“Qusar rayonu kəndlərinin ək­səriyyəti dağlarda yerləşir və iq­tisadiyyatının əsasını aqrar sahə təşkil edir. Əhali taxılçılıq, tərəvəz­çilik, meyvəçilik və heyvandarlıq­la məşğul olur. Rayonda keçirilən tədbirlərdə, el şənliklərində hamı bir yerdə olur. İndiyədək keçirilən seçkilərdə əhali mütəşəkkil iştirak edib, seçki məntəqələrinə gələrək istədikləri namizədə səs veriblər. Elə seçki məntəqələri olub ki, ora­da səs vermək üçün uzun növbələr olub. Əminəm ki, qarşıdan gələn növbədənkənar parlament seçkilə­rində də belə olacaq”.

Seçkilərə hazırlıqdan söhbət açan 61 saylı Qusar dairə seçki komissiyasının sədri Cəlil İbrahimov əlavə etdi ki, hazır­da seçkilərə hazırlıq mərhələsini yaşayırıq. Deputat mandatı qazanmaq istəyənlərin namizədliklərini irəli sürmə prosesi davam edir. Hələlik 4 nəfərin namizədliyi təs­diqlənib və onlara imza vərəqələri verilib. Üç nəfəri isə öz razılığı ilə namizədliyini geri götürüb. Onlara heç bir təzyiq göstə­rilməyib və ya süni əngəl yaradılmayıb. Görünür, mübarizəni sona qədər aparacaq­larına əmin deyillər. Çünki namizədlikləri təsdiqlənənələr 450 etibarlı imza toplama­lıdırlar. Bu, o qədər də asan məsələ deyil. Bundan sonra qarşıda daha çətin proseslər durur. Ona görə də özünə arxayın olmayan­lar namizədliklərini geri götürüblər. 

Siyahılar dəqiqləşdirilir

DSK sədri bildirdi ki, qarşıda duran daha bir ciddi məsələ də seçici siyahıları­nın dəqiqləşdirilməsidir. Onun sözlərinə görə, indiyədək 51 min 704 nəfər seçici müəyyənləşdirilib. Lakin siyahı tez-tez də­yişə bilər. Bunların arasında qəflətən dün­yasını dəyişənlər, ərazimizə qonaq və ya turist kimi gələnlər olur. Ona görə də seçici siyahısının tam dəqiqləşdirilməsi barədə qəti qərar verə bilmirik. Bu qədər seçici­nin 65 seçki məntəqəsində səs verəcəyi qərara alınıb. Seçki məntəqələrində hazır­lıq işləri başa çatmaq üzrədir. Bu prosesi zamanı tələb olunan bütün ləvazimatlar məntəqələrə çatdırılıb. Hazırda seçici siya­hılarının müvafiq yerlərdən asılması işləri gedir. 

C.İbrahimov aşağı seçki komissiya üzvlərinin maarifləndirilməsindən də söh­bət açdı. O dedi ki, istər dairə, istərsə də məntəqə seçki komissiyalarının üzvlərinin maarifləndirmə tədbirlərində və treninqlər­də iştirakı vacibdir.

Maarifləndirmə tədbirləri

Sədr dedi ki, indiyədək Mərkəzi Seçki Komissiyasının Daxili İşlər Nazirliyi ilə birgə layihəsi çərçivəsində keçirilən regi­onal seminar-müşavirələrdə bütün dairə seçki komissiyalarının sədrləri, məhkəmə hakimləri və polis orqanlarının nümayən­dələri iştirak edirlər. Maarifləndirmə və məlumatlandırma xarakterli seminar-mü­şavirədə seçkilərin hazırlanıb keçirilməsin­də, seçkiqabağı təşviqat dövründə, habelə səsvermə günü və ondan sonrakı proses­lərdə polis əməkdaşlarının qanunvericiliklə müəyyənləşdirilmiş rol və vəzifələri barədə təqdimatlar keçirilir, çıxışlar dinlənilir və müzakirələr aparılır. Bütün bunlar səsver­mə günü qarşıya çıxan problemlərin aradan qaldırılmasında mühüm rol oynayır. 

Əliqismət BƏDƏLOV
XQ