Bolqarıstanda rəsmi səfərdə olan Sahibə Qafarovanın rəhbərliyi ilə parlament nümayəndə heyəti Sofiya Universitetinin nəzdində fəaliyyət göstərən Azərbaycan Dili və Mədəniyyəti Mərkəzi ilə tanış olub. Ona mərkəzin fəaliyyəti haqqında geniş məlumat verilib.
Milli Məclisin Mətbuat və ictimaiyyətlə əlaqələr şöbəsindən verilən məlumata görə, parlamentin Sədri, mərkəzə Azərbaycan xalqının ümummilli lideri, müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin 100 illik yubileyi münasibətilə Milli Məclis tərəfindən nəşr olunmuş kitabları hədiyyə edib. O, mərkəz əməkdaşlarına və tədbir iştirakçılarına ulu öndərin Azərbaycan xalqı və dövlətçiliyi qarşısında misilsiz xidmətləri haqqında geniş məlumat verib. Həmçinin mərkəzə “Qarabağ işğaldan əvvəl və sonra” adlı kitabı təqdim edərək, Ermənistanın 30 illik işğalı zamanı ərazilərimizdə, şəhər və rayonlarımızda törətdiyi dağıntılar, vəhşiliklər barədə məlumat verib.
Sahibə xanım daha sonra Azərbaycan dilini öyrənən bolqar tələbələrlə görüşüb və xatirə kitabını imzalayıb.
***
Həmin gün S. Qafarovanın başçılığı ilə parlament nümayəndə heyəti Sofiya şəhərində yerləşən Bakı küçəsinə gəlib və ümummilli lider Heydər Əliyevin 100 illik yubileyinə həsr olunmuş ağacəkmə aksiyasında iştirak edib.
Ə.BƏDƏLOV
XQ
.jpg)
