Dünən ABŞ-ın Dövlət katibi Entoni Blinken Qazaxıstana rəsmi səfərə gedib. Onun Mərkəzi Asiya ölkələri XİN başçıları ilə də görüşü planlaşdırılır. Məlumatı “Kazinform” agentliyinə istinadən TASS verib.
Məlumatda bildirilir ki, Blinken Astanada Qazaxıstanın xarici işlər naziri Muxtar Tleuberdi ilə danışıqlar aparıb. Onu Qazaxıstan Prezidenti Kasım-Jomart Tokayev də qəbul edib.
Astanada Entoni Blinkenin iştirakı ilə həm də Mərkəzi Asiya ölkələri xarici siyasət idarələri rəhbərlərinin C5+1 formatında görüşü keçiriləcək. Görüşdə Mərkəzi Asiya respublikalarının ABŞ-la tərəfdaşlığı və regional əməkdaşlığın perspektivləri ilə bağlı məsələlərin müzakirəsi gözlənilir.
Məlumata görə, Blinken Astanadan sonra Daşkəndə gedəcək, burada Özbəkistanın yüksək vəzifəli şəxsləri ilə görüşlər keçirəcək. Martın 1-də isə o, “İyirmilər qrupu” xarici işlər nazirlərinin görüşündə iştirak etmək üçün Nyu-Dehliyə yola düşəcək.
Paşa ƏMİRCANOV, “Xalq qəzeti”
