Türk Ağsaqqalları Birliyi – TAİB gənclərinin təşkilatçılığı ilə  "Azərbaycanın xaricdə təbliğatı, Heydər Əliyev irsinə sadiqlik və diasporla əməkdaşlıq müstəvisində müasir yanaşmalar" adlı dəyirmi masa keçirilib.

Tədbirdə qonaq qismində ABŞ-da yaşayan soydaşımız, Amerika-Azərbaycan Gənclər və İdman Assosiasiyasının sədri, dünya çempionu Elgün Xanoğlanlı da iştirak edib.

Ulu Öndər Heydər Əliyevin 100 illiyi  çərçivəsində keçirilən  dəyirmi masada əvvəlcə Elgün Xanoğlanlının ABŞ-da Azərbaycanın təbliğ olunması istiqamətində görülən işlərdən söhbət açıb. Qonaq qeyd edib ki, 44 günlük Vətən müharibəsində əldə olunan qələbə, torpaqlarımızın işğaldan azad olunması, ölkəmizin nüfuzunun artmasına səbəb olub: “Müzəffər Ordumuzun qəhrəmanlığı, Prezidentimizin qətiyyəti, heyrətamiz idarəçilik məharəti, sözssüz ki, xaricdə yaşayan azərbaycanlılara münasibətə təsir edir. Daha biz əvvəlki kimi başıaşağı gəzmirik. Dövlətimizlə, Ordumuz və Prezidentimizlə qürur duyuruq” deyə, E.Xanoğlanlı bildirib.
Dəyirmi masanın mövzusunun əhəmiyyətindən dənışan E.Xanoğlanlı TAİB rəhbərliyinə və Gənclər Təşkilatına minnətdarlığını da ifadə edib.

Tədbirdə çıxış edən TAİB İdarə Heyətinin üzvlərinə Gənclər Təşkilatının Təmsilçiləri dövlətimizin və bilavasitə Cənab Prezidentin gənclərə diqqət və  qayğısından söz açaraq, təşkilatın "2023- Heydər Əliyev ili" çərçivəsində görülmüş  işlərdən, həyata keçirilmiş  layihələrdən danışıblar. Çıxışçılar Azərbaycanın xaricdə təbliğ olunması işində diasporumuzun üzərinə düşən vəzifələrdən bəhs edərək, Ulu Öndər Heydər Əliyevin diasporumuzun inkişafına verdiyi önəmdən söz açıblar.

İdarə Heyətinin üzvləri qeyd ediblər ki, yeni dövr  təbliğat işləri xüsusunda da yeni yanaşmalara tələb var.  TAİB təmsilçiləri bildiriblər ki, qarşıdakı dövrdə də Azərbaycan həqiqətlərini dünyaya yaymaq  kimi vacib istiqamətə xüsusi diqqət ayıracaqlar.

Tədbirin sonunda qonaq "Türk Dünyası Ağsaqqalları" qəzetilə tanış olub və xatirə şəkilləri çəkilib.