Bu yazı 2000-ci ildə işıq üzü görüb. Səid Zəncanlının farscadan tərcümə etdiyi məqalədə sanki şəhərin bu günündən söhbət açılır. Güneyli fəalların göndərdiyi həmin yazını oxuculara təqdim edirik.
Təbriz elə bir şəhərdir ki, onun mərkəzində məktəbli uşaqlar acı bibər, corab, sabun və başqa xırdavat satmaqla həm güzaranlarını keçirir, həm də yay tətillərini başa vururlar. Taksi sürücüləri bu şəhərdə sərnişin tapmaq üçün bütün günü hay-küy salırlar. Təbrizin yalnız çayxanalarında və avtobuslarında adamları gur görmək olar. Bu şəhərin sürücülərinə və piyadalarına avtomobil hərəkəti qaydaları önəmli deyil, yazılmamış qanunları var Təbrizin. Bu şəhərdə diriləri dindirmirlər, ancaq ölüləri də asanlıqla başlı-başına buraxmırlar.
Burada iş vaxtı saat 10-dan başlayır. Süstlük, yorğunluq yağır şəhərin qapı-bacasından. Onu rəssamlıq, teatr, kino, mətbuat və kitab maraqlandırmır. Məmurlar əyri yolları burada öyrənirlər, cibləri dolandan sonra, Tehranda başa çıxır bu ağalar. Tehranın icazəsi olmadan Təbrizin idarələrində kimsənin su içməyə belə ixtiyarı yoxdur. Bu şəhərdə hər şeyin ömrü ikigünlükdür. Əksər məmur xidmət etdiyi müddətdə heç bir səmərəli iş görmədən tezliklə yerini başqa “əməkdar”a verir. Təbrizdə belə məmurların sürücüsünə və nökərinə də irad tutmaq olmaz. Bura elə şəhərdir ki, hər şeyi yenidən öyrənməli və hər şeyi sıfırdan başlamalısan.
Müdirləri burada məhkəməyə çağırmırlar. Yalvarmaq, yaltaqlanmaq burda mədəniyyətə çevrilib, sədaqəti, sözü üzə deməyi sevmirlər bizdə. İndiyə qədər dediklərim üzdə görünənlərdi. Təbrizin dərinliklərinə varsan, daha dəhşətli, daha kədərli hadisələrlə qarşılaşacaqsan. Bütün bunlar Təbrizi ölülər şəhərinə çevirib, elə bil, ölü tozu səpilib bu şəhərin üzərinə. Təbrizin ölülüyünü nəinki görmək, bəlkə, ayaqların altında belə hiss edirsən.
Üzümü sizlərə tutub soruşuram: “Bu ölülər şəhərindən qaçmaqla iş bitirmi?” “Ölülərin iyrənc qoxusu dirilərin də nəfəsini kəssinmi? “Görəsən, qaçmaqdan savayı başqa bir çarə yoxdurmu?” “Niyə Təbriz doğma övladlarınıa yad olub?” Bu sözləri mən Təbrizin sərmayə sahiblərinə və avam camaatına söyləmirəm. Təbrizdən qaçan sərmayə sahibi, pulunu vətəndən daha əziz tutur, onlardan belə şey gözləmək ağılasığmazdır. Heç elə iş olar ki, onlar məmləkətin abadlaşmasını fikirləşsinlər?
Avam camaat da ki, cəmiyyəti sağlamlaşdıra bilməz. Onlar bir qarın çörək tapıb qarınlarını doyura bilsələr, bu özü hünərdir. Təbrizdən bu iki təbəqənin çıxıb getməsi o qədər kədərli deyil, axı dünyanı düzəltmək onlara qalmayıb, onlar yalnız özlərini düşünürlər.
Mənim sözüm qələm sahiblərinə, düşünən beyinlərə, ziyalılara və incəsənət xadimlərinədir. Görəsən, bunlar da qaçmalıdırlarmı? Bunların da arasından sənətlərini, qələmlərini gizlədib qaçanların sayı az deyil. Etiraz edəndə də deyirlər ki, Təbriz, Azərbaycan yaşayası yer deyil. Beyni düşünən, əlindən iş gələn, “yolların” bağlı olduğunu bildirir. Ayaqları işləyən isə Təbriz yollarının ayaqlar üçün yararlı olmadığını söyləyir. Pulu cibində olan, beyni düşünən hər bir kəs çarəni yad yerlərə qaçmaqda görür. Onlar hünərlərini yad yerlərdə işlətmək, inkişaf etdirmək niyyətindədirlər. Vicdan əzabı çəkməsinlər deyə Təbrizin dünyaya “bağlı” olduğunu bəhanə edirlər.
