UNEC-in MBA proqramının “Mühasibat uçotu” üzrə ixtisası yenidən 5 il müddətinə ACCA təşkilatında akkreditasiya edildi. İngiltərədə yaradılan ACCA kvalifikasiyası dünya əmək bazarının tələblərini özündə əks etdirən beynəlxalq səviyyəli statusa malikdir.
ACCA akkreditasiyası “Azərbaycan Respublikasında təhsilin inkişafı üzrə Dövlət Strategiyası”nda nəzərdə tutulduğu kimi MBA proqramının “Mühasibat uçotu” ixtisası üzrə təhsil alan magistrləri fundamental fənlərdən (F1-F9) azad edir. Bu fənlərdən (F1-Biznesdə mühasib, F2-İdarəetmə uçotu; F3-Maliyyə uçotu, F4-Biznes hüququ, F5-Performansın idarəedilməsi, F6-Vergitutma, F7-Maliyyə hesabatı F8-Audit, F9-Maliyyə menecmenti) azad olmaq və kvalifikasiyanı əldə etmək üçün beynəlxalq institutlarda və peşəkar təlim mərkəzlərində ən azı 2 il vaxt və kifayət qədər investisiya tələb olunur.
Bununla da UNEC Biznes Məktəbi magistrantlarına ACCA sertifikatını qazanmaq üçün sərf olunan əlavə vaxt itkisindən və xərclərdən azad olunmaq imkanı yaradır. Onu da qeyd edək ki, yerli və transmilli şirkətlər, maliyyə institutları, müstəqil audit firmaları və konsaltinq xidməti göstərən şirkətlər UNEC məzunu olan magistrlərə işə qəbul prosesində üstünlük verir.
Səadət RZAYEVA, “Xalq qəzeti”
