Tanınmış Azərbaycan şairi, əslən Gürcüstanın Bolnisi rayonunun Saraçlı kəndindən olan AYB-nin üzvü Nizami Saraçlı da haqq dünyasına qovuşdu. O, bu gün doğma Saraçlı kəndində torpağa tapşırılacaq.
Nizami Saraçlının “Aramıza düşən yaylıq” adlı ilk kitabı 1986-cı ildə çap olunub. Təəssüf ki, bundan 38 il sonra araya yaylıq kimi düşən ayrılıq onu aramızdan apardı. Yüksək vətənpərvərlik ruhu aşılayan gözəl şeirlər yazan Nizami Saraçlı 20-dən çox kitabın və “Dosta gedən yorulmaz” adlı 8 cildliyin müəllifi idi. Azərbaycan Silahlı Qüvvələrinin mayoru kimi Qarabağ döyüşlərində iştirak edib. “N” saylı hərbi hissənin şəxsi heyət üzrə komandir müavini olub və sonralar Azərbaycan Radio və Televiziyasında böyük redaktor vəsifəsində çalışıb.
Qarabağ qazisi olan istedadlı şair Nizami Saraçlı “Qurban Türkün bayrağına”, “Qafqaz İslam ordusu”, “Bakı Təbriz Ankara”, “Ey sabahın zabitləri” kimi onlarla mahnı və marşın sözlərini yazıb. O, Mutlutürk təxəllüsü ilə Türk ellərində sevilərək tanınıb, Turan şairi kimi Vətənə, Türk ellərinə şeirlər ithaf edib. Qələmə aldığı poeziya nümunələri tez-tez Azərbaycanda, eləcə də bütün Türk dünyasında nəşr olunan qəzet və jurnallarda dərc olunub, sevilə-sevilə oxunub. Onun şeirlərinə türk seriallarında mahnılar bəstələnib, həmçinin söz müəllifi olduğu “Tanrı Türkə yar olsun!” mahnısını Osmanlı İmperiyası haqqında çəkilmiş məşhur “Diriliş Ərtoğrul” teleserialında istedadlı müğənnimiz Şəmistan Əlizamanlı böyük sevgi ilə səsləndirib.
Şair Nizami Saraçlı 1991-ci ildə 43 ölkədən olan 3 min 500 şairin iştirak etdiyi müsabiqənin qalibi olaraq "Beynəlxalq Peyğəmbər" mükafatı alıb, 1993-cü ildə Gürcüstanın ali mükafatı – “Şərəf” ordeni ilə təltif olunub. 2002-ci ildə isə 5 ölkənin sədrliyi ilə Avrasiya Beynəlxalq Mətbuat Fondunun təsis etdiyi “Dünya həqiqətlərini ictimaiyyətə çatdırdığına və döyüş xidmətlərinə görə Avrasiya mükafatı”na layiq görülüb. Həmin ildə ona 2-ci dəfə olaraq Gürcüstanın “Şərəf” ordeni təqdim edilib. Nizami Saraçlı 2003-cü ildə 7 ölkə şairlərinin müsabiqəsinə qatılıb və qalib olaraq Beynəlxalq “Abay” mükafatına sahiblənib.
Şair-qazi, 74 yaşlı Nizami Saraçlının ölümündən kədərləndiyimizi bildirir, qohum-əqrabasına, yaxınlarına başsağlığı veririk. Məkanı cənnət olsun! – deyirik.
Nizami MƏMMƏDZADƏ,
Gürcüstan Azərbaycanlı Jurnalistlər Birliyinin sədri
