Martın 6-da Azərbaycan Respublikasının Xarici İşlər naziri Ceyhun Bayramov Ən az inkişaf etmiş ölkələr üzrə BMT-nin beşinci Konfransında (LDC5) iştirak etmək üçün Qətərə işgüzar səfəri çərçivəsində Qətər Dövlətinin Baş nazirinin müavini və xarici işlər naziri Şeyx Mohammed bin Abdulrahman bin Jassim Al Tani ilə görüşüb. 

Xarici İşlər Nazirliyinin Mətbuat Xid­məti İdarəsindən bildiriblər ki, görüşdə Azərbaycan və Qətər arasında ikitərəfli siyasi münasibətlərin inkişafından məm­nunluq ifadə olunub və iqtisadi-ticarət, investisiya, maliyyə, sənaye, enerji, nəq­liyyat, təhsil, turizm, mədəniyyət və digər sahələrdə gələcək əməkdaşlığın pers­pektivlərinə dair müzakirə aparılıb. 

Nazir Ceyhun Bayramov bölgədəki cari vəziyyət, işğaldan azad olunmuş əra­zilərdə Azərbaycan hökuməti tərəfindən aparılan bərpa və quruculuq işləri, ölkə­mizin təşəbbüsü və iştirakı ilə bölgədə həyata keçirilən nəqliyyat, kommunikasi­ya layihələri barədə ətraflı məlumat verib və bu istiqamətlərdə əməkdaşlıq imkanla­rının olduğu vurğulanıb. Bununla yanaşı, Ələt Azad İqtisadi Zonası çərçivəsində əməkdaşlıq imkanları müzakirə edilib. 

Qətər Dövlətinin Baş nazirinin müavini və xarici işlər naziri Şeyx Mohammed bin Abdulrahman bin Jassim Al Tani ölkəsinin Azərbaycanla hərtərəfli əməkdaşlıqda maraqlı olduğunu qeyd edib.

***

Martın 6-da Azərbaycan Respubli­kasının Xarici İşlər naziri Ceyhun Bay­ramov Qətər Dövlətinə işgüzar səfəri zamanı BMT Baş katibinin müavini, az inkişaf etmiş və dənizə çıxışı olmayan ölkələr üzrə ali nümayəndəsi Rabab Fatima ilə görüşüb.

Xarici İşlər Nazirliyinin Mətbuat Xid­məti İdarəsindən bildirilib ki, görüşdə na­zir Ceyhun Bayramov Azərbaycanın BMT və onun qurumları ilə sıx əməkdaşlıq etdi­yini və humanitar sahədə həyata keçirilən layihələrdə ölkəmizin iştirakı, ən az inkişaf etmiş ölkələrə göstərilən yardımlar, 130-a yaxın ölkəyə yardım proqramları barədə ətraflı məlumat verib. Azərbaycanın təqa­üd və təlim proqramlarından faydalanmaq imkanları diqqətə çatdırılıb.

BMT Baş katibinin müavini, az inkişaf etmiş və dənizə çıxışı olmayan ölkələr üzrə ali nümayəndəsi Rabab Fatima rəhbərlik etdiyi qurumun həmin ölkələrin üzləşdiyi problemlərin həlli istiqamətində gördüyü işlərdən danışıb. Rabab Fatima Azərbaycanın təşəbbüsü və dəstəyi ilə həyata keçirilən irimiqyaslı layihələrin xü­susilə dənizə çıxışı olmayan region ölkələ­rinin nəqliyyat imkanlarını artıracağını və BMT-nin Dayanıqlı İnkişaf Məqsədlərinin icrasına əsaslı töhfə verəcəyinə inamını ifadə edib. Azərbaycanın yardım proq­ramlarının əhəmiyyət daşıdığı bildirilib. 

***

Martın 6-da Azərbaycanın Xarici İşlər naziri Ceyhun Bayramov Ən az inkişaf etmiş ölkələr üzrə Birləşmiş Millətlər Təşkilatının (BMT) Beşinci Konfransı (LDC5) çərçivəsində BMT-nin Cənub-Cənub Əməkdaşlıq İdarə­sinin direktoru Dima Əl-Xatib ilə görü­şüb.

Görüşdə ən az inkişaf etmiş ölkələrin müxtəlif sahələrdə inkişafında texnoloji, sosial müdafiə, səhiyyə, təhsil və digər sahələrdə yardımların rolu, həmçinin bu istiqamətdə yardımların göstərilməsində əməkdaşlıq imkanları müzakirə edilib.

Nazir Ceyhun Bayramov Azərbayca­nın ən az inkişaf etmiş ölkələrə həyata keçirdiyi yardımlar barədə ətraflı məlumat verib. Ölkəmizin Qoşulmama Hərəkatı və İslam Əməkdaşlıq Təşkilatının üzv ölkələ­rinə tələbə təqaüd proqramlarının möv­cudluğu diqqətə çatdırılıb. 

***

Martın 6-da Qətər Dövlətinə işgü­zar səfəri çərçivəsində Azərbaycan Respublikasının Xarici İşlər naziri Cey­hun Bayramov ABŞ Dövlət katibinin Beynəlxalq Təşkilatlar məsələləri üzrə köməkçisi Mişel Sison ilə görüşüb.

Görüş zamanı regiondakı cari vəziy­yət, iki ölkə arasında ikitərəfli əlaqələr, ha­belə çoxtərəfli platformalarda əməkdaşlıq məsələləri ətrafında fikir mübadiləsi apa­rılıb. Ceyhun Bayramov, eyni zamanda, az inkişaf etmiş ölkələrə yardım və təqaüd proqramları barədə ətraflı məlumat verib. 

Nazir qarşı tərəfə bölgədə münaqişə­sonrası vəziyyət, ölkəmizin sülh qurucu­luğu addımları, azad edilmiş ərazilərdə aparılan bərpa-quruculuq işləri və möv­cud mina təhlükəsindən bəhs edib. Azər­baycanın sülh quruculuğu səylərinə bax­mayaraq, Ermənistanın təxribatlardan əl çəkmədiyi, öhdəliklərinə zidd olaraq mina təhdidlərini davam etdirdiyi diqqətə çatdı­rılıb.

***

Ceyhun Bayramov BMT-nin Ən az inkişaf etmiş ölkələr üzrə Beşinci Kon­fransında iştirakı çərçivəsində Qana Respublikasının xarici işlər və regional inteqrasiya naziri Şirley Ayorkor Botç­vey ilə də görüşüb.

Görüşlərdə qarşılıqlı maraq doğuran digər məsələlər ətrafında fikir mübadiləsi aparılıb.

***

Nazir ən az inkişaf etmiş ölkələr üzrə BMT-nin Beşinci Konfransında (LDC5) çıxış edib.

Konfrans çərçivəsində Azərbaycan Respublikası tərəfindən sözügedən ölkələrdə yoxsulluqla mübarizə, səhiyyə, təhsil və ətraf mühit kimi dayanıqlı inkişaf istiqamətlərində görülən işlərin və yar­dımların nümayişi məqsədilə sərgi təşkil olunub.

Qəzənfər QASIMOV, “Xalq qəzeti”