Alimlərin araşdırmasına görə, nəhəng WOH G64 ulduzu 2014-cü ildə ciddi dəyişikliklər keçirib və indi partlayışa – yəni fövqəlnovaya – hazırlaşa bilər. Tədqiqatın nəticələri Nature Astronomy jurnalında dərc olunub.

WOH G64 Böyük Maqellan Buludu adlı qalaktikada yerləşir. Bu qalaktika isə Süd Yolunun ətrafında fırlanır. Ulduz 1970-ci illərdə kəşf edilib və məlum olub ki, o, inanılmaz dərəcədə böyükdür – radiusu Günəşdən 1500 dəfədən çoxdur.

2024-cü ildə astronomlar onu detallı şəkildə görüntüləyə biliblər. Şəkillərdə ulduzun ətrafında qalın toz təbəqəsi görünür. Bu isə onun yaşlandıqca kütlə itirdiyini göstərir.

WOH G64 kosmik ölçülərlə gənc sayılır – yaşı 5 milyon ildən azdır. Müqayisə üçün, Günəşin yaşı təxminən 4,6 milyard ildir. Amma bu nəhəng ulduz çox böyük olduğu üçün ömrü qısa olur.

Əvvəllər o, qırmızı fövqəlnəhəng idi. İndi isə daha nadir mərhələyə – sarı hipernəhəng mərhələsinə keçib. Bu cür dəyişikliklər adətən ulduzun ömrünün sonuna yaxın baş verir.

Alimlərin fikrincə, 2014-cü ildə ulduz səthinin böyük hissəsini kosmosa atıb. Buna ya yaxınlıqdakı başqa bir ulduzla qarşılıqlı təsir, ya da daxildə baş verən güclü proseslər səbəb ola bilər.

Belə böyük ulduzlar sonda güclü partlayışla  həyatını başa vurur. Bunun nə vaxt baş verəcəyini demək çətindir. Amma mümkündür ki, biz bu möhtəşəm kosmik hadisənin şahidi olaq.

Əgər bu baş versə, həm nadir və təsirli mənzərə yaranacaq, həm də alimlər ulduzların son mərhələsi haqqında daha çox məlumat əldə edəcəklər.

Hazırladı:

S.ELAY

XQ