İyunun 9-da Sahibə Qafarovanın sədrliyi ilə Milli Məclisin növbədənkənar yaz sessiyasının növbəti iclası keçirildi. Deputatlar əvvəlcə cari məsələlərdən söhbət açdılar.
Deputat Siyavuş Novruzov dedi ki, 9 iyun tarixi xalqımızın yaddaşına əbədi həkk olunub. Ulu öndər Heydər Əliyev 1993-cü il iyunun 9-da Naxçıvan Muxtar Respublikasından Bakıya döndü. Həmin gün, sözün həqiqi mənasında, ölkəmizin taleyində dönüş anı oldu, ümummilli liderin paytaxta qayıdışı müstəqil dövlətçiliyimizi parçalanmaq və məhv olmaq təhlükəsindən, iqtisadi tənəzzüldən, beynəlxalq təcriddən xilas etdi. Çıxış edənlər diqqətə çatdırdılar ki, ulu öndərin paytaxta dönüşü Azərbaycanın milli dövlətçilik ənənələrinin bərpa edilməsi və möhkəmləndirilməsi, müstəqilliyimizin əbədiyyətə çevrilməsi istiqamətində çox mühüm bir addım oldu.
Deputat Bəhruz Məhərrəmov bugünlərdə Azərbaycanın işğaldan azad edilən Şuşa şəhərində kütləvi məzarlığın aşkar edilməsini ermənilərin insanlıq əleyhinə cinayətlərini sübut edən fakt kimi dəyərləndirdi: “Şuşada aşkarlanan insan qalıqları Başlıbel, Fərrux, Edilli istiqamətlərindəki kütləvi məzarlıqların davamıdır. Belə faktlar erməni faşizminin ifşasında və həqiqətlərin beynəlxalq ictimaiyyətə çatdırılmasında önəmlidir”.
Sonra gündəlikdəki qanun layihələrinin müzakirəsi başlandı. Birinci məsələ –“Azərbaycan Respublikasının İnsan hüquqları üzrə müvəkkili (ombudsman) haqqında” Azərbaycan Respublikasının Konstitusiya Qanununda dəyişiklik edilməsi barədə Azərbaycan Respublikasının Konstitusiya Qanunu (ikinci səsvermə) barəsində Milli Məclis Sədrinin birinci müavini, hüquq siyasəti və dövlət quruculuğu komitəsinin sədri Əli Hüseynli məlumat verdi.
Qanun səsə qoyularaq qəbul edildikdən sonra “Azərbaycan Respublikası Hökuməti ilə Bosniya və Herseqovinanın Nazirlər Şurası arasında təbii və digər fəlakətlərdən mühafizə sahəsində əməkdaşlıq haqqında” Sazişin təsdiq edilməsi barədə qanun layihəsi müzakirəyə təqdim edildi. S.Qafarova bildirdi ki, beynəlxalq sazişlər birinci oxunuşdan sonra təsdiq edilməlidir. Odur ki, sənəd müzakirələrdən sonra qəbul edildi.
S.Qafarova məzmun və mahiyyətcə oxşar olan qanun layihələrinin ölkə Prezidentinin bir məktubu ilə daxil olduğunu bildirdi. Sənədlər müzakirələrdən sonra qəbul olundu.
Gündəlikdə nəzərdə tutulan Məhkəmə-Hüquq Şurasının tərkibinin yeni qaydada təşkil olunmasına dair layihə də qəbul edildi. Qanuna əsasən, Məhkəmə-Hüquq Şurasının 15 üzvdən ibarət tərkibi yeni qaydada təşkil olunacaq.
Müzakirəyə təqdim edilən “Azərbaycan Respublikasının Mərkəzi Bankı haqqında” Qanuna dəyişiklikliyə əsasən, Azərbaycan Mərkəzi Bankının səlahiyyətləri artırıldı. Dəyişikliklərə görə, İdarə Heyəti Mərkəzi Bankın kollegial ali idarəetmə orqanı funksiyası rolunu oynayacaq. Beləliklə, Mərkəzi Bankda daimi əsaslarla işləyən üzvlərin sayı da 4-dən 6-ya qaldırılır. Korrupsiya və qulluq cinayətlərinə görə məhkum olanlar İdarə Heyətinin üzvü ola bilməzlər.
Gündəlikdəki digər qanun layihələrinin müzakirəsindən sonra Milli Məclisin növbədənkənar sessiyasının növbəti iclası başa çatdı.
Ə.BƏDƏLOV, “Xalq qəzeti”