıb. Serbiya Prezidenti regionda sülhün və sabitliyin təmin olunması üçün R.T.Ərdoğandan şəxsi nüfuzundan istifadə etməsini xahiş edib. A.Vuçiç də həmkarını Serbiyaya səfərə dəvət edib.
Türkiyə Prezidenti həmin məsələ ilə bağlı Kosovanın Baş naziri Albin Kurti ilə telefonla danışıb. Türkiyə lideri Kosovanın şimalında baş verənlərlə bağlı bölgədə davamlı sülh və sabitliyin bərqərar olmasının yeganə yolunun dialoq prosesində irəliləmək olduğunu bildirib. Ərdoğan Türkiyə olaraq dialoq prosesinə öz töhfələrini verməyə hazır olduqlarını bildirib.
Bəli, bu gün Türkiyə Prezidenti R.T.Ərdoğan dünyanın ən nüfuzlu liderlərindəndir. Gücünü xalqından, milətindən alan, ən çətin problemlərin həllində yüksək qətiyyəti, prinsipiallığı, ən başlıcası ədalətlililiyi və humanizmi ilə seçilən bu görkəmli siyasətçinin nüfuzu və şöhrəti bütün dünyaya yayılıb. Həqiqətən, məşhur mahnıda deyildiyi kimi, o, susqun dünyanın hürr səsidir!
Məsaim ABDULLAYEV, “Xalq qəzeti”