Avropa Yenidənqurma və İnkişaf Bankının (AYİB) 2025-ci ilin fevralın 28-nə Azərbaycandakı aktiv portfelinin həcmi yanvar ayı ilə müqayisədə 0,37 faiz və ya 4 milyon avro artaraq 1 milyard 86 milyon avroya çatıb. Ötən müddətdə bank tərəfindən ölkəmizdə 33 layihə reallaşdıtrılıb. Bu və digər məlumatlar bankın hesabatında yer alıb.

Bildirilib ki, ümumi portfelin 92 faizini (994 milyon avro) dayanıqlı infrastruktura yatırımlar, 5 faizini (52 milyon avro) sənaye, ticarət və aqrobiznes investisiyaları, 4 faizini (40 milyon avro) isə maliyyə institutlarına yatırımlar təşkil edib. Fevral ayında bankın ölkədəki əməliyyat aktivlərinin həcmi isə əvvəlki aya nisbətən 1 faiz artaraq 757 milyon avroya çatıb.

Bütövlükdə isə, AYİB indiyədək ölkəmizə 196 layihə çərçivəsində 4 milyard 64 milyon avro həcmində investisiya yatırıb. Ümumi yatırımın 3,339 milyard avrosu borcgötürənlər tərəfindən xərclənib. Ötən müddətdə ümumi investisiyalarda özəl sektorun payı 36 faiz təşkil edib.