Azərbaycan Dillər Universitetində “Bir günlük xəlifə” layihəsində iştirak edən tələbələr vəzifələrinin icrasına başlayıblar. Builki layihə ümummilli lider Heydər Əliyevin 100 illik yubileyinə həsr olundu.

Tələbələr universitetin rektoru, prorektorlar, fakültə dekanları da daxil olmaqla 37 rəhbər vəzifəni icra edəcəklər. Vəzifələri tutan şəxslər həmin gündən universitetin “kölgə ka­bineti”ni formalaşdırır ki, bu ka­binet növbəti “Xəlifə günü”nə qədər öz fəaliyyətini davam etdirir.

Həmin gün rəhbər vəzifələ­ri icra edən tələbələrin qərarla­rı tam hüquqi qüvvəyə malik­dir. Rektor Kamal Abdullanın qərarı ilə “Bir günlük xəlifə” tələbə özünüidarəetmə gü­nündə müvafiq vəzifələri tutan tələbə, magistr və doktorantlar icra etdikləri vəzifənin maaşını da alırlar.

ADU-nun xəlifə-rektoru Nicat Quluzadə müvafiq və­zifələrə xəlifə seçilmiş tələ­bələrlə ümumi iclası maraqlı keçdi, qarşıda duran işlərlə bağlı müzakirələr aparıldı, tap­şırıqlar verildi. Xəlifə-rektor Pakistanın ölkəmizdəki səfiri­nin birinci müavini Moazzam Ali Sahito ilə görüşdü. Dip­lomat ADU-nun “Bir günlük xəlifə” layihəsini yüksək qiy­mətləndirdi. Görüşdə, eyni za­manda, ADU-nun Pakistan dil və mədəniyyət mərkəzinin fəa­liyyəti yüksək qiymətləndirildi, gələcək əməkdaşlıqla bağlı fikir mübadiləsi aparıldı.

Nicat Quluzadə və Bey­nəlxalq əlaqələr üzrə prorektor Əli Rzayev Braziliya Federativ Respublikasının ölkəmizdəki fövqəladə və səlahiyyətli səfiri Manuel Adalberto Karlos Mon­teneqro Lopes da Kruzla da görüşdülər. Səfir “Bir günlük xəlifə” layihəsinin əhəmiyyətin­dən danışdı.

Universitetin mətbuat xid­mətinin rəhbəri Cavid Zeynallı “XQ”-yə açıqlamasında bildirdi ki, bu addım ADU-nun rəhbər­liyinin tələbələrin idarəetmədə təcrübə qazanmalarına he­sablanan vacib təşəbbüsüdür. “Bir günlük xəlifə” layihəsi uni­versitetdə 2017-ci ildən təşkil olunur. Tələbə, magistr və dok­torantlar bir gün ərzində rektor, prorektor, dekan, mərkəz və şöbə müdirləri olurlar. Onlar bir gün ərzində universitetdə təd­ris prosesi, inzibati və sair işlər­lə bağlı qərarlar qəbul edir, bir sıra yeniliklər həyata keçirirlər.

Xəlifə-rektor Nicat Quluza­də isə “XQ”-yə öz kabinetində müsahibə verdi. O bildirdi ki, 17 nəfər namizəd arasından xəlifələr səsvermə yolu ilə se­çiliblər. Onun özü rektor seçil­məyinə səbəb kimi universitet həyatında fəal tələbə olmasını göstərdi. Sonra isə dedi ki, gün ərzində ona yaxınlaşıb, nəsə xahiş edən tələbələr də olub. O, rektorun xidməti maşınının bir tələbəni yaşadığı evdən universitetə gətirməsinin gözəl hiss olduğunu da dilə gətirdi. 

Nicat Quluzadə sonda bildirdi ki, onlara göstərilən etimadı ən yüksək səviyyədə doğrultmağa çalışacaqlar. O, hər bir gəncin öz imkanları daxilində dövlətinin, millətinin daha parlaq gələcəyi üçün çalışmasının vacibliyini qeyd etdi.

Rizvan FİKRƏTOĞLU
XQ