Martın 26-da 7-ci çağırış Türkmənistan parlamentinə, eləcə də vilayət, rayon, şəhər xalq şuraları və yerli özünüidarə orqanlarına seçkilər keçirilib. Seçkilərdə Demokrat Partiyası, Türkmənistan Sənayeçilər və Sahibkarlar Partiyası, Aqrar Partiya və vətəndaşların təşəbbüs qrupları iştirak ediblər. Ümumilikdə, parlamentdəki 125 yerə deputatlar seçilib. Qeydə alınmış namizədlərin sayı isə 258 nəfər olub. Məlumatı “İzvestiya.ru” verib.
Rəsmi məlumatlara görə, əhalisi 6,2 milyon nəfər olan Türkmənistanda 3 milyon 496 min 475 seçici qeydə alınıb.
Səsvermədə Prezident Sərdar Berdiməhəmmədov da iştirak edib. Dövlət başçısı qeyd edib ki, seçkilər yüksək səviyyədə təşkil edilib və alternativ əsasda keçirilib. Seçki prosesinin mədəniyyət tədbirləri ilə müşayiət olunması onun səviyyəsini və əhəmiyyətini daha da artırıb.
Paşa ƏMİRCANOV, “Xalq qəzeti”