Tanınmış şair-publisist, media qurucusu, Azərbaycan Jurnalistlərinin Həmrəyliyi İctimai Birliyi Komitəsinin sədri Mədət Əyyuboğlu Məmmədovun anadan olmasının 65 illik yubileyi münasibətilə dünən Azərbaycan Mətbuat Şurasında keçirilən mərasim xalqına və dövlətinə sözlə xidmətdə qazanılmış nüfuz və qədir-qiymətin layiqli ifadəsi oldu.
Şuranın Ahıl Jurnalistlər Məclisinin təşkilatçılığı ilə keçirilən toplantını giriş sözü ilə açan Jurnalistlərin Həmkarlar İttifaqının sədri, MŞ İdarə Heyətinin üzvü Müşfiq Ələsgərli Mədət Məmmədovun yubileyini ölkənin media ictimaiyyətinin əlamətdar hadisə kimi qeyd etdiyini vurğuladı və şuranın yubiley diplomunu ona təqdim etdi.
Mərasimin aparıcısı Ahıl Jurnalistlər Məclisinin sədri Tahir Aydınoğlu Mədət Məmmədovun zəngin və mənalı həyat yolu barədə məlumat verərək bildirdi ki, 1959-cu ilin martında Ağdam rayonunun Güllücə kəndində anadan olmuş Mədət Məmmədov BDU jurnalistika fakültəsinin tanınmış məzunlarındandır. O, “Azərbaycan” qəzet-jurnal nəşriyyatında mətbuatyayımı üzrə baş müfəttiş, “Dirçəliş” ictimai-siyasi jurnalında məsul katib müavini, “Kənd həyatı” jurnalında baş redaktor müavini, “Doğru yol” qəzetinin baş redaktoru kimi yüksəliş yolu keçdikdən sonra müstəqillik illərində Mətbuat və İnformasiya Nazirliyində şöbə müdiri və KİV baş idarəsinin rəisi kimi məsul vəzifələrə irəli çəkilib.
Sonrakı illərdə Ombudsman Aparatında idarə rəisinin müavini və Azərbaycan Dövlət İnformasiya Agentliyində redaktor vəzifələrində çalışıb. 2003-cü ildən “Jurnalistlər Həmrəyliyi Komitəsi” İctimai Birliyinə rəhbərlik edən həmkarımız ölkəmizdə jurnalist peşəkarlığının artırılmasına, dördüncü hakimiyyətin cəmiyyətdə öz funksiyasını yüksək səviyyədə gerçəkləşdirməsinə öz layiqli xidmətini davam etdirib. “Qızıl qələm”, “Həsən bəy Zərdabi” və digər media mükafatlarına layiq görülən Mədəd Məmmədov bunları peşəkarlığına, məhsuldar yaradıcılığına və yüksək ictimai-siyasi mövqeyinə görə qazanıb.
Yubilyarın yaradıcılıq yolu barədə söz açan şair-publisist, “Kredo” qəzetinin baş redaktoru Əlirza Xələfli qeyd etdi ki, Mədət müəllim 65 yaşa təcrübəli jurnalist, istedadlı şair-publisist kimi çatıb.
Sonra MŞ İdarə Heyətinin üzvü Yadigar Məmmədli, “Novoye vremya” qəzetinin baş redaktoru Şakir Ağayev, İƏT Ölkələri Jurnalistlər Assosiasiyasının prezidenti Fazil Güney, Ahıl Jurnalistlər Məclisinin sədr müavini Əminə Yusifqızı, əməkdar jurnalist Rəhim Hüseynzadə, Qaçqkomun əməkdaşı Elşən Əliyev, tədqiqatçı jurnalist Loğman Rəşidzadə, veteran jurnalist Xalidə Bağırlı, AMEA-nın əməkdaşları Elçin Mehrəliyev və Yaqut Əşrəfova, “Söz” jurnalının baş redaktoru Sevda Əlibəyli, Respublika Şəhid Ailələri Müdafiə Cəmiyyətinin sədri Camal Əliyev, Mədət Məmmədovun Azərbaycanın müstəqilliyinin ilk illərində azad media quruculuğundakı fəal iştirakından, istedadlı şair və yetkin qələm sahibi olmasından söz açdılar, ona səmimi təbriklərini çatdırdılar.
Sonda Mədət Məmmədov həyat yoluna və fəaliyyətinə verilən yüksək dəyərə görə toplantı iştirakçılarına təşəkkürünü bildirdi.
T.RÜSTƏMLİ
XQ