Fransada keçirilmiş rəy sorğusu nəticəsində məlum olub ki, fransızların 70 faizi Emmanuel Makronun yaxşı prezident olmadığı qənaətindədir. Bunu “Odoxa” sosial sorğu institute bəyan edib. Məlumatı “İzvestiya.ru” yayıb.
Sorğunun nəticələrinə görə, son bir ay ərzində Fransa prezidentinin populyarlıq reytinqi kəskin şəkildə aşağı düşüb. “Emmanuel Makron yaxşı prezidentdirmi” sualına respondentlərin 70 faizi “yox” cavabı verib. Rəyi soruşulanların 71 faizi isə pensiya islahatı ilə bağlı referendumun keçirilməsinin tərəfdarıdır.
“Odoxa”nın apardığı sosial sorğu göstərir ki, pensiya islahatının əleyhinə olan solçular respondentlərin daha çox rəğbətini qazanıblar. Sorğuda iştirak edənlərin 71 faizi pensiya ilə bağlı ümumi təşəbbüs referendumunun tərəfdarı olduğunu, 67 faizi isə yaş həddinin artırılmasının əleyhinə səs verəcəyini bildirib.
Makron isə etirazlara baxmayaraq, bildirib ki, nə pensiyalarla bağlı referendumu, nə də parlamentin buraxılmasını nəzərdə tutur və onun istefa ehtimalı yoxdur.
Paşa ƏMİRCANOV, “Xalq qəzeti”