İyulun 14-də ümummilli lider Heydər Əliyevin Azərbaycanda birinci dəfə hakimiyyətə gəlişinin 55 illiyi tamam olur. Sovet İttifaqı tərkibində xalqımızın milli intibahına başlanğıc olmuş bu tarixi gün sonrakı möhtəşəm gedişatla ölkəmizi 22 il sonrakı dövlət müstəqilliyinin bərpasına yönləndirib və suverenlik epoxasının zəruri əsaslarını hazırlayıb. Bugünlərdə şəhər və rayonlarımızda, ayrı-ayrı qurumlarda keçirilən çoxsaylı toplantılarda Ulu öndəri Azərbaycanın siyasi hakimiyyət sükanı arxasına gətirmiş günün tarixi önəmi və taleyüklü uğurların qazanmasına başlanğıc olması qədirbilənliklə qeyd olunur. 

Abşeron

Xırdalandakı Heydər Əliyev Mərkə­zində Ümummilli liderin ölkəmizdə siyasi hakimiyyətə gəlməsinin 55 illiyi təntənə ilə qeyd edilib. 

Abşeron Rayon İcra Hakimiyyətinin təşkilatçılığı ilə “14 iyul 1969-cu il - Qüd­rətli Azərbaycanın inkişaf yolunun başlan­ğıcı” mövzusunda keçirilən konfransda iştirak edən rayon rəhbərliyi, hüquq-mü­hafizə orqanlarının, idarə və təşkilatların əməkdaşları, şəhid ailələri, müharibə iş­tirakçıları və ictimaiyyət nümayəndələri əvvəlcə Heydər Əliyev Mərkəzini ziyarət ediblər, Ulu öndərin həyat və fəaliyyətini əks etdirən foto və video materiallarla ta­nış olublar. Sonra Heydər Əliyevin həyat və fəaliyyətinə həsr edilmiş videoçarx nü­mayiş olunub.

Abşeron Rayon İcra Hakimiyyətinin başçısı Abdin Fərzəliyev Heydər Əliyevin ölkəmizdə birinci dəfə siyasi hakimiyyətə gəldiyi 1969-cu il 14 iyul tarixinin önəmini qeyd edib: “Bu tarix Azərbaycanın xilası­nın birinci mərhələsi, xalqın özünə qayıdış tarixidir. Heydər Əliyev siyasi fəaliyyətinin bütün mərhələlərində Vətənə, xalqa, tor­pağa sonsuz məhəbbət və sədaqət hissi ilə, qurub-yaratmaq amalı ilə yanaşıb, hər zaman milli dəyərlərə bağlı olub”.

Bildirilib ki, bütün həyatı boyunca daim Vətənini, onun suverenliyini, dövlə­timizin güclənməsini düşünən Heydər Əli­yev Azərbaycanın ən çətin məqamlarında onu üzləşdiyi faciələrdən, çətinliklərdən, bir dövlət kimi məhv olmaq təhlükəsindən xilas etmək üçün misilsiz xidmətlər göstə­rib. Bu gün ümummilli lider Heydər Əliye­vin müəyyənləşdirdiyi siyasi kursu uğurla davam etdirən Prezident İlham Əliyev, Müzəffər Ali Baş Komandan kimi Vətəni­mizin ərazi bütövlüyünü təmin edib.

YAP Abşeron rayon təşkilatının sədri Abbas Əliyev, Abşeron RİH yanında İc­timai Şuranın sədri, şəhid anası Xatirə İsmayılova, Əkinçilik Elmi-Tədqiqat İns­titutunun direktoru Faiq Xudayev, Saray qəsəbə 3 saylı tam orta məktəbin direkto­ru, Əməkdar müəllim Təyyubə Hüseyno­va Ulu öndərin Azərbaycan xalqı qarşısın­da əvəzolunmaz xidmətlərindən danışıb, dahi şəxsiyyətin hər zaman qürur və if­tixar hissi ilə xatırlandığını, ehtiramla yad edildiyini bildiriblər.

Neftçala

Neftçala rayonunda ulu öndər Heydər Əliyevin ilk dəfə siyasi hakimiyyətə gəl­məsi ilə əlaqədar olaraq “14 İyul 1969-cu il: Qüdrətli Azərbaycanımızın uğurlu təməl tarixi” mövzusunda konfrans keçirilib.

Rayon icra hakimiyyətinin başçısı Mirhəsən Seyidov məslisdə bildirib ki, ölkəmizin çoxəsrlik dövlətçilik tarixində Heydər Əliyev epoxasının müstəsna yeri var. Ulu öndərin Azərbaycanda 55 il öncə birinci dəfə siyasi hakimiyyətə gəldiyi 1969-cu ilin 14 iyul günü xalqımızın tarixi taleyində oynadığı misilsiz rolu ilə daim xatırlanır. Bu tarix Azərbaycanın xilasının birinci mərhələsi, xalqın özünəqayıdış ta­rixidir. 

Veteran dövlət qulluqçusu Oktay Kəri­mov, tarixçi Firdovsi Tağıyev, “Gündoğar” qəzetinin redaktoru Bədirə Niftəliyeva və başqaları qeyd ediblər ki, qüdrətli lider kimi Heydər Əliyev XX yüzilliyin 60-cı illə­rində Azərbaycanın iqtisadi göstəricilərinə görə ittifaq respublikaları arasında so­nuncu yerdə olduğu bir şəraitdə rəhbər­liyə gələrək ölkəmizi böhrandan çıxaran tərəqqi yoluna yönəldib. Bu yol sonralar Azərbaycanı dövlət müstəqilliyinə qovuş­durub.

