Nazirlər Kabineti tərəfindən Azərbaycan Dövlət Gənc Tamaşaçılar Teatrına və Gəncə Dövlət Dram Teatrına “milli” statusu verilib. Yeni status uzun illərdir fəaliyyət göstərən, özünəməxsus sənət ənənələri olan hər iki teatrda çalışan insanların maddi rifahının yaxşılaşmasına, yaradıcılıq fəaliyyətinə böyük stimul olacaq. Bununla bağlı müxbirimiz Gənc Tamaşaçılar Teatrının aktyorlarından qısa müsahibələr alıb. Onların ürək sözlərini təqdim edirik.
Aktrisa İlqarə Tosova:
– Dövlətimiz ölkəmizdə digər sahələr kimi, mədəniyyət sahəsi, xüsusilə, incəsənətin əsas qolu olan teatrın inkişafını da daim diqqətdə saxlayır. Eyni zamanda, Birinci vitse-prezident, Heydər Əliyev Fondunun rəhbəri Mehriban xanım Əliyevanın təşəbbüsü və dəstəyi ilə mədəniyyət xadimlərinin sosial şəraitinin yaxşılaşdırılması, yaradıcılıq imkanlarının genişləndirilməsi ilə bağlı mühüm işlər həyata keçirilir. Bu siyasətin davamı kimi, ölkəmizdə teatrların inkişafına, sahənin nüfuzunun artırılmasına xidmət edən addımlar atılır. “Milli” statusu almağımızdan çox şad oldum. Bu bizim sənətimiz üçün, illərini bu yolda sərf edən aktyorlar üçün çox böyük motivasiyadır.
Aktyor Anar Seyfullayev:
– Hazırda dövlət teatrlarında maddi-texniki bazanın gücləndirilməsi, habelə bu sahədə institusional və məzmun dəyişikliyi istiqamətində işlər davam etdirilir. Bu xəbər isə teatrımızın yaradıcı heyəti üçün çox böyük müjdə oldu. Buna görə dövlət və hökumətimizə hədsiz minnətdarıq. Bundan sonra üzərimizə çox böyük məsuliyyət düşür. Peşəkarlığımızı daha da artırmalı, səhnədə daha ciddi və gözəl tamaşalar oynamalıyıq. Onu da qeyd edim ki, bir neçə gün əvvəl mən Prezident Mükafatına da layiq görülmüşəm. Mənim üçün ikiqat bayram oldu.
Aktrisa Aygün Fətullayeva:
– İlk dəfə bu xəbəri iş yoldaşlarımdan, həmkarlarımdan aldım. Sosial şəbəkələrdə də məlumatı görəndə çox sevindim. Bu, teatrımızın tarixində yaşanan ən sevincli günlərdən biridir. Yeni status teatr sənətinə olan böyük qayğıdır, dəstəkdir, yüksək etimaddır.
Fidan SALMANOVA,
Elşən AĞALAR (foto)
XQ
