ABŞ-nin paytaxtı Vaşinqtonda yaşayan soydaşımız Eldar Xudiyevin “Sirk” adlı bəstəsi Atlantada keçirilən Beynəlxalq Musiqi Müsabiqəsində Böyük və Qlobal Musiqi mükafatlarında gümüş medala layiq görülüb. Məlumatı Diasporla İş üzrə Dövlət Komitəsi verib. 

Əsərin dirijorluğu müəllifin qardaşı, ABŞ-də fəaliyyət göstərən tanınmış musiqiçi Fərhad Xudiyevə məxsusdur.

Cari ilin dekabr ayında “Sirk”i Vankuver Simfonik Orkestri ilə yanaşı, məhşur klarnet ifaçısı və Yale Universitetinin professoru Devid Şifrin də ifa etməsi planlaşdırılır. 

Eldar Xudiyev “Azərbaycan”, “Odlar yurduna səyahət”, “Arzular”, “Payız valsı”, “Asiya” və digər əsərlərin müəllifidir. O, musiqi fəaliyyəti ilə əlaqədar 2006-ci ildə ABŞ hökuməti tərəfindən “Xüsusi istedadlı incəsənət nümayəndəsi” tituluna layiq görülüb, eyni zamanda, bir sıra ölkələrin mükafatlarını alıb. 

Eldar Xudiyev ABŞ-də təşkil edilən konsertlərdə, mədəni tədbirlərdə Azərbaycanın zəngin musiqi mədəniyyətini daim təqdim və təbliğ edir. O, hazırda Vaşinqtonda uşaq musiqi akademiyasında skripka dərsi keçir.

P.ƏMİRCANOV
XQ