Prezident İlham Əliyevin milli maraqlara söykənən səmərəli iqtisadi siyasət kursunun uğurla həyata keçirilməsi nəticəsində dağ-mədən sənayesinin qeyri-neft-qaz sektorunda payı gündən-günə artır. Bu sahədə “AzerGold” QSC-nin fəaliyyəti xüsusi diqqət çəkir.
“AzerGold”un dağ-mədən sənayesinin inkişafı ilə bağlı qarşıya qoyulan vəzifələri uğurla gerçəkləşdirməsini ifadə edən bəzi göstəricilərə nəzər salaq. QSC-dən redaksiyamıza bildirildiyinə görə, şirkətin 8 illik fəaliyyəti dövründə qiymətli metalların yerli və beynəlxalq bazarlarda reallaşdırılması ilə ölkə iqtisadiyyatına mühüm töhfələr verib. Bu müddətdə “AzerGold” qeyri-neft-qaz sektoru üzrə ixracatçı dövlət subyektləri sırasında ön pillələrdə qərarlaşıb. Səhmdar Cəmiyyət 441,326 unsiya qızılın, 919,244 unsiya gümüşün hasilatını reallaşdırıb, eyni zamanda, 437,730 unsiya qızıl, 889,709 unsiya qızıl və gümüşün yerli və beynəlxalq bazarlarda satışını həyata keçirib. Bu satış əməliyyatları nəticəsində ölkə iqtisadiyyatına 1 milyard 274 milyon 95 manat vəsait cəlb edilib.
Qeyd edək ki, 2017-ci ildə “Çovdar” qızıl yatağında hasilat işlərinə başlayan “AzerGold” QSC istismar işləri ilə paralel ətraf ərazilərdə – Daşkəsən və Göygöl rayonlarında əlavə kəşfiyyat işləri də həyata keçirib. Nəticədə kəşf və tədqiq edilən yeni yataqların hesabına satıla bilən qızıl ehtiyatı 179 min unsiyadan 778 min unsiyaya çatdırılıb. Bununla da “Çovdar” və cinahlardakı yataqlar üzrə ümumi satıla bilən qızıl ehtiyatı bazasının 4 dəfədən çox artırılmasına nail olunub.
Ötən illər ərzində müstəqil büdcə ilə qızıl mədənlərini uğurla istismara verən, illik 1 milyard manat dövriyyəsi olan dağ-mədən şirkəti olmaq yolunda inamla addımlayan “AzerGold” dövlətə vergi formasında 153 milyon 773 min 857 manat vəsait ödəyib.
