Azərbaycan ilə Avropanın digər hissəsi arasındakı əməkdaşlığın əhəmiyyəti gedərək artır. Burada yaşıl enerjini də qeyd etmək yerinə düşər. Azərbaycan ilə Sloveniya arasında konstruktiv münasibətlər qurulub. Biz müəyyən dərəcədə kiçik ölkəyik və enerji asılılığımız var. Enerji təchizatının vacibliyini anlayır və bilirik ki, bu, iqtisadi inkişafın əsas meyarıdır.

AZƏRTAC xəbər verir ki, bunu Sloveniyanın ətraf mühit, iqlim və energetika naziri Bojan Kumer Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında çıxışı zamanı deyib.

O bildirib ki, son illər ərzində siyasi vəziyyət xeyli dəyişib və bununla da enerji ehtiyatlarının və marşrutlarının şaxələndirilməsi heç vaxt olmadığı qədər vacib olub.

“Bu yeni reallıqdan baxaraq, etibarlı tərəfdaşlıq çox əhəmiyyətlidir. Azərbaycan dəqiqliklə bunu sübuta yetirdi. Sloveniya bu tərəfdaşlığa sadiqdir və Avropa Komissiyasının bu əməkdaşlığın gücləndirilməsindəki səylərini alqışlayır”, - deyə o qeyd edib.

Nazir vurğulayıb ki, Cənub Qaz Dəhlizi çox mühüm marşrutdur və Xəzər dənizi regionunu Avropa bazarlarına bağlayır: “Əgər biz gələcəyə nəzər salsaq etiraf etməliyik ki, bizim enerji təhlükəsizliyimiz yalnız təbii qazla məhdudlaşa bilməz. Azərbaycanın COP29-da sədrliyi aydın bir siqnala çevrildi ki, biz iqlim dəyişmələri ilə bağlı hərəkətə keçməliyik, bununla bağlı olan mövcud çağırışları aradan qaldırmalıyıq. Beləliklə, biz qətiyyətlə addımlar atmalıyıq və təmiz yaşıl enerji, həmçinin hidrogen sahəsində əməkdaşlığı gücləndirməliyik. Sloveniya Azərbaycanla əməkdaşlığın gücləndirilməsini səmimiyyətlə arzulayır, xüsusən də qaz təchizatı sahəsində tərəfdaşlığın daha da gücləndirilməsinin tərəfdarıdır. Bundan əlavə, digər təmiz enerji texnologiyalarında da maraqlıyıq və enerji sahəsində əməkdaşlığımızı genişləndiririk”.