Silahlı narkokuryerlər ələ keçirilib

Daxili İşlər Nazirliyinin Mətbuat Xidmətinin verdiyi məlumata görə, Ağsuda silahlı narkokuryerlər saxlanılıb.

Məlumatda bildirilir ki, Ağsu Rayon Polis Şöbəsi əməkdaşlarının həyata keçirdikləri əməliyyat zamanı narkotik vasitələrin qanunsuz dövriyyəsi ilə məşğul olan 61 yaşlı Taleh Həziyev və əvvəllər də məhkum olunmuş 60 yaşlı Mübariz Əzizov saxlanılıb.

Onların avtomobilindən 3 kiloqramdan artıq marixuana, “Kalaşnikov” markalı avtomat və patronlar aşkarlanıb.

Saxlanılanlar narkokuryerliyə cəlb edildiklərini və Ağsu rayonunda gizlədilən narkotik vasitələri pul qarşılığında deyilən yerə aparmağa razılaşdıqlarını bildiriblər.

Faktla bağlı cinayət işi başlanılıb, araşdırmalar davam etdirilir.

P.ƏMİRCANOV