Dünən Beynəlxalq Mina Xəbərdarlığı və Mina Aksiyasına Yardım Günü münasibətilə Tərtərdə toplantı keçirilib.
Azərbaycan Respublikası Minatəmizləmə Agentliyi yanında İctimai Şuranın üzvləri, Azərbaycanın aparıcı QHT rəhbərləri, bir sıra beynəlxalq təşkilatların nümayəndələri, Beynəlxalq Avrasiya Mətbuat Fondunun icra etdiyi Azərbaycanın ilk Qadın minaaxtaranları, Qeyri-Texniki Təhqiqat və Partlayıcı sursatların təhlükəsinə dair maarifləndirmə layihələrinin əməkdaşları, mina qurbanları və onların ailə üzvlərinin iştirakı ilə keçirilən mərasimdə BAMF-ın prezidenti və ANAMA yanında İctimai Şuranın sədri Umud Mirzəyev dünyada və Azərbaycanda mina təhlükəsindən, onun yaratdığı fəsadlardan danışıb.
Minalar Əleyhinə Azərbaycan Kampaniyasının sədri Hafiz Səfixanov bildirib ki, Azərbaycandakı mina qurbanlarının sayı Cənubi Qafqazın digər ərazilərindəki bütün mina qurbanlarının sayından çoxdur. Bu səbəbdən bildirdi ki, maarifləndirmə proqramlarında verilən tövsiyələrə ciddi əməl etmək lazımdır.
Mina qurbanları – ANAMA yanında İctimai Şuranın üzvü Hafiz Əzimzadə, Minadan Zərərçəkənlər Assosiasiyası birliyinin sədri Rey Kərimoğlu ölkəmizdəki minadan zərərçəkənlərin problemlərindən, Azərbaycan dövlətinin bu istiqamətdə gördüyü işlərdən danışıblar.
Sonra vətəndaş cəmiyyəti qurumları, minadan zərərçəkənlər və mina qurbanlarının ailə üzvlərinin imzası ilə dünya ictimaiyyətinə müraciət qəbul olunub.
XQ