Müdafiə Nazirliyinin mətbuat xidmətinin mediaya açıqlamasında bildirilib ki, Xankəndi–Xəlfəli–Turşsu torpaq yolundan istifadə edilməklə Ermənistan respublikasından hərbi ləvazimatların, silah-sursatın və şəxsi heyətin Rusiya sülhməramlı kontingentinin müvəqqəti yerləşdiyi Azərbaycan ərazilərinə daşınmasının həyata keçirilməsi barədə nazirliyə operativ məlumatlar daxil olub.

Martın 5-də səhər sa­atlarında həmin məlumatın yoxlanması məqsədilə qa­nunsuz hərbi daşınmalar həyata keçirən nəqliyyat va­sitələrinin Azərbaycan Ordu­sunun bölmələri tərəfindən saxlanılaraq yoxlanılmasına cəhd göstərilib. Qarşı tərəf­dən atəş açılıb və baş ver­miş atışma nəticəsində hər iki tərəfdən həlak olan və yaralananlar var. Qeyri-qa­nuni erməni birləşmələrinin törətdikləri təxribat nəticəsində Azərbay­can Ordusunun hərbi qulluqçuları Əlibəyli Şəhriyar Ramiz oğlu və Hüseynov Eşqin Cəmil oğlu şəhid olublar.

Müdafiə Nazirliyinin məlumatında qeyd edilir ki, Qarabağ iqtisadi rayonu ilə Ermənistan respublikası arasında ye­ganə istifadə oluna biləcək avtomobil yolu Xankəndi-Laçın yoludur. Rusiya sülhmə­ramlı kontingentinin komandanlığına bir daha xatırladılır ki, başqa marşrutlar üzrə hərbi və digər təyinatlı daşınmaların hə­yata keçirilməsi qəti surətdə yolverilməz­dir. 

Ermənistanın yenə də Azərbaycanın Qarabağ iqtisadi rayonuna hərbi daşın­maları həyata keçirməsi faktı bu ölkənin Azərbaycana qarşı davam edən təcavüzü və terror siyasətidir. Törədilmiş təxribata görə bütün məsuliyyət Ermənistanın hər­bi-siyasi rəhbərliyinin üzərinə düşür.

***

Azərbaycan Respublikasının Xarici İşlər Nazirliyi də Rusiya Federasiyası sülhməramlı kontingentinin müvəqqə­ti olaraq yerləşdiyi Azərbaycan ərazilə­rində Ermənistanın növbəti təxribatları barədə məlumat yayıb.

Məlumatda bildirilib ki, Laçın yoluna alternativ olan köməkçi yollardan silah və sursatın, şəxsi heyət və minaların daşın­ması ilə bağlı daxil olmuş məlumatı yoxla­maq və dəqiqləşdirmək məqsədilə martın 5-də Azərbaycan Respublikasının Silahlı Qüvvələrinin əməliyyat bölməsi əraziyə göndərilib, Ermənistandan Xankəndiyə silah, sursat, şəxsi heyət və minaları da­şıyan avtomobillərin yoxlanmasına cəhd edilib. Bu zaman, qarşı tərəfdən açılan atəş nəticəsində ölən və yaralananlar var. Silahlı Qüvvələrimiz tərəfindən açılan ca­vab atəşi ilə təxribatçılar susdurulub.

Bu əməllər Azərbaycan–Ermənistan arasında sərhəd nəzarət-buraxılış reji­minin tətbiq edilməsinin labüdlüyünü bir daha sübut edir. Azərbaycan tərəfi bu hər­bi təxribatların qarşısını almaq məqsədilə üçtərəfli Bəyanatın icrasının təmin edil­məsini, Ermənistandan qeyri-qanuni silah və sursatın, şəxsi heyətin və minaların daşınmasına son qoyulmasını, Azərbay­can ərazilərindən erməni silahlı qüvvələ­rini dərhal çıxarmağı tələb edir.

“Xalq qəzeti”