Fevralın 7-nə təyin olunmuş növbədənkənar prezident seçkiləri ilə bağlı Şuşa, Xankəndi, Suqovuşan və Ağalıda “exit-poll” keçiriləcək. Bu barədə Mərkəzi Seçki Komissiyasının sədrinin müavini Rövzət Qasımov məlumat verib.
Onun sözlərinə görə, Vətəndaşların Əmək Hüquqlarını Müdafiə Liqası ABŞ-nin “Oracle Advisory Group” təşkilatı ilə birgə 40 seçki dairəsi üzrə 500 seçki məntəqəsində “exit-poll” keçirəcək: “Bu seçki məntəqələrindən 6-sı işğaldan azad edilmiş ərazilərdədir. Bunlar 84 saylı Füzuli seçki dairəsinin 75 saylı, 97 saylı, Tərtər–Naftalan–Goranboy seçki dairəsinin Suqovuşanda yerləşən 58 saylı seçki məntəqəsi, 118 saylı Ağdam şəhər seçki dairəsinin 57 saylı seçki məntəqəsi, 122 saylı Xankəndi seçki dairəsinin Xankəndi şəhərində yerləşən 14 saylı seçki məntəqəsi, 124 saylı Şuşa–Ağdam–Xocalı–Xocavənd seçki dairəsinin Şuşada yerləşən 105 saylı seçki məntəqəsi və 125 saylı Zəngilan–Qubadlı seçki dairəsinin Ağalı kəndində yerləşən 33 saylı seçki məntəqəsidir”.
R.Qasımov deyib ki, Mərkəzi Seçki Komissiyası fevralın 7-də keçiriləcək prezident seçkilərində “exit-poll” keçirmək üçün müraciət edən digər təşkilatları – “Rəy” Monitorinq Mərkəzini və “Sosioloji Tədqiqatlar Mərkəzi” MMC-ni qeydiyyata alıb.
Əliqismət BƏDƏLOV
XQ