6 saylı Ordubad–Culfa dairə seçki komissiyasının sədri Həsən Həsənov növbədənkənar prezident seçkiləri üzrə görülən hazırlıq işlərindən danışarkən dedi ki, demək olar ki, bütün məntəqələr seçkiyə tam hazırdır. Ümumiyyətlə, Naxçıvanda bütün seçkilər həmişə demokratik və şəffaf keçirilib. İndiyədək keçirilən seçkilərdə heç bir insident qeydə alınmayıb. Bunu seçkiləri izləyən beynəlxalq müşahidəçilərin müsbət rəyləri də təsdiqləyir. Növbədənkənar seçkilərin də yüksək səviyyədə keçirliləcəyinə tam əminik.
DSK sədri dedi ki, Ordubad–Culfa seçki dairəsində də seçkilərə hazırlıq yüksək səviyyədə aparılır. Çalışırıq ki, ötən seçkilərdə olduğu kimi, builki seçkilərdə də nümunəvi olaq. Bundan ötrü bütün imkanlardan istifadə olunur. Seçki məntəqələri avadanlıqlar, metodiki vəsaitlər, MSK tərəfindən hazırlanmış təlimatlar və seçki materialları ilə təmin olunub. Sədr, katib, komissiya üzvləri və müşahidəçilər üçün əlverişli şərait ayrılıb. Səsvermə kabinələri tam hazır vəziyyətdədir. Ötən seçkilərdə olduğu kimi, bu il də seçicilərin barmaqlarının gözlə görünməyən mürəkkəblə işarələnməsindən istifadə olunacaq. Bu üsul aşkarlığın təmin olunmasında çox əhəmiyyətlidir. Çünki barmağı işarələnmiş seçici digər məntəqədə təkrar səs verə bilməz. Bütün seçki məntəqələrində seçicilərin barmaqları bənövşəyi lampalarla yoxlanılır.
H.Həsənov aşağı seçki komissiya üzvlərinin maarifləndirici proqramlara cəlb edilməsindən də söhbət açdı. Eyni zamanda, məntəqə seçki komissiyasının üzvləri üçün seçkinin keçirilməsi və protokolların doldurulması ilə əlaqədar gündəlik treninqlər keçirilib. Mərkəzi Seçki Komissiyasının maarifləndirmə proqramı çərçivəsində treninqlərdə aşağı seçki komissiya üzvlərinin bilik və bacarıqları daha da təkmilləşdirilib. Növbəti təlim Ordubad rayonunda təşkil olunub. Təlimlərdə hər bir iştirakçıya istifadə etmək və yaxından tanış olmaq üçün Mərkəzi Seçki Komissiyası tərəfindən hazırlanan “Seçki günü üçün yaddaş” kitabçası, eləcə də səsvermənin nəticələri haqqında protokol nümunəsi və bir sıra digər zəruri metodiki vəsaitlər, əyani materiallar təqdim olunub. Bununla yanaşı, onlar seçki məntəqələrinin səsverməyə hazırlanması, səsvermə prosesi, seçki günü müstəsna hallar, səslərin sayılması və səsvermənin nəticələri haqqında rəsmi protokolların doldurulması da daxil olmaqla, bütün prosedurlar barədə ətraflı məlumat əldə edirlər.
DSK sədri bildirdi ki, növbədənkənar prezident seçkilərində dairə üzrə 63 seçki məntəqəsi yaradılıb və 46 min 138 nəfər seçici qeydə alınıb. Onlardan 80 nəfəri ilk dəfə səs verəcək. Yeddi seçki məntəqəsində veb-kamera quraşdırılıb ki, onlardan 5-i Ordubad, 2-si isə Culfa rayonu ərazisindədir. Seçkilərdə bütün seçicilərin iştirakı təmin olunacaq. O cümlədən, sağlamlıq imkanları məhdud şəxslər üçün də daşınan qutu vasitəsilə səsvermə imkanı yaradılacaq. Biz seçicilərin yolunu gözləyirik.
Əliqismət BƏDƏLOV
XQ