Seçicilərin ümumi sayı 6 milyon 421 min 960 nəfərdir 

Avqustun 31-də Mərkəzi Seçki Komissiyasının sədri Məzahir Pənahov növbədənkənar parlament seçkiləri ilə əlaqədar mətbuat konfransı keçirib. 

Yerli və xarici media subyektlərinin nümayəndələri tərəfindən operativ şəkildə işıqlandırılan mətbuat konfransında Milli Məclisə seçkilərə son hazırlıq işləri barədə yekun statistik göstəricilər təqdim olunub və məlumatlar verilib. 

Məzahir Pənahov bildirib ki, seçkilərin hazırlanıb keçirilməsinə məsul orqan kimi MSK ilk gündən növbədənkənar parlament seçkilərini Seçki Məcəlləsinin və digər qa­nunvericilik aktlarının tələblərinə uyğun təşkil etməyə çalışıb. “Atdığımız bütün ad­dımlar şəffaf şəkildə həyata keçirilib, me­dia nümayəndələri də prosesləri müşahidə ediblər. Beynəlxalq qurumların müşahidə missiyaları, o cümlədən ATƏT-in Demok­ratik Təsisatlar və İnsan Hüquqları Büro­su (DTİHB) artıq avqustun əvvəllərindən Azərbaycandadır. ATƏT DTİHB bölgələr­də geniş şəkildə fəaliyyət göstərib”, – deyə MSK sədri əlavə edib. 

O, Milli Məclisdə 125 deputat yerinin və buna görə də ölkədə eyni sayda seçki dairəsinin olduğunu diqqətə çatdıraraq qeyd edib: “Ölkə üzrə ümumi seçicilərimizin sayı 6 milyon 421 min 960 nəfərdir. Daimi seçici siyahısı üzrə olan seçicilərin sayı 6 milyon 308 min 851, müvəqqəti seçicilərin sayı isə 113 min 109 nəfərdir. Daimi seçicilərin 47,57 faizi kişi, 52,43 faizi isə qadındır. Ən çox seçici 30-39 yaş aralığındadır. Onlar seçicilərin 23,64 faizini təşkil edirlər. Seç­ki günü 18 yaşı tamam olan seçicilərin sayı 374, Milli Məclisə seçkilərdə ilk dəfə iştirak edən seçicilərin sayı isə 51 min 141 nəfər­dir”. 

Bildirib ki, seçicilərimizin öz konstitusi­on hüquqlarını reallaşdırmaları üçün bütün şərait yaradılıb. Milli Məclisə seçkilər 6478 seçki məntəqəsində keçiriləcək. Onlardan 6343-ü daimi, 135-i isə müvəqqətidir. Mü­vəqqəti məntəqələr səsverməyə 5 gün qal­mış yaradılıb. 

Seçkilərlə əlaqədar yaradılan 125 dairə­nin 10-nun məcburi köçkün dairələri oldu­ğunu vurğulayan MSK sədri deyib ki, Milli Məclisə seçkilərdə 397 min 862 məcburi köçkün 574 məntəqədə səs verə biləcək. 

MSK sədri parlament seçkilərində de­putat mandatı uğrunda 990 namizədin mü­barizə aparacağını deyib. Diqqətə çatdırıb ki, deputatlığa namizədlərdən 305 nəfərinin namizədliyi 25 siyasi partiya tərəfindən irə­li sürülüb. Cəmiyyətin müxtəlif təbəqələri seçkilərdə iştirak baxımından fəallıq nü­mayiş etdirirlər. Hər dairəyə 7-dən çox na­mizəd düşür. Bu da geniş seçim imkanının olduğunu deməyə imkan verir. 

M.Pənahov qeyd edib ki, parlament seç­kilərində müşahidəçi qismində iştirak etmək üçün ümumilikdə 112 min 749 nəfər yerli müşahidəçi akkreditasiyadan keçib. Onlar­dan 65 minə yaxını 24 siyasi partiyanın mü­şahidəçiləridir. Eyni zamanda, seçkiləri mü­şahidə etmək üçün 51 beynəlxalq qurumdan və 69 ölkədən 598 nəfər akkreditə olunub. 

Onun sözlərinə görə, parlament seçkilə­ri ilə əlaqədar “exit-poll” keçirmək üçün Mərkəzi Seçki Komissiyasında üç təşkilat - Vətəndaşların Əmək Hüquqlarını Müdafiə Liqası, "Tərəqqi" sosial tədqiqatlar ictimai birliyi və “Sosioloji Tədqiqatlar Mərkəzi” qeydə alınıb. Onlardan ikisi öz fəaliyyətini xarici partnyorları ilə birgə qurublar. Bu təş­kilatlar geniş imkanlara malikdir. Təşkilatlar 2500-dən artıq məntəqədə öz fəaliyyətlərini həyata keçirəcəklər.

* * *

Avqustun 31-də Mərkəzi Seçki Ko­missiyasının sədri Məzahir Pənahov növ­bədənkənar parlament seçkilərini izləmək üçün ölkəmizdə səfərdə olan Türkiyə Yüksək Seçim Kurulunun sədri Ahmet Ye­nerin, Rusiya Federal Məclisinin Federa­siya Şurasının müşahidə missiyasının rəh­bəri Aleksandr Terentyevin, Belarus–Rusiya İttifaqının Parlament Məclisinin müşahidə missiyasının rəhbəri Sergey Raçkovun və Müstəqil Dövlətlər Birliyinin Parlament Assambleyasının (MDB PA) beynəlxalq müşahidəçilər qrupunun koordinatoru And­rey Yatskinin rəhbərlik etdikləri müşahidə missiyalarının üzvləri ilə görüşüb. 

XQ