Mən Təbrizin və ümumiyyətlə, Azərbaycanın istedadlarını inkişaf etdirmək üçün sağlam mühitin olmasının vacibliyini sübut etmək istəmirəm. Hamımız bilirik ki, Tehranın, İsfahanın və başqa yerlərin yolları istedadlar becərib, inkişaf etdirmək üçün hamardır. Azərbaycanda belə bir hamar yol yoxdur. Təbrizdə dar düşüncələrin bolluğundan hamının xəbəri var. Hamımız bilirik ki, istedadlar burada inkişaf etmir, buranın mühiti havasızdır.
Hamımız bilirik ki, yuxarıların əl-ayaqlarına dolaşan qanunlar Təbrizdə, ölkənin digər yerlərinə nisbətən daha yaxşı həyata keçirilir. Əksinə, millətin xeyrinə olan qanunlardan bizdə bir xəbər yoxdur. Biz hamımız bunları görürük, bəziləri də görür və hiss edir. Ancaq vəzifəmiz nədən ibarət olmalıdır?
Nəyimiz varsa götürüb qaçmaq? Budurmu düşünən beynin, əlində qələm olanın vəzifəsi? Təbrizi qoyub qaçan sərmayə sahibləri, düşünən beyinlər, sənətçilər və bu təbəqəyə xas olanlar mübarizəyə qadir olmayan, nəfsi zəif insanlardır. Düşünən beyin cəmiyyətin həkimi sayılır. Görəsən, belə bir həkimin vəzifəsi xəstədən qaçmaqdır, yoxsa onu müalicə etmək?
Getmək asan bir işdir. Ancaq qalıb xəstə bir cəmiyyətlə mübarizə aparmaq, düşmənin qabağından qaçmamaq hər oğulun işi deyil. Oğul bağlı qapını sındırmağı bacarmalıdır, düz olmayan yolları hamarlamalıdır. Kimin gücü varsa millətin yolunda əsirgəməməlidir. Qaçıb özgə yerlərdə özünü nümayiş etdirmək hünər sayılmır. Uzaqdan əli odda qızdırmaq yox, odun içinə girmək gərəkdir. Boş-boş bəhanələr gətirmək kişi işi deyil. Yad yerlərə gedib “Azərbaycanın dərdindən ölürük” kimi yalanlarınıza inanmazlar. Siz canınızı mənsub olduğunuz cəmiyyətdən daha çox istəyirsiniz. Əgər düz deyirsinizsə, onda qaçmaq nəyə lazımdır? Düşmənin əlindən qaçıb sonra mübarizə tələb edib və nəzəriyyələr irəli sürmək kimin dərdinə dərmandır?
Görəsən, bu düşünən beyinlər, sərmayə sahibləri, işgüzar müdirlər min bir bəhanələrlə Təbrizi atıb yad yerlərə getməsəydilər, şəhər indiki zəlil halında qalardımı ki? Düzdür, Təbriz nöqsanlıdır, onu aradan qaldırmaq isə avam insanların yox, ziyalıların vəzifəsidir. Ziyalılar və ümumiyyətlə, sənət adamları incə ruhlu olurlar. Ancaq onlar cəmiyyəti düzəltmək üçün yaranıblar.
Ziyalı və yaxud incəsənət adamının vəzifəli şəxsdən mərhəmət gözləməsi sadəlöhvlükdür. Bilirik, Azərbaycanda işləmək çətindir, canüzücüdür. Burada hər bir insan öz sümüklərinin sındığının səsini ucadan eşidir. Vətəndə də qalmaq mümkün deyilsə, qaçmaq da düz yol deyil. Gəlin üçüncü yolu – xilas yolunu seçək.
Hazırladı:
Rəhman GƏNCƏLİ