İsrailin nüfuzlu “Jewish Press” agentliyi bu ölkənin keçmiş rabitə və kibertəhlükəsizlik naziri, Beybəlxalq İqtisadi Dünya Mərkəzinin prezidenti Ayub Karın Laçın yolunda baş verənlərlə bağlı məqaləsini dərc edib. Orada deyilir:
“Mən Laçın yolunda etiraz aksiyası keçirən azərbaycanlı ekofəallarla həmrəyəm. Belə ki, hər bir vətəndaşın öz ölkəsinin ekologiyasını qorumaq və təbii sərvətlərin qanuni yollarla istismar edilib-edilməməsinə nəzarət etmək hüququ var. Bu hüquqlar hazırda Ermənistan tərəfindən pozulur. Bu səbəbdən mən, Enerji xartiyası üzrə müqaviləni pozan Ermənistana qarşı Beynəlxalq arbitraj qarşısında məhkəmə iddiası qaldıran Azərbaycanı dəstəkləyirəm.
Beynəlxalq hüququn tələblərindən çıxış edəndə görürük ki, Ermənistan 30 il ərzində işğal etdiyi torpaqlarda Azərbaycanın enerji resurslarının qeyri-qanuni surətdə istismarı ilə məşğul olubdur. İrəvan hazırda Xankəndidə və onun ətrafındakı ərazilərdə qızıl, mis-molibden yataqlarının istismarına nəzarət eməyə imkan vermir. Bütün bunlar sözügedən beynəlxalq müqavilənin kobud surətdə pozulması deməkdir.
Qarabağda ətraf mühitin qəsdən məhv edilməsinə görə məsuliyyətin Ermənistanın üzərinə düşməsi ilə bağlı Azərbaycanın Bern Konvensiyasına uyğun olaraq qaldırdığı məhkəmə iddiası ədaləti bərpa etmək cəhdidir. Ermənistan onillər boyu Azərbaycanın enerji resurslarını daşıyaraq aparıb. Azərbaycanlı ekofəalların Laçın yolunu tərk etmək istəməmələrinin əsas səbəblərindən biri məhz budur! Acı həqiqət həm də bundan ibarətdir ki, hazırda təbii sərvətlər ekoloji cəhətdən təhlükəli üsullarla əldə olunaraq, bəşəriyyət əleyhinə cinayətlər törətmiş şəxslərə satılır.
Təxminən bir il əvvəl mən Qarabağa səfər etmişəm və orada ermənilərin ekologiyaya böyük zərər vurmalarının şahidi olmuşam. Biz orada sularında balıqlar olmayan çaylar, kökündən qopardılmış ağaclar, viran qoyulmuş tarlalar, başqa irimiqyaslı dağıntılar gördük. Bunlar o qədər vahiməli idi ki, yadıma bir vaxtlar Cənubi Livanda görüb müşahidə etdiklərim düşdü.
Təəssüf ki, bəzi rəsmi şəxslər, məsələn, Almaniyanın xarici işlər naziri bu münaqişədə təcavüzkarın Ermənistan olduğunu dərk etməkdən imtina edir. Onlar Azərbaycanı Laçın yolunda etiraz aksiyaları təşkil etməkdə günahlandırırlar və bunu “humanitar fəlakət”, hətta “genosid” adlandırırlar.
Holokost dəhşətlərini yaşayan insanların içərisində böyüyən bir şəxs olaraq hesab edirəm ki, Laçın yolundakı etiraz aksiyalarını bu cür adlandırmaq ciddi təhqirdir. Birincisi, ona görə ki, Beynəlxalq Qırmızı Xaç Komitəsinin və Rusiya sülhməramlılarının avtomobilləri hər iki tərəfə humanitar yükləri daşımaqda davam edir. İkincisi, etiraz aksiyalarının keçirilməsi heç də blokada anlamı kimi düşünülməməlidir, ən azı ona görə ki, bunlar beynəlxalq hüquqa görə “humanitar böhran” hesab edilə bilməz. Ekofəalların etiraz aksiyalarını “humanitar fəlakət” kimi dəyərləndirmək İkinci İntifada zamanı Cenində baş verənləri “qətliam”, “qırğın” adalandırmağa bərabərdir.
Bu səbəblərdən biz israillilər Azərbaycanla həmrəy olmalı və Laçın yolunda baş verənlərə səhv mövqedən yanaşan Qərbə həqiqəti başa düşməsinə kömək etməliyik. Təəssüf ki, eyni səhvlər tarixi torpaqlarımız olan İudeyaya və Samariyaya münasibətdə də baş verir.
Bu yaxınlara öz səfirini ölkəmizə göndərən dost Azərbaycan bu gün İsrail dövlətinin yaxın müttəfiqidir. Bu səbəbdən İsrail Azərbaycanı müdafiə etməli və Enerji xartiyası üzrə müqaviləyə uyğun olaraq Ermənistana qarşı ədalət mühakiməsində Bakının tərəfində olmalıdır.
Holokostun məşhur tədqiqatçısı Eli Vizal haçansa deyibdir: “Biz kiminsə tərəfini tutmalıyıq. Neytral qalmaq çox vaxt zülmə məruz qalanı deyil, zalıma kömək etməkdir. Belə məqamlarda susmaq əzab çəkəni deyil, əzab verəni həvəsləndirir”.
P.S. İsrailin keçmiş rabitə və kibertəhlükəsizlik naziri məqalədə sonda vurğulayıb ki, yuxarıda sadaladığı ciddi səbəblərdən o, birmənalı olaraq Azərbaycanın tərəfində çıxış edir.
Hazırladı:
M.HACIXANLI,
“Xalq qəzeti”