Bu gün alman faşizminə qarşı müharibənin (1941–1945-ci illər) qələbə ilə başa çatdığı gündür. Bu, bəşəriyyət tarixində möhtəşəm, unudulmaz bir hadisədir. Bu böyük Qələbə münasibətilə böyük şairimiz Səməd Vurğun necə də gözəl demişdir:
“Yazılsın tarixə qızıl hərflərlə,
1945-ci ilin 9 May günü!”
Bəli, düz 78 il əvvəl, 1945-ci il mayın 8-dən 9-na keçən gecə alman generalı Vilhelm Keytel qeyd-şərtsiz təslim aktını imzalamış, bununla da uzun müddət davam edən qanlı döyüşlər başa çatmışdır.
Qeyd etmək lazımdır ki, Azərbaycan xalqı həmin ağır illərdə həm ön, həm də arxa cəbhədə çox böyük qəhrəmanlıq və şücaət nümunələri göstərmişdir. Qısa müddətdə respublikada 87 qırıcı batalyon, 1124 özünümüdafiə dəstəsi yaradılmışdı. 1941–1945-ci illərdə Azərbaycanın 700 mindən çox igid oğlu və qızı cəbhəyə yollanmışdı. Azərbaycan diviziyaları Qafqazdan Berlinə qədər şərəfli döyüş yolu keçmişdir.
Azərbaycandan olan 170 min əsgər və zabit keçmiş SSRİ-nin müxtəlif orden və medalları ilə təltif olunmuşdur. İki dəfə Sovet İttifaqı Qəhrəmanı Həzi Aslanov, Sovet İttifaqı qəhrəmanları İsrafil Məmmədov, Aslan Vəzirov, Adil Quliyev, Ziya Bünyadov, Gəray Əsədov, Məlik Məhərrəmov, Mehdi Hüseynzadə, generallar Mahmud Əbilov, Akim Abbasov, Tərlan Əliyarbəyov, Hacıbaba Zeynalov və bir çox başqaları öz şücaətləri ilə xalqımızın qəhrəmanlıq tarixinə yeni səhifələr yazmışlar.
Akademik Yusif Məmmədəliyevin rəhbərliyi altında aviasiya benzini alınmasının yeni texnologiyası yaradılmışdı. Neftçilərimizin fədakar əməyi sayəsində Azərbaycan tarixində neft hasilatı üzrə rekord göstərici əldə edilmiş, 1941-ci ildə 23,5 milyon ton “qara qızıl” çıxarılmışdı. Bu, keçmiş ittifaqda çıxarılan bütün neftin 71,4 faizini təşkil edirdi.
Azərbaycan xalqının faşizmə qarşı şanlı savaşda göstərdiyi qəhrəmanlıq nümunələri haqqında çoxlu sayda şeirlər, kitablar yazılmış, bədii və sənədli filmlər çəkilmiş, qəhrəmanların şərəfinə abidələr ucaldılmış və onların adları əbədiləşdirilmişdir.
Ulu öndər Heydər Əliyev 1941-1945-ci il müharibəsi veteranlarının xidmətlərini çox yüksək qiymətləndirir, onların hər cür qayğıya və hörmətə layiq olduqlarını vurğulayırdı.
Ümummilli liderin bu siyasi kursu onun layiqli davamçısı Prezident İlham Əliyev tərəfindən uğurla davam etdirlir. Ölkəmizdə faşizm üzərində müharibə veteranlarına yüksək diqqət və qayğı ilə yanaşılır, onların sosial müdafiəsinin gücləndirilməsi istiqamətində ardıcıl addımlar atılır.
Sonda fəxrlə qeyd edək ki, Azərbaycan xalqı 2020-ci ilin payızında Ali Baş Komandan, Prezident İlham Əliyevin liderliyi ilə erməni faşistlərini doğma Qarabağdan qovaraq 44 günlük şanlı savaşda tarixi Zəfər qazanmışdır.
Bu gün hər birimiz böyük qürurla deyirik: Sən azadsan, Şuşa! Qarabağ Azərbaycandır! Bu parlaq qələbəni bizə bəxş edən şəhidlərimizin müqəddəs ruhu qarşısında baş əyir, qazilərimizə cansağlığı diləyirik.
M.HACIXANLI, “Xalq qəzeti”