“Gülüstan” sarayında “Əsrin müqaviləsi”nin 30 illiyi və Neftçilər Günü peşə bayramı münasibətilə tədbir keçirilib.

Dövlət Himni ilə başlayan tədbirdə ölkəmizin ərazi bütövlüyü uğrunda canla­rından keçən şəhidlərimizin əziz xatirəsi bir dəqiqəlik sükutla yad edilib. Sonra ötən bir il ərzində Azərbaycan Respublikasının Prezidenti cənab İlham Əliyevin çıxışların­da enerji sektoruna dair səsləndirdiyi fikir­lər əsasında hazırlanan videoçarx təqdim edilib.

ARDNŞ-in prezidenti Rövşən Nəcəf Azərbaycan Respublikasının Prezidenti İlham Əliyevin neftçilərə təbrik məktu­bunun mətnini oxuyub. Şirkət prezidenti neft-qaz sənayemizin inkişafına, neft­çilərə göstərilən davamlı dəstəyə görə Prezident İlham Əliyevə neftçilər adın­dan minnətdarlığını ifadə edib. Rövşən Nəcəf Azərbaycan xalqının ümummilli lideri, müasir Azərbaycan dövlətinin banisi, enerji strategiyasının müəllifi Heydər Əliyevin rəhbərliyi ilə imzalanan “Əsrin müqaviləsi”nin neft-qaz sənaye­sində əldə olunan uğurların təməlini qoy­duğunu, ölkəmizin davamlı və dayanıqlı sosial-iqtisadi tərəqqisinə, beynəlxalq mövqelərinin gücləndirilməsinə əlverişli zəmin yaratdığını bildirib.

Azərbaycanın dünyada neft və qaz ilə yanaşı, neft və neft-kimya məhsulları ixrac edən ölkələrdən biri kimi də mövqeyini davamlı olaraq gücləndirdiyini ifadə edən Rövşən Nəcəf şirkətin layihələrinin iqti­sadiyyata əlavə dəyər qazandırılmasında, “yaşıl” enerji keçidində, qeyri-neft sektoru­nun, kiçik və orta biznes subyektlərinin in­kişafında önəmli rol oynadığını qeyd edib.

BP-nin hasilat və əməliyyatlar üzrə icraçı vitse-prezidenti Qordon Birrel Neft­çilər Günü və “Xəzər dənizinin Azərbay­can sektorunda yerləşən “Azəri”, “Çıraq” yataqlarının və “Günəşli” yatağının dərin­likdə yerləşən hissəsinin birgə işlənməsi və hasilatın pay bölgüsü haqqında” sazi­şin imzalanmasının 30 illiyi münasibətilə təşkil olunan tədbirdə iştirakdan böyük şərəf duyduğunu ifadə edib. Vitse-prezi­dent Azərbaycanın 20 sentyabr 1994-cü il tarixindən etibarən qazanılan uğurlar sayə­sində dünyanın neft istehsal edən qlobal enerji təchizatçılarından birinə çevrildiyini bildirib.

Milyonlarla insanın enerji təhlükəsizli­yində “Azəri”, “Çıraq” və “Günəşli” yataq­larının rolundan bəhs edən Q.Birrel bu sa­zişin Azərbaycana və bütün regiona iqtisadi firavanlıq gətirdiyini vurğulayıb.

Sonra qocaman neftçi Firdovsi Əhmədov tərəfindən neftçilərin Azər­baycan Respublikasının Prezidenti cənab İlham Əliyevə ünvanladıqları təşəkkür məktubu oxunub.

Tədbir çərçivəsində əməkdaşlığa dair bir sıra sənədlərin imzalanması mərasimi olub.

Daha sonra Azərbaycan Respubli­kasının Rəqəmsal İnkişaf və Nəqliyyat Nazirliyinin və Dövlət Neft Şirkətinin birgə təşəbbüsü ilə “Əsrin müqaviləsi”nin 30-cu ildönümünə həsr olunan poçt markalarının dövriyyəyə buraxılması məqsədilə markala­rın möhürlənməsi mərasimi keçirilib. Zərflər ARDNŞ-in prezidenti Rövşən Nəcəf, Azər­baycan Respublikasının rəqəmsal inki­şaf və nəqliyyat nazirinin müavini Cavid Qurbanov, BP-nin hasilat və əməliyyatlar üzrə icraçı vitse-prezidenti Qordon Birrel, BP-nin Azərbaycan, Gürcüstan və Türkiyə üzrə regional prezidenti Qəri Counz tərə­findən möhürlənib.

Sonra mərasim bədii hissə ilə davam etdirilib.

XQ