Zaqatala

Əlamətdar tarixlər böyük şəxsiyyətlə­rin misilsiz xidmətləri ilə yaranır. 1969-cu ilin 14 iyulu da məhz belə tarixlərdəndir. Əlli beş il əvvələ qədər bu gün Azərbay­canın həyatında, bəlkə də sıradan bir gün idi. Ancaq zəmanəsinin böyük şəxsiy­yətlərindən olan ümummilli lider Heydər Əliyevin adı, həyat və fəaliyyəti, zəngin irsi bu günə xüsusi məna qazandırdı, bu günü milli dövlətçilik tariximizin ən əhə­miyyətli və şərəfli səhifələrindən birinə çevirdi. 14 iyul 1969-cu il Heydər Əliye­vin Azərbaycana rəhbər seçildiyi gündür. Həmin gündən Azərbaycanda yeni tarix başlanıb. Bu, xalqın milli ideyalar ətrafın­da səfərbər olunması, milli dövlətimizin yüksəlişi dövrüdür. Ötən əsrin sonlarına doğru Azərbaycanın müstəqillik nemətinə qovuşmasında və indiki uğurlarında hə­min dövrün çox böyük rolu var.

Ümummilli lider Heydər Əliyevin Azər­baycanda birinci dəfə siyasi hakimiyyətə gəlməsinin ildönümü münasibətilə iyu­lun 13-də Zaqatala şəhərində keçirilən “Heydər Əliyev və qüdrətli Azərbaycan” mövzusunda elmi-praktik konfrans keçirilib.

Zaqatala Rayon İcra Hakimiyyəti baş­çısının birinci müavini Tofiq Əhmədovun məruzəsində Ümummilli liderin zəngin həyat yolu və çoxsahəli fəaliyyətindən ge­niş bəhs olunub. Bildirilib ki, Ulu öndərin respublikaya birinci rəhbərlik dövrü çağ­daş tariximizə iqtisadi və mədəni yüksəliş dövrü kimi daxil olub, xalqın milli mənlik şüurunun, özünüdərk hissinin güclənmə­sinə təkan verib. Böyük rəhbər respubli­kaya birinci rəhbərlik dövründə, ilk növbə­də, gələcək iqtisadi müstəqilliyə etibarlı zəmin formalaşdırıb. 

YAP Zaqatala rayon təşkilatının sədri Fərid Ramazanov, rayon Mərkəzi Xəstəxanasının direktoru Tamara Nurəli­yeva, Maqov kənd ərazi dairəsi üzrə nü­mayəndə Rəcəb Davudov qeyd ediblər ki, Ulu öndərin uzaqgörənliyi, müdrikliyi və zəngin biliyi ölkəmizin bütün sahələr üzrə dinamik inkişafına zəmin yaradıb, illər keçdikcə Azərbaycan ittifaq məkanında qabaqcıllar sırasına yüksəlib. Unudulmaz liderinideyaları hər zaman inkişafımızın təməl daşı olaraq qalacaq. Dahi şəxsiy­yətin layiqli davamçısı olan Prezident İlham Əliyevin müdrik rəhbərliyi ilə Azər­baycanın tarixində görünməmiş inkişaf baş verib.

Naftalan

Naftalan Şəhər İcra Hakimiyyətinin və Heydər Əliyev Mərkəzinin birgə təşki­latçılığı ilə “14 iyul 1969-cu il - yüksəlişin başlanğıcı” mövzusunda toplantı keçirilib.

Məclisdə şəhər icra hakimiyyətinin məsul əməkdaşları, YAP Naftalan şəhər təşkilatının, şəhər Ağsaqqallar Şurasının sədrləri, idarə, müəssisə və təşkilat rəh­bərləri, ziyalılar iştirak ediblər. Əvvəlcə Heydər Əliyev Mərkəzində ümummilli li­derin şərəfli ömür yolunu özündə əks et­dirən foto-ekspozisiyalara baxış keçirilib. Müstəqil Azərbaycanın memarı və quru­cusu ulu öndər Heydər Əliyev haqqında film nümayiş etdirilib.

Dünya şöhrətli siyasət və dövlət xa­dimi Heydər Əliyevin Azərbaycan dövləti və xalqı qarşısında müstəsna xidmətlə­rindən geniş söhbət açan natiqlər qeyd ediblər ki, Azərbaycanın çoxəsrlik dövlət­çilik tarixində Heydər Əliyevin Azərbayca­na rəhbərliyinin hər iki dövrünün misilsiz yeri və önəmi var. Bu dövr öz başlanğıcını 1969-cu ilin 14 iyulundan götürüb. Həmin ildən başlayan inkişaf və rifah yolu Azər­baycanın gələcək tərəqqisinin əsası olub. O illərdə yaradılan sosial-iqtisadi və siya­si-ideoloji təməl respublikamızın bugünkü yüksəlişinin sütunlarındandır. 

Bildirilib ki, ümummilli lider Heydər Əliyevin Azərbaycanda siyasi hakimiyyətə gəldiyi həmin gün ölkəmizdə müstəqil və qüdrətli Azərbaycan dövlətinin əldə etdiyi bütün uğurların təməl tarixi, həm də Azər­baycan xalqının özünəqayıdışının baş­lanğıcı kimi xatırlanır. Ulu öndərin uğurla həyata keçirdiyi siyasət Prezident İlham Əliyevin rəhbərliyi ilə müasir dövrün tələb­lərinə uyğun davam etdirilir. 

XQ