Azərbaycanın Xalq rəssamı, görkəmli fırça ustası Mikayıl Abdullayevin hələ 1950-ci illərdə yaratdığı “Anaların gəncliyi” tablosu ölkəmizin milli rəngkarlıq sənətində xüsusi yer tutur.
Tabloda yeni dünya ilə ayaqlaşmağa çalışan, öz hüquqlarını başa düşən gənc qadından söhbət gedir. O, tək deyil. Rəssam onun qarşısında daha iki qadın surəti təsvir edib. Üzləri görünməsə də, onların daha yaşlı olduqları sezilir. Bu, keçmişlə indinin qarşı-qarşıya qoyulmasıdır. Qadın üzünü çevirsə də, oğrun baxışlarla arxaya baxır, bilmək istəyir ki, onun davamçıları olacaqmı?
Qeyd edək ki, güclü və parlaq rənglərin kətan üzərində ahəngdar əksi Mikayıl Abdullayev yaradıcılığının əsas xüsusiyyətlərindəndir. Rəssam bu sənət nümunəsində də sarı, göy, qırmızı kimi güclü və isti rəngləri bir yerdə istifadə etməklə təsirli rəng kompozisiyası yaradıb.
“Anaların gəncliyi” tablosu hazırda Azərbaycan Dövlət Rəsm Qalereyasının kolleksiyasında saxlanılır və nümayiş etdirilir.
Leyla HADİ,
tələbə-jurnalist
.jpg